Read pokoot 2 TESALONIKE 2 Bible Online

2 TESALONIKE 2 - pokoot bible

2 TESALONIKE 2

¹Kïsomokwa ye nyu nyoman, tupchenicho ompö ngala kingwïnateto Echotyontenyo Yeso Kristo* nko tuyencha nko nyinte

²lö, makany kïwöngisyö kinonutkökwo lawel anta kususok pich cho mwoghöy lö, kikwitï asispa Echotyon. Töptoy nonöy pikö walaka lö acha cho kikïmwagh lenyoni ompö amtaghtancha anta mwa lö acha choni kikir ngalechoni palalyan.

³Makany kïlïsak chi anka tïkwïl ompö or anka tïkwïl. Ompöwölo metunye Asisoni ntökïtenö kïnya kwitï Penyata nyo wow akengongwï Mwokïyontonay kikengotyï ngwen.

⁴ Mölöy kïgh anka tïkwïl akïsyol kegh kïtïl kïgh nyo soghöy pich, anta nyo kïkïtïngchini kesoghöy. Lïtöy ompö Kö pö Tororöt* akïtöpö ori akwigh kegh lö ochï Tororöt.

⁵Mononekwanye so lö, kyomwowokwa ngalechoni atanya kitomitan nko akwa?

⁶Wölo onkïtökwa kïgh nyo pöpeköy nyinte otï le ye, akosöwukwa kïyoni. Kïngongu nyu Mwokïyontononi ato itï asistanyi nyo mïchini.

⁷Wölo mi wïnyatanoni pö Penyat kïpöghisïyi otï le ye, wölo mi akong nyo pöpeköy nyinte, amökïngongunye ntökïtenö kenategha nyinte nyoni pöpeköy.

⁸Atolapay kengongwï Mwokïyontononi, wölo ato itï Echotyon Yeso kïtïgho nyinte kimungöteto kutinyi akunyar ompö kwörkwöryeto rumunötenyi.

⁹ Itu Mwokïyontononi nko owesyo Onyöt atökwigh kïgh anka tïkwïl nyo pö kiporunöt nko töngönchintin cho lïso pich,

¹⁰akïpöghisyeghö lïs ompö or anka tïkwïl ompö pich cho petöy kuwonyot. Wonyot chane ompöwölo kitagh kïtak ngalechoni pö man nyo kitökïsöru chane.

¹¹Nka nyoni ketö Tororöt oringwa owesyo kipotöt atökughan chane putintön

¹²atökurwokyï asïyech Tororöt pich löwïr cho kimeghancha ngala man, ompöwölo kingörekyï chane ngokï.

¹³Mïchinecha keyokyine Tororöt sörö kïnomnyö ompö akwa, tupchenicho akwa chona kichamak Echotyon, ompöwölo kikïlakwa Tororöt kïngeta towunöt atonyorunö sörunöt ompö owesyo Mïkulögh atökeghakwa alïkuna pikachi cho tïlilöch ompö kighanat nyo pö ngölyonto man.

¹⁴Kikurokwa Tororöt ompö aranoni ompö ara Lökoy cho Karamach cho kyalïmekwa acha. Kikurokwa nyinte atosïkö kiparat nyo pö töroryo Echotyontenyo Yeso Kristo.

¹⁵Kïlenyonanyu, tupchenicho, oghyongö lasiny, atas tagh aghan ngalechoni pö man kikinetakwa, ompö amtaghtinecha nko ompö palaltinecha.

¹⁶Kïsoghecha Echotyontenyo Yeso Kristo nko Paponyo Tororöt nyo kichamech akïkonecha saghsaghat nyo pö kokay nko kikönöt nyo karam ompö pöropchenyi,

¹⁷lö, tetö nyinte mïkulöwekwa saghsaghat, akuchïchimakwa kinomnyö agha, angalan kïgh anka tïkwïl nyo karam.