Read pokoot 1 TIMOTEO 5 Bible Online

1 TIMOTEO 5 - pokoot bible

1 TIMOTEO 5

¹Meteghchï poyon, wölo ngölonchinö nyinte mut le papongu. Ighchinö mïrön cho le chumwak kïle wölo keghchinenyi werkökwa,

²aighchï kokon le yotïneku aighchï kor cho tökïmïnkech le tipikwa, ompö otöp nyo pö tïlilyö.

³Rosa ompö konyït kor cho le mïsïktin akï, cho le mïsïktin man.

⁴Wölo ato mi mïsïk nyo tïng monechi anta kokötinechi, kïmïchini nyo pö tagh kuporï monechoni kighanatengwa ompö ripöto kutak wölanya kikïnam chane. Chömunote ngölyontononi ompö tawu Tororöt.

⁵Mïsïk nyo puryö chi möngisïyi tïkwïl, kï nyo kikutö kikönötenyi wölo mi Tororöt akïsomöy Tororöt kingarakat kïnomnyö ompö saghat, nangat nko pöghet.

⁶Wölo mïsïk nyo chömo kegh lïs nyo pö ngörekyo ngwïny, kïlenye chi nyo kikïma kïrkegh kïsöpöy.

⁷Neta pich ngalechi atömökïnyorchï chane lelut.

⁸Wölo atomengaraknye chi pikökwa, ntökïmïr chini pö katangwa, kï kikïpïstö chichoni kighanatenyi akïgha tya kïsir chi nyo meghönönye Tororöt.

⁹Menyagh ikirchï kaynata mïsïk wölo kikirchini kaynötut pö mïsïktin atotomönye kwit könyiswechi 60. Nyo pö odeny, mïchini kenkïtï lö kimöngisïyi kughanate nko santenyi,

¹⁰akï nyo kikïlïmchini pöghisyewut cho karamach akï nyo kinam monechi nyo karam akïtach to ompö konyi akuwun kelyo pipö Tororöt akungarak cho kitïng kömpölelyö akukil kegh ompö pöghisyö nyo karam.

¹¹Wölo mekir mïsïktin cho tökïmïnkech, ompöwölo muköy kïlïmchï kegh machat nyo pö ipöt kïsir kutötö kegh ompö Kristo.*

¹²Akwompö atoni kïlelchï nyinte ompöwölo köpïstö kiyomisötengwa nyo kipö tagh.

¹³Rwötotoy mïsïktina cho lata choni akuwitwitöy kori pich akï kitö nyu nyo gha tya ompö chane kï ngölono akuswomöy pikö walaka akulut kegh ngala piko walaka akïmwa ngal cho melö keroko.

¹⁴Nyo osïwïyan lö ngwangwa kep mïsïktin cho tökïmïnkech atökïsïch monekwa akï rip kestonikwa. Ato igh lenyoni kïmosïkönye pungköcho pöroyïn nyo ngölono nyo gha parakunyo.

¹⁵Ompöwölo mi mïsïktina cho kikïwöghökisyö akïrïp Onyöt.

¹⁶Wölo ato mi korka nyo kikughan Kristo nyo tïng mïsïktin ompö katangwa, kïmïchini kungarak nyinte chane atömetö kanisa nïkisïn. Muköy nyu kanisa ompö atoni kungarak mïsïktin cho mi opïn.

¹⁷Mïchini poy cho le kintöghoghi kanisa cho pöghisïyi nyo karam konyït ompö konyït nyo wow, kïmïr tya cho noghyot ompö amtagh akunetisïyi.

¹⁸ Ompöwölo lentöy Kikirut, “Marat egh kuti ato kïpöghisyegho kïpöpötöy pagh,” akïlentöy ngat, “Mïchini chi nyo pöghisïyi kïnyorï mïsyare chi.”

¹⁹ Amanyagh icham ngölyonto kigheghchin paraku poyon kïpoto ato ipï söwï cho le odeny, anta sömök.

²⁰Teghchinö ompö tawu pich, pich löwïr, cho tösöy tagh kwïghöy ngokï, atökuwagh pikö walaka.

²¹Omwöwunyi ompö tawu Tororöt nko nyo pö Kristo Yeso nko ompö tawu malayken cho kikekïl lö, rïpa ngalechï lödo amekïl pich, amegh kïgh anka tïkwïl nyo poru lö mi pich cho ichömenyi nko cho isösenyi.

²²Mesörchï ikanagh chi ewun atökïpöghisyechi Echotyon, Ilowitö kegh ngokiko pikö walaka. Töpenö ompö tïlilïn.

²³Megheghe pögh opïn, wölo ghegha dipay* tïkwïte tökungarak muyengu, ompöwölo ichirchirenyi kïtenö osis.

²⁴Rumunote latok ngokiko piko walaka chini ntöghoghchini chane ntökwit kirwok, wölo mörumunye lawel cho pö pikö walaka ntökïtenö ato le lötï.

²⁵Kïlenyoni tïkwïl, rumu pöghisyewut cho karamach, latok, amöwïngisyocha kokay ighisyewut cho karamach cho mörumunye latok ye.