Read pokoot YOSWÖ 17 Bible Online

YOSWÖ 17 - pokoot bible

YOSWÖ 17

¹Kikitö pipö ara Manase koros cho kimi Yordan okumpö ta. Ompöwölo ki poretya Yosep. Ketö Makir nyo kile poretya Manase akï papoto Kiliad, koro Kiliad nko Pasyan. Kimi koroswechï kongasispa Yordan, ompöwölo chi pö lïk Makir

²Ketö koroswe cho kingötï ara Manase kïrïp kegh nko korikwa. Choni kï Apieser nko Elek nko Asriel nko Syekem nko Eper nko Syemida. Choni werpö ara Manase, wero Yosep kïrïp kegh nko korikwa.

³Melö kisïch wor Selopead wero Eper, wero Kiliad, wero Makir, wero Manase. Kiyï tipïn opïn, choni kï: Mala nko Noa nko Okla nko Milka nko Tirsa.

⁴Kïpka tipichay tawu Eleasar tïsin nko Yoswö wero Nun nko kintöghoghï akïlö, “Kimwochï ECHOTYON Musa kïkonecha koros ompö kwenu tupchenicha.” Kïlenyona ketö chane koros ompö kwenu tupchenikwa kïrïp kegh nko ngölyonto ECHOTYON.

⁵Kïnyorï Manase woptin taman wölo kïsis koroninö kimi Kiliad nko Pasyan ompö Yordan antakwagh,

⁶ompöwölo kinyorï tipichi tïkwïl nko werkachi koros, kïpöyit koro Kiliad werpö Manase cho kingötï.

⁷Kingata koro Manase Asyer ntökwit Mikmetat nyo mi Syekem okumpö kongasis akïmïr rotyot okumpö tagh ntökïlït wölo möngöy pipö En Tapua.

⁸Kïpöyit pipö Manase koro Tapua, wölo kipöyit pipö Epraim kanasyanta Tapua nyo mi rotyo Manase.

⁹Atolapay kïcholol rotyot ntökïnam champilwa Kana. Kïpöyit Epraim kanastina cho kitang champilwanay okumpö tagh ompö kanastina Manase. Atolapay kuwer rotyo Manase champilwanay okumpö löt akïlït nanampa Kwen.

¹⁰Kipöyit Epraim kore wölo le okumpö tagh, kïpöyit Manase wölo le okumpö löt. Kilïkwï rotyenyi nanampa Kwen, kwit Asyer okumpö löt akwit Isakar okumpö kongasis.

¹¹Kitïng ara Manase kanasyan ompö koro Isakar nko Asyer Pet Syan nko kanastin cho mïnkech nko Ipleam nko pipö Dor nko pipö Endor nko pipö Tanak nko pipö Mekido nko kanastinekwa cho mïnkech (nyo pö sömök kï Napat).

¹²Akimelö kimï werpö Manase ntökïrïnta kanastinechoni, kïlenyona kimöngisyö pipö Kanan ompö korononi.

¹³Otini kinyorï nyakanat pipö Israel, kwigh pipö Kanan kïlïkwï sekey, wölo amökïyoncha nyonikïny.

¹⁴Kïpechï pipö ara Yosep Yoswö, kïtep lö, “Ompö ne tekonechanyi kor nyo mïnïng kechenga ainkïtönyi lö pöro katancha ompöwölo kisoyönecha ECHOTYON?”

¹⁵Kïlenchï Yoswö chane, “Ato poro katankwa ape nyu orösö wölo le wuw ompö koro pipö Peris nko Repaim, ompöwölo mïnïng koro kamaspa Epraim, melö ghömokwa.”

¹⁶Kïlö nyu pipö ara Yosep, “Melö ghömecha koro kamas, akwanyï tïng nkarino karïn pipö Kanan löwïr cho möngöy Pet Syan nko kanastinechi nko mpöghoghyo Yesrel.”

¹⁷Kïlenchï nyu Yoswö ara Yosep, choni kï ara Epraim nko Manase, “Ochikwa pich cho chang cho otïng owesyö nyo wow, melö omukekwa ntacheng kareran akonga nyo pö kor onkït,

¹⁸wölo lïku nyinkwa koro kamas, kïrkegh kö wuw. Orösekwa acheng ntökwitïta rotyot söröm nko söröm, ayonekwa pipö Kanan, kïrkegh kïtïng nkarino karïn akï kïrkegh kï owesöch chane.”