Read pokoot 2 TIMOTEO 4 Bible Online

2 TIMOTEO 4 - pokoot bible

2 TIMOTEO 4

¹Omwowunyi ompö tawu Tororöt nko nyo pö Kristo* Yeso nyo ngwïnöy kurwokini pich cho söpsot nko cho kimeghö, akungwïnöy kïpöytoy le pöytoghin lö,

²amtena ngölyonto Tororöt, amekïch iamta (ato kö ompö pöroyïn nyo kömïchini anta kömelö kömïchini). Ichil aiteghchï pich mötosonchö, aikil chane otini inetisyenyi ompö mïkukönöt.

³Pkonöy osiswö cho mökïteröcha pich kinetut cho pö man, akïrïp pïrchintinekwa, akïghömïtï kegh konetï cho chang tya cho mwochini chane ngal cho chömöy yitikwa kïlïmöy.

⁴Melö tökïteröy pïchoni ngala man, wölo köwöghökisyö kïter ngala tyankoy.

⁵Wölo mïchininyi ripö kegh, amekany kumirïn kïgh anka tïkwïl. Kamagha nyörïlwok, igha pöghisyö nyo kyomtoy Lökoy cho Karamach, ailïtit pöghisyengu nyo kikonïn Tororöt.

⁶Wölo ompö okuntanyan, karich ato kitötoy söpontönyan kïlïkwï amöros akikwitï meghenyan.

⁷Koporyan poryot nyo karam, akorïpön ntat sörömu kirïpöt, akaman lasiny kighanat.

⁸Nyo köngötwanïn ye kekonön ropöwonto man, nyo konanïn Echotyon nyinte nyo le kirwokinto man ompö Asisini mïlo nyinte. Amelö nyu konanïn onkït, wölo töni tïkwïl pich lapay cho köngöy ompö chomnyogh asisini chumu nyinte.

⁹Ingwïn ya wölo omitan lawel.

¹⁰ Kicham Dema ngala ngwïnyinï akikïpïstanïn kïwö kutang Tesalonike. Kïwö Kreske kutang Kalatia, kïwö Tito kutang Dalmatia.

¹¹ Luka onkït nyo mi nko ani. Yörunö Marko aingwïn nko nyinte, ompöwölo muköy kungörokanïn ompö pöghisyenyan.

¹² Kayontan Tukiko kïwö Epeso.

¹³Ipkante kotinyu nyo kyopïsyan ka Karpo ompö kanasyanta Troa. Ipko tïkwïl kitapunechan ntökïmïr tya kitapune chay pö sïro pö kechir.

¹⁴ Kighwanïn nyo gha nyoman Aleksanda nyay le kitonginto kari taghoy. Yokyini Echotyon nyinte kïrïp kegh nko ighisyewutkachi.

¹⁵Irip kegh nyinte tïkwïl, ompöwölo kilyoch nyinte ompö köromnyö nyoman ngalechaye kyomtocha.

¹⁶Kimöminye chi nyo kisöröpkanïn atanya kikirwokwanïn panto tagh. Kipïstanïn chane lapay. Osoghan Tororöt meyityï pïchoni lelutyononi.

¹⁷Wölo kimi Echotyon nko ani akukilanïn, ntamukan amta Lökoy cho Karamach kïmïchï, atökïlïm pipö punton löwïr. Akisörunenanïn Echotyon kirwoko meghat lenye ato kïngwïsuna chi kuti ngötïny.

¹⁸Sörwanïn Echotyon ompö kïgh anka tïkwïl nyo gha, akïripanïn ntökïtenö atan Pöyunötenyi nyo pö yïm. Nya kïsïch nyinte ororyö kokay nko kokay! Amen.*

¹⁹ Itokweswante Priska nko Akwila nko pipö ka Onesiporo lö döng.

²⁰ Kidong Erasto Korinto. Opïsyan Tropimo Mileto ompöwölo kichirate.

²¹Imukyï nyoman ingwïn kïtomö kwitïta osiswo kaghïtan. Ketakwesinyi ompö Eupulo nko Pude nko Lino nko Klaudia nko lapay cho kïtupchö ompö Echotyon.

²²Nya kïtöpö Echotyon nko mïkulöwungu. Nya kïtöpö pöropchenyi nko akwa lapay.