Read pokoot YOSWÖ 24 Bible Online

YOSWÖ 24 - pokoot bible

YOSWÖ 24

¹Kïghamït nyu Yoswö ortïna pipö Israel löwïr ompö Syekem akïkur poy nko kintöghoghï nko kirwokot nko wowïntino pipö Israel akughyongö tawu Tororöt.

²Atolapay kïlenchï Yoswö pïchay löwïr, “Lentöy ECHOTYON Tororöt pö Israel, ‘Kimöngöy könyisyok papotïnekwa Tera papoto Apraam nko Naor, lalwa Yuparet antakwagh, akipöghisyechini tororötin walaka.

³Kyamïtunan paponkwa Apraam lalwa Yuparet antakwagh antöghoghchan ompö koro Kanan kïmïkul atasan yiyötenyi otö Isak nyinte.

⁴Atolapay otönön Isak Yakopo nko Esau. Otönön Esau kamaspa Edom kïcheng, wölo kiwö Yakopo nko monechi Misri.

⁵Ayontan Musa nko Aron atönön nyarïl nyo wow koro Misri. Atolapay amwïtwokwa.

⁶Kyamïtunan papotïnekwa Misri ntökwitï nanam. Kirïpï pipö Misri papotïnekwa ompö nkaritin nko angoletin ntökwitï Nanam nyo Pïrir.

⁷Akï nyini kirirchanïn chane otönön tuwïn kwenungwa nko pipö Misri, atolapay aluman chane pögho nanam akïtïp akyasiwekwa ngal cho kyaghan ompö Misri. “ ‘Amangakwa surkwen osis cho chang.

⁸Atolapay amïtwakwa ntatukwa koro pipö Amori cho möngöy lalwa Yordan antakwagh kïporyeghenokwa, otönön chane morikwa, achengakwa korengwa awanyan chane.

⁹Kinget Palak wero Sipor pöytoghinto Moap kïporyeghenokwa, kïyonta pich kïkurï Palaam wero Peor atökïchïpokwa.

¹⁰Wölo melö kyachaman oterchï Palaam, kïlenyona kusoyönokwa, osörunenokwa nyu mori Palak.

¹¹Oghyekwa Yordan ntat Yeriko, kïporyeghenokwa pipö Yeriko nko Amori nko Peris nko Kanan nko Ititi nko Kirkasyi nko Ipiti nko Yepusi. Wölo kyokonokwa owesyö arïntena chane.

¹²Kyayoktan koromin nyo kintaghoghenokwa nyo kiyon pöytoghi pipö Amori kwodeny akwompö akwa. Melö kyompö chokonikwa anta ompö ngötwekwa.

¹³Akonokwa koros cho masïngekwanye nko kanastin cho melö kyatekakwa amangakwa ori, amakwa sapipun nko arol cho melö kyakatkatakwa.’ ”

¹⁴Kïlenyona kïtas tagh Yoswö kïlö, “Okonyïtö ECHOTYON, apöghisyechï nyinte ompö mïkulögh nyo melö pö lïs nko ompö man, opïstenö tororötinechay kipöghisyechini papotïnekwa ompö koro Mesopotamiya nko ompö Misri, apöghisyechï ECHOTYON.

¹⁵Wölo ato mochömekwanye opöghisyechinö ECHOTYON akïl asisete lö ngo opöghisyechini, ato kö tororötinechay kipöghisyechini papotïnekwa ompö koro Mesopotamiya, anta tororötino pipö Amori chï omöngekwa korengwa, wölo ani nko katanyan opöghisyechinan ECHOTYON.”

¹⁶Kuyokyï nyu pïchay lö, “Mökïpïstonechanye kepöghisyechinö ECHOTYON akepöghisyechï tororötin walaka.

¹⁷Ompöwölo kimïtwecha ECHOTYON Tororötïncha nko papotïnecha ompö koro Misri, kengetunenö koro mötwornön akwigh kiporut cho echön cho kikïsïwecha. Kïripotecha nyinte ompö wölini kikïpesteghecha löwïr nko ompö kwenu pich löwïr cho kikiweracha koroswekwa.

¹⁸Kiyon ECHOTYON ompö tawuncha pipö Amori cho kimöngöy koronï, kïlenyona, kïpöghisyechinecha ECHOTYON, ompöwölo nyinte kï Tororötïncha.”

¹⁹Wölo kïlenchï Yoswö pïchay, “Melö omukekwa opöghisyechinö ECHOTYON, ompöwölo Tororöt nyinte nyo tïlil akï söstoghin ompö tororötin walaka. Melö löstoghekwa lelutkökwo anta ngokikwo.

²⁰Ato opïstekwa ECHOTYON apöghisyechï tororötin cho monkïtökwanye, kïnyöpöno nyinte kwighwekwa nyo gha akuwanyakwa, kïrkegh kökikwighwakwa nyo karam.”

²¹Kïlenchï pïchay Yoswö, “Ewowowo! Kïpöghisyechinecha ECHOTYON.”

²²Kïlenchï Yoswö pïchay, “Ochikwa söwikwo akwane lö, kakïlakwa opöghisyechinö ECHOTYON.” Kïlö chane, “Kïchicha söwiko ngalechï.”

²³Kïlö nyu Yoswö, “Alastena tororötinechï le to mi kwenunkwa, akany kutang mïkulöwekwa wölo mi ECHOTYON Tororöt pö Israel.”

²⁴Kïlenchï pïchay Yoswö, “Kïpöghisyechinecha ECHOTYON Tororötïnyo aketerchï ngalechi.”

²⁵Kïlenyona, kwam Yoswö muma nko pïchay asisoni akutö chane kirurut ompö Syekem.

²⁶Kukirchï Yoswö ngalechoni kitapu Kirurut* pö Tororöt akïcheng kogh nyo wow kutö ket ghït nyo mi atay Tïlil pö ECHOTYON

²⁷Kïlenchï Yoswö pïchay löwïr, “Arose, lïku koghï söwintön ompö achane kegh ompöwölo kilïm ngala ECHOTYON löwïr cho kimwowecha, kïlenyona lïku söwintön ompö akwa, ato ataghakwa Tororöt.”

²⁸Kïmwochï Yoswö pïchay kïpechï kegh, kiwö chi anka tïkwïl korenyi nyo kicheng.

²⁹Otini kiwonyö ngalechoni, kïrapas Yoswö wero Nun, mötworinto ECHOTYON, ato kitïng könyis 110.

³⁰Kïtïpchï chane nyinte korenyi ompö Timnat Sera nyo mi Epraim koro kamas, okumpö löt ompö kutïng pö Kaas.

³¹Kïpöghisyechï nyu pipö Israel ECHOTYON ompö osiswo Yoswö löwïr nko ompö osiswo poy löwïr cho kidong lötu Yoswö akinkït kïgh anka tïkwïl nyo kighchï ECHOTYON pipö Israel.

³²Kïtïpchï pipö Israel koyo Yosep cho kipunö Misri Syekem ato kyala Yakopo werpö Amor papoto Syekem ompö ropïyeni silpa cho le 100. Kïlïkwï nyoni koro pipö Yosep.

³³Kïma Eleasar wero Aron, kïtïpchï chane nyinte Kipea, kanasyanta Pineas werïnyi nyo kikitö nyinte ompö koro Epraim kamas.