Read pokoot TITO 3 Bible Online

TITO 3 - pokoot bible

TITO 3

¹Nonchinö pich kïtech soch, kïlïkwï pich cho konyïtöy pöytoghï akïtïpï kïpsach kwigh pöghisyö anka tïkwïl nyo karam.

²Imwochï chane tömöngalana chi anka tïkwïl nyo gha, wölo kilïkwï pipö kalya, cho tölose, cho porchini pich lapay otöp nyo karam.

³Ompöwölo kikïchicha köny sölwöy, pich cho le tïghï, cho kimasta. Kikïchicha sekeyiko möchutköcho cho pö pïrchin. Kikïtïpicha ompö ghöyityö nko nyonyintön, kireyecha pikö walaka, akereyacha chane tïkwïl.

⁴Wölo otini kirumï köromnyö nko chomnyo Tororöt Ghetintencha,

⁵kïsörwecha nyinte. Melö ompö pöghisyewut cho karamach cho kikighacha, wölo kïsörwecha ompö kisyonötenyi nyinte kegh, ompö kiwunöto yiyö nyo rel nko söpon nyo konecha nyinte ompö ara Mïkulögh nyo Tïlil.

⁶Tororöt nyo kiyinwecha Mïkulögh nyo Tïlil kïnyïghï ompö ara Yeso Kristo* Ghetintenyo,

⁷atökemuka kelinyenö nko Tororöt ompö pöropchenyi tökesïkö söpon pö kokay nyo kïmitö kekönöy.

⁸Pö man ngölyontonï. Amöchan chïchïmanyi lasiny ngalechï tökumï pich cho kikughan Tororöt, kwigh kegh ompö pöroyïn anka tïkwïl nyo tökwigha pöghisyewut cho karamach cho tïng kinyiwut ompö pich löwïr.

⁹Wölo kïrenö kegh kimölöto kegh cho pö sölwontön nko tötut pö pïnwöy nko syölut nko kimölöto kegh pö ompö kirurut. Melö pö kinyiwut ngalechoni nyonikïny.

¹⁰Rirchinö chi nyo ipu pesyogh kïnyïl odeny, atomalïmnye, ipïstö.

¹¹Inkïtönyi lö kikupot chi nyo latanyoni, akuporu ngokichi lö kikupot chichoni nyo mötïny.

¹² Ato oyokunyi Artema anta Tukiko, imukyï nyoman ingwïn Nikopoli wölo omitan, ompöwölo kamachan angwïn otöpö wöloni osiswo kaghïtan.

¹³ Ingarak Sena konetinto kirurut nko Apolo tökutor rutogh lawel tömörörchï kïgh anka tïkwïl ompö or.

¹⁴Mïchini kunet kegh piköcho löwïr kwigh pöghisyewut cho karamach, tökïpöghisyeghö kungaraka pich cho tïng möchut ompö lawel. Merokonye kïtïpï chane otöp nyo puryö kinyiwut.

¹⁵Ketakwesinyi pich lapay cho omitan tïkwïl, itokwesï kongotichan ompö ara kighanat lapay. Nya kïtöpö pöropcho Tororöt nko akwa löwïr.