Read pokoot 2 TIMOTEO 2 Bible Online

2 TIMOTEO 2 - pokoot bible

2 TIMOTEO 2

¹Kïlenyona nyu werïnyu, inyakanitï ompö pöropchö nyo kïsïkecha otini kökïlinyecha nko Kristo Yeso.

²Neta kinetut chanya kilïmanyi omtonan ompö tawu söwï cho chang, aionkoghchï pich cho ghonote atökumï tïkwïl kunet pikö walaka.

³Chenga kareranpa kiwongunöt le askaryon nyo ghanate nyo pö Kristo Yeso.

⁴Möminye ataye askaryon nyo otini tökïmi woyöt nyo, wechini kïsïngo pöghisyewut walaka möpönye askarnön, ompöwölo machatenyi nyo wow kï kwigh cho ngörökyini echotyontenyi.

⁵Akï möminye kirïpin nyo nyoru ropöwon atomarïpnye tötut pö kirïpöt.

⁶Mïchini ngorinto par nyini ighöy pöghisyö nyo aghïgh, kïnya kïnyorï kareran nyo pö paghechoni.

⁷Inan lasiny ngalechï omwoghan, ompöwölo ngörokinyi Echotyon kïpköchinyi kïgh anka tïkwïl.

⁸Ainan Yeso Kristo nyo kitutunö wölo mi cho kimeghö akï nyo kipö ara Daudi, kïrïp kegh nko kinetut pö Lökoy cho Karamach cho omitan omtoy.

⁹Kowongwan ompöwölo kamtan Lökoy cho Karamach, akeratan le chi nyo le rïmin. Wölo melö ratate ngölyonto Tororöt.

¹⁰Nka nyoni ye omitan omïkukönöy ompö ngwonïn anka tïkwïl ompö kinyiwutyo pipö Tororöt cho kikïlöwön, atökumï chane tïkwïl kïnyorï sörunöt ompö Kristo Yeso nyo ipu ororyö nyo pö kokay.

¹¹Pö man ngölyontonay lentöy, “Ato kikemeghecha nko nyinte, kesöpsocha nko nyinte tïkwïl.

¹² Ato kiletacha tagh kemïkukön, kepöytocha nko nyinte tïkwïl. Ato kïtaghacha nyinte, kïtöghecha nyinte tïkwïl.

¹³Ato kïlïkucha pich cho melö kighönöy, kokay töpo nyinte kughanate. Ompöwölo memukönye nyinte kïlïku putin ompö nyinte kegh.”

¹⁴Inonchï nyu piköku ngalechete lasiny aimwochï ompö tawu Tororöt kïpïstö chemölo ngal. Mepunye chemölononi kïgh nyo karam, wölo nyoröy pich cho lïmöy.

¹⁵Inoghyö lasiny tökïcham Tororöt pöghisyengu ailïkwï, chi nyo mötïngnye lolïyönöte ompö pöghisyenyi akï chi nyo netöy ngölyonto Tororöt kuten.

¹⁶Ikïrö kegh ngala sölwontön cho lowöch nko ara Tororöt, ompöwölo cho chutöy pich kïlowöchitu nko nyinte.

¹⁷Karkegh kinetutchoni nko chepserkech nyo setöy kuwany por. Mi pich odeny cho kenet pich ngalechoni, akï chane kï Umenayo nko Pileto.

¹⁸Kipïstö chane ara man, akïpechï kïwaghach kighanata pich cho te otini netöy lö, kikwigha kitutunötencha.

¹⁹ Wölo metimtimonye kokay kitorötö nyo kitek nyinte Tororöt, akï nyo kikikirchï ngalechï lentöy, “Nkït Echotyon cho le chechi,” akïlö ngat, “Ato mi chi nyo lentöy ochï chi pö Echotyon, kuroko kïpïstö ighisyewut cho ghach.”

²⁰Ompö kö nyo wow mi karïn cho chang cho lata tören nko otupöy. Kikigha walaka kari silpa nko koltin, kegha walaka ket nko mönö. Kïpöghisyegho walaka ompö osiswo ichon, kepöghisyegho walaka ompö osiswechinö walaka.

²¹Ato kïrö kegh chi anka tïkwïl ighisyewut cho ghach, kepöghisyegho nyinte le kari ichon ompöwölo kikengotyï yona atökïpöghisyechï Echotyontenyi, akïmi kïpsach kepöghisyeghö ompö pöghisyö anka tïkwïl nyo karam.

²²Imala kegh pïrchin pö naran, ainoghyö irïp ngala man nko kighanat nko chomnyogh nko kalya. Igha lenyoni ainomnyotö nko pich cho kuröy Echotyon otini somöy kingarakat ompö mïkulögh nyo karam.

²³Wölo inategha kegh ompö kimölöto kegh nyo pö sölwontön nko kwarirat. Inkïtönyi lö sörömunyi ngalechoni ipu syölut.

²⁴Mömïchininye mötworinto Echotyon kïlïkwï chi nyo le syölin. Mïchini nyinte kuporï tölosyö ompö pich lapay, akïlïkwï konetin nyo karam nyo le mïkukönin.

²⁵Mïchini tïkwïl kïlïkwï chi nyo porchini man ompö tölosyö pich töghöy ngalechi, ompöwölo töptoy töni ana Tororöt chane pöroyïn kïlasta ngokikwa akunkïtï man.

²⁶Ompö atoni muköy kïyotisyö chane mötöwo, atolapay kumï kïchïwïtyeghö ngöghöpo Onyöt nyo kikakïnam chane akwigh kïrïp machatenyi.