Read pokoot 2 TESALONIKE 1 Bible Online

2 TESALONIKE 1 - pokoot bible

2 TESALONIKE 1

¹Kakirwan palalyantanï ante Paulö nko Silpano nko Timoteo. Kikirchinecha kanisa Tesalonike cho chane kï piko Paponyo Tororöt akï Echotyon Yeso Kristo.

²Onyorï pöropchö nko kalya nyo ngwïno Paponyo Tororöt nko Echotyon Yeso Kristo.

³Mïchinecha, tupchenicho keyokyine Tororöt sörö kïtenö osis ompö akwa rokonecha kegha lenyoni, ompöwölo mi kighanatenkwa kïyetu nyoman akïmi chomnyenkwa kïtöso ompö pikö walaka.

⁴Nka nyoni kïgh nyo keghecha kekwolenö kegh akwa ompö kaniseni Tororöt. Kïkwolecha kegh ompö or nyo omitekwa orïpöy ompö kighanatenkwa nyo melö wöghöko, kïrkegh nyörilwok nko kiwongunöt cho konyorukwa.

⁵Poru ngalechoni lö, pö man kirwoko Tororöt nyo ighokwa nyinte alïkuna pich cho mïchini Pöyunötenyi nyoni omitekwa owonguno.

⁶Ighöy Tororöt kïgh nyo tenate: ipchini nyarïl pich cho chopokwa kong,

⁷akïkonokwa kimungöt nko acha tïkwïl cho kichopech kong ato kïngongunö yïm Echotyon Yeso nko malaykenichi cho owesöch nko lyöpoto ma,

⁸atökuchop kong pich cho möchömöcha Tororöt nko cho mörïpöcha Lökoy cho Karamach cho pö Echotyontencha Yeso.

⁹Wonguno chane kichopata kong nko kiwurat nyo pö kokay akepesyeghö chane wölo mi Echotyon nko owesyeto ororyenyi,

¹⁰otini ketï nyinte Asisoni, kïtoko pikachi cho kikughan ororyö nko konyït. Olïkunekwa tïkwïl akonga nko pïchoni, ompöwölo kyaghanakwa ngalechay kikïmwowucha.

¹¹Nka nyoni kïmicha kesoghwokwa osis lapay. Kïsoghecha tororötïnyo lö, teghakwa otïpïnö otöp nyo mïchini kuröt, nyo kikurchokwa nyinte. Kïsoghecha lö, tewantegha nyinte owesyenyi machatenkwa nyo pö köromnyö akupuntö ighisyenkwa nyo pö kighanat.

¹²Akwompö choni löwïr, nyoru kaynata Echotyon Yeso ororyö ompö akwa, anyorunekwa tïkwïl ororyö ompö nyinte, kïrïp kegh nko pöropcho Tororötïnyo nko Echotyon Yeso Kristo.