Read pokoot 1 TIMOTEO 6 Bible Online

1 TIMOTEO 6 - pokoot bible

1 TIMOTEO 6

¹Mïchini pich cho le sekey kïkonyït yetïntinekwa atömömi chi nyo swomöy kaynata Tororöt anta kinetutköcha.

²Akwato mi sekey cho tïng yetïntinekwa cho kikughan Kristo,* kïmömïchininye kuparta konyït nyo mïnïng lö ompöwölo tupchö ompö Kristo. Nyo köteghöy lenyoni mïchini kïpöghisyechï chane nyo karam tya, ompöwölo pich cho nyoru tösunöto pöghisyengwa, kï chaman cho kikughan Kristo. Inet ngalechï aimwochï pich lapay kïrïp.

³Chi anka tïkwïl nyo netöy kinetut walaka cho sis, akïmörïpönye ngaleko Echotyontenyo Yeso Kristo cho pö man nko kinetut pö otöp nyo pö konyïtöto Tororöt,

⁴kï chi nyo kep kegh yïm kwïle amenkïtnye kïgh. Chi nyoni nyo möro kong chemölö nyo pö ngal cho mömi cho ipu nyonyintön nko syala kiswomöt nko kinonut cho ghach,

⁵nko chemölö nyo pö ngal cho möngötöy cho pkono pich cho kikïwïryö kinonut, amökïtïngcha ngölyonto man. Lenchini kegh chane keghan Tororöt kï or nyo kïsïko mökosyö.

⁶Akï man kemwa lö mökositu chi nyoman nyo konyïtöy Tororöt wölo ato net kegh kïmïchï nyinte tïkwïn cho tïng.

⁷Ompöwölo ipo ngo ne ngwïnyinï? Akï ne nyo kiponecha ngwïnyinete?

⁸Kïlenyona ato kïtïngetecha omisyö nko sïro, kuroko kïmïchecha choni.

⁹Wölo pich cho möro kong sïkönöt kupïtyini työmut akupïtyini chane ngöghöp nyo pö pïrchin cho ghach cho puryö kinyiwut, cho chutöy chane kïröytoy wölo mi wïrata nko kinyarat.

¹⁰Ompöwölo ighïna ghöyityö anka tïkwïl kï chamata ropïyen. Akwompö chamatanoni pö ropïyen mi piko walaka cho, kikïpïstö kighanatengwa akwipchï kegh nyörilwok nko kisusut cho chang.

¹¹Wölo nyi, chi pö Tororöt malena kegh ngalechoni löwïr airïp ara man aikonyït Tororöt. Nama kighanat nko chomnyogh nko mïkukönöt nko tölosyö.

¹²Iporyö lasiny poryo kighanat ainam lö kïng söpon pö kokay nyo kikurchinyi Tororöt otini kimwaghenyi kutingu lö kaghan Kristo ompö tawu söwï cho chang.

¹³ Ochilinyi ompö tawu Tororöt nyo töni söpon tïkwïn löwïr nko tawu Kristo Yeso nyo kitötö söwintön nyo pö man ompö tawu Pontio Pilato,

¹⁴lö nama kirurutchï airït lasiny mewö kamas ntökïtenö kwitï Asis ato kiporu Echotyontenyo Yeso Kristo.

¹⁵Akï Tororöt kisoyönin nyo le pöytoghin nyo mömi anka, pöytoghinto pöytoghï akï Echotyonto echot, nyo poru Kristo otini ketïta osiswechoni.

¹⁶Nyinte onkït nyo söpöy kokay, akï töpuno wölo mi löpoyïn nyo memukönye chi tökïrich. Möminye chi nyonikïny nyo kikïsïwa nyinte anta nyo muköy kïsïwa nyinte. Nya lïkwï nyenyi konyït nko paytagh nyo pö kokay! Amen.*

¹⁷Mwochinö pich cho le monkor ompö tïpö ngwïnyinï lö momen, amotö kikönötengwo tïkwïn cho tïkon ato kewonyö, wölo kutö wölo mi Tororöt nyini konu tïkwïn lapay ompö chongïn kengörekyeghenö.

¹⁸Mwochinö chane kwigh nyo karam akïlïkwï monkor ompö pöghisyewut cho karamach. Mwochinö tïkwïl kukörkoröy morïn kïcham kutötö tïkukwa akupar nko piko walaka.

¹⁹Ato igh lenyoni rorchini chane kegh kaplawach chïchïmo chane ompö osis cho tökïpkonöy atö kïnyorï söpon pö man.

²⁰Apoy Timoteo, ikaman lasiny choni kaketö moriku. Imala kegh chomölo ngala ngwïnyinï nko sölwontön cho mökonyïtöcha Tororöt akï cho lelöy pikö walaka kïkuro “Ngöghomnyö.”

²¹Ompöwölo mi piko walaka cho menöy lö kïtïng ngöghomnyononi, wölo mwochï ne lö kikïtosonchö ompö ara kighanat! Nya kïtöpö pöropcho Tororöt nko akwa lapay.