Read pokoot TITO 2 Bible Online

TITO 2 - pokoot bible

TITO 2

¹Wölo neta nyo le nyi ngal cho pö tösunöt ompö kinetut cho karamach.

²Inet poy cho kayetu kïrïp kegh, kïlïkwï cho tïng konyït akï cho chïreröch. Mïchini kïsïch kighanat nyo roko nko chomnyogh, akïmïkukonchö.

³Neta tïkwïl kor cho kayetu kïtïpï kïrïp kegh nko wölo töptoy korï cho tïpisot otöp nyo tïlil. Mömïchinicha chane kuswomöy pich anta cho sekeyi kumïn. Mïchini chane kunet kïgh anka tïkwïl nyo karam,

⁴atökumï kunet kor cho mïnkech kïcham santïnekwa nko monekwa.

⁵Kïlïkwï cho pïröy kegh, cho tïlilöch, cho pöghisïyi ompö korikwa nyo karam, akï terchini santïnekwa, atömökïsas ngölyonto Tororöt.

⁶Inet tïkwïl chumwak kïpïr kegh,

⁷akwompö kïgh anka tïkwïl lïkune körkeyïn nyo karam ompö chane. Iparta otöp nyo puryö lïsat ompö kinetatengu.

⁸Ipöghisyeghö ngal cho isunate, cho puryö kigheghchin, atökutö punköku arasï atö lentöy kïngölononecha ngal cho ghach.

⁹Mïchini sekey kïkonyït yetïntinekwa akupaypay chane ompö kïgh anka tïkwïl, amerokonye kumölomöl kegh tïkwïl,

¹⁰anta chora tïkukwa. Wölo mïchini kuparta kegh lö pich cho tölose akughönote, atökïsïch kinetut pö Tororöt Ghetintenyo salat ompö or anka tïkwïl.

¹¹Ompöwölo kikuporï Tororöt pöropchenyi nyo ipchini pich löwïr sörunöt.

¹²Netecha pöropchonï kepïstenö otöp nyo mökonyïtönye Tororöt nko möchut pö ngwïnyinï, atöketïpinö ompö or nyo konyïtöy Tororöt ompö ngwïnyinï pö ye,

¹³otini kïmïtecha keköngöy Asis nyo soyönote, otini kiporu ororyo tororötïnyo nyo wow tya nko Ghetintenyo Yeso Kristo.*

¹⁴ Kikonï kegh nyinte tökïsörunenecha ghöyityö anka tïkwïl akutïlilecha, cho le pikachi kegh, cho tïng machat kwigh pöghisyewut cho karamach.

¹⁵Kilenyona mwochinö pich ngalechï, aipöghisyeghö owesyengu kïmïkul ikil pich aichil. Mepisyï chi anka tïkwïl kïsasïnyi.