Read pokoot YOSWÖ 9 Bible Online

YOSWÖ 9 - pokoot bible

YOSWÖ 9

¹Otini kilïm ngalechï pöytoghï löwïr cho kimöngöy Yordan okumpö ta, wölo le kutïngkot nko tömköy nko sörömu nanampa Kwen, kaparta Lepanon koro pipö Ititi nko pipö Amori nko pipö Kanan nko Peris nko Ipiti nko Yepusi,

²kïghamït kegh kïlïkwï kïgh akonga, tökïporyeghö Yoswö nko pipö Israel.

³Wölo nyini kilïm pipö Kipyon wölo kida Yoswö pipö Yeriko nko Ai,

⁴kuna chane kïlïsisyö. Kïpa kïcheng omisyewutkökwa akïrötyï sïkïröyikwa mïlot cho kiwïryö nko tökolwo dipay* cho le sarankwachtin akikekïnokïn

⁵nko kwegh cho kiwïryö akekïnokïn nko sïro cho le sarankwachtin nko omisyewutkökwa cho kikïyomö akïkapïs.

⁶Kïpa kanasyanta Kilkal wölo kimito Yoswö akïlenchï nyinte nko pipö Israel, “Kïpkonocha kor nyo low nyo kyama ye nyu mis nko akwa.”

⁷Wölo kïlenchï pipö Israel pipö Ipiti, “Nkïtöptoy omöngekwa atolekït ompö acha, kyomecha nyu mis lö ne nko akwa?”

⁸Kïlenchï chane Yoswö, “Kïchicha mötworiku.” Kuyokyï Yoswö kïlenchï, “Ochikwa ngo? Apkonokwa onö?”

⁹Kïlö pïchay, “Kïpkonocha mötworiku kor nyo low nyoman, ompöwölo kakïlïmecha pich ngala ECHOTYON Tororötïngu nko tïkwïn löwïr cho kigh ompö Misri.

¹⁰Kakïlïmacha wölo kida nyinte pöytoghichay le odeny pö pipö Amori cho kimito Yordan okumpö kongasis: Sion pöytoghinto Espon nko Ok pöytoghinto Pasyan nyo kimöngöy Astarot.*

¹¹Kïlenchecha poyicha nko pich löwïr cho möngöy korencha, ‘Opö omisyö atamatena ompö or apa ntonyorï chane alenchï, “Kïchicha mötworikwa, apkana nyu kyama mis nko acha.” ’

¹²Achï makatinecha cho kitökïlölöng ato kipunocha kestonicha le omisyö ompö or asisini kikïngetucha akepkan wölo omitekwa, wölo ye, arosa kikïyomö akïkapïs.

¹³Kitökïrelach tökolwechï pö dipay ato kinyïghitecha, wölo arosa lö kikörerisyö. Köwïryö sïroköcha nko kweghkö akwompö pan nyo kogh.”

¹⁴Kïlenyona kïcheng pipö Israel tïkuchay amelö kitökïtep ECHOTYON ngölyon.

¹⁵Kïlenyona nyu kwam Yoswö mis nko chane akwam muma kepïstö chane kïsötot akïcham poyi tuyot tïkwïl.

¹⁶Kïkany kuwer osiswö sömökï kïngata otini kyam mis nko chane, kïlïm lö kïchï pöröriskökwa.

¹⁷Kïlenyona kïpa pipö Israel ntökwit kanastina pïchoni ompö asisto sömök. Kanastinekwa nyu kï: Kipyon nko Kepira nko Peerot nko Kiryat Yearim.

¹⁸Wölo melö kipar pipö Israel chane, ompöwölo kökikuwolwolchï poyï chane ompö kaynata ECHOTYON Tororöt pö Israel lö, melö kïpörokwa. Atolapay kïngwïrngwïronchï tuyot poyichay.

¹⁹Wölo kïlenchï chane tuyonay kïmïkul, “Kikiwolwolchicha chane ompö kaynata ECHOTYON Tororöt pö Israel, kïlenyona melö kimukecha tökeswany chane.

²⁰Kïpïstocha chane kïsöpchö, atömamecha kiwalwalatenyo.

²¹Opïstenö chane kïsöpchö wölo lïku pich cho pösöy kwen akïrömchï pögh pipö Israel löwïr.” Nka nyoni kïgh nyo kimwa kintöghoghï.

²²Kiyonta nyu Yoswö chi kïkur chane akïlenchï, “Ompö ne talïsechakwa lö kïpkono kor nyo low, akwanyï kïchï omöngekwa nko acha?

²³Kïlenyona ye ochikwa chïpote alïkunekwa sekey kokay cho opösöy kwen apetöy pögh cho pö Kö pö Tororötïnyan.”

²⁴Kuyokyï pïchay Yoswö lö, “Kikighacha lenyoni ompöwölo kikïlïmacha lö kimwochï ECHOTYON Tororötïngu Musa mötworintenyi kïkonokwa koronï kïmïkul akïpar akwompö akwa pich löwïr cho möngöy ori, kïlenyona kikyotyecha nyoman ompö akwa.

²⁵Kïmitecha ye nyu moriku, idecha wölo keda lenyini kesïwenyi lö karam.”

²⁶Kïlenyona kïsörunö Yoswö chane, mori pipö Israel tömöpar.

²⁷Wölo kwigh Yoswö chane asisoni kïlïkwï pich cho pösöy kwen akïrömchï pögh pipö Israel nko ato kïpelo amörostino ECHOTYON kïnomnyö lenyoni nko nyete le ye ompö wölini kikïl ECHOTYON kesagha nyinte.