Read pokoot TITO 1 Bible Online

TITO 1 - pokoot bible

TITO 1

¹Ani Paulö mötworinto Tororöt achï kiyoktoghinto* Yeso Kristo,* nyo kakirï palalyantanï. Kikïkïlanïn akeyoktanïn owö angarak kighanata pipö Tororöt cho le löwönkachi atanet chane ngala man pö ngölyonto Tororöt nko konyït nyo kïkonyïtöy Tororöt,

²nyo rïpöy kegh nko kikönöto söpon pö kokay. Kiyomiswecha Tororöt, nyo mömïrönye putintön söpononi kïngeta otini le towunöt,

³kïkany kwitïta osiswö cho kitat nyinte, kïngongwecha ngölyontenyi. Kingongwanïn ngölyontononi amta kïrïp kegh nko kiyomisöto Tororöt, Ghetintenyo.

⁴ Okirchinan Tito, nyo le werïnyan nyo pö nyoman ompö kighanatanini kïghömtocha tïkwïl. Nya kïkoninyi Tororöt Papo nko Kristo Yeso, Ghetintenyo pöropchö nko kalya.

⁵Kyopïsyinyi Krete atesata lasiny tïkwïn cho roko kegh, aikïl poy cho ghyongchini kanisen cho mi kanastin löwïr, lenyini kyomwowunyi.

⁶ Mïchini poyonto kanisa kïtöpö kïpuryö lelut, chi nyo tïng korka akonga, mïchini monechi tïkwïl kïtïngeti kighanat, merokonye kelïmchï chane ghöyityö anta tighintön.

⁷Ompöwölo kiketö kintöghoghinto kanisa kughyongchï pöghisyo Tororöt, kïmïchini nyinte kïlïkwï chi nyo puryö lelut. Melö mïchini kïlïkwï chi nyo anta kwolöy kegh chi nyo mïrmïr möt, anta tömösin, anta köromit, amelö chi nyo pïrchini ropïyen.

⁸Wölo mïchini kïlïkwï chi nyo toköy to, akïchömöy kïgh anka tïkwïl nyo karam, mïchini kïlïkwï chi nyo pöytoy kinonutkachi, nyo pö man, nyo tïlil akï nyo pïröy kegh.

⁹Mïchini kïrïp lasiny ngölyonto kighanat nko kinetut cho kikinet nyinte. Tökumï nyu nyinte kukil pikö walaka kïrïp kinetut pö man, akuporchï pich cho mölöy kinetutchï lelutkökwa.

¹⁰Ompöwölo mi pich cho chang, ntökïmïr tya rwakan cho pö ara mutat, cho le penyï akïlïsï cho ngölönöy kwïle.

¹¹Mïchini ketagha chane kïngalan, ompöwölo köpechï kïwaghach pipö keston kïmïkul ompö tïkwïn cho melö kömïchini kunetöy atökïsïch ropïyeni arasï.

¹²Kimwa chitöngwa akong nyo kingwïno Krete nyo kile werkoyon ngala man ato kilö, “Putï pipö Krete kïtenö osis, tyonkïn cho le mwokïyis, soson akï chepomutïn.”

¹³Man söwintönonï kïlenyona achila chane lasiny ompö otöpnoni, atökïsïch kighanat nyo pö man

¹⁴akïpïstö tyankoy pö pipö Yaudi nko kiyomisut pö ptangengmötin cho pkono pich cho kikïpïstö ngala man.

¹⁵Tïlil kïgh anka tïkwïl ompö pich cho tïlilöch, wölo möminye kïgh nyonikïny nyo tïlil ompö pich cho le sïmnyon cho puryö kighanat, ompöwölo kikesïmnyon kinonutkökwa nko pköchintöngwa.

¹⁶Lenchini kegh chane kinkït Tororöt, wölo ompö ighisyewutkökwa kï kikïtagh nyinte. Pich cho nyïghïtat kireyata, akï tighï nyo melö mïchini pöghisyö anka tïkwïl nyo karam.