Read pokoot PILEMON 1 Bible Online

PILEMON 1 - pokoot bible

PILEMON 1

¹Ani Paulö nyo omi chela ompö pöghisyo Kristo* Yeso nyo kakir palalyantanï nko werïnyo Timoteo. Ompö kongencha Pilemon nyo kïpöghisïyi tïkwïl,

² nko kanisa nyo nyoryegho kongu nko cheptöncha Apia nko Arkipo nyo le askaryon nko acha nyo kïpöghisïyi tïkwïl.

³Nyo kïkonokwa Tororöt Papo nko Echotyontenyo Yeso Kristo pöropchö nko kalya.

⁴Werïnyo Pilemon oyokyinan Tororötïnyu söro osoghöy ononinyi kïnomnyö otini omitan.

⁵Ompöwölo ochan lïmate chomnyengu nyo itïngetenyi ompö pipö Tororöt löwïr nko wölo wowtö kighanatengu ompö Echotyon Yeso.

⁶Osoghan lö, tökoninyi nyoryencha nko nyi le kighönï kimukat tenyorunö kinkïtöt nyo wow nyo pö kisoyönöt anka tïkwïl nyo kakïlïkwï nyinyo otini kikelinyecha nko Kristo.

⁷Werïnyo, kökonanïn chomnyengu ngörekyö nyo wow akukilanïn nyoman, ompöwölo keghanyi mïkulis pö pipö Tororöt kïturonchö.

⁸Kïlenyona nyu, kömowöghanye omwowunyi le werïnkwa ompö Kristo, lö, igha kïgh ompö lasïma.

⁹Wölo ompö chomnyogh, kasïwan lö mïchini osominyi lö ighwante kïyoni. Kosomön lenyoni kïrkegh kochan ante Paulö, ngöloninto Kristo Yeso akï nyo omi ye chela akwompö parakunyi.

¹⁰ Kïlenyona, osominyi kingörokut ompö Onesimo nyo le werïnyan ompö Kristo, ompöwölo kyalïkwan kwanta ompö ara mïkulögh omitan chela.

¹¹Onesimo nyaye kimi ato kimötïngnye kinyiwut ompö nyi, wölo tïng nyinte otï le ye kinyiwut ompö nyi nko ani tïkwïl.

¹²Koyokwan ye nyinte kïmïla wöloni imitenyi, wölo mi nyinte mïkulöwunyan.

¹³Kötomökan otöpo nko nyinte kungarakanïn nyinö kötengörokaninyi otï tomitan chela ompö pöghisyo Lökoy cho Karamach.

¹⁴Wölo melö komökan omwoghöy lö ngaraka ompö lasïma, wölo le wölini kechamanyi nyinte. Kïlenyona moghanye kïgh anka tïkwïl ompö ngölyontononi ato mechamanyinye.

¹⁵Töptoy ana kipïstinyi Onesimo osis cho ngörï atömanyïl kïmïla kïtöpö nko nyi kokay.

¹⁶Akï ye meyit Onesimo lö sekeyon pat, wölö tïlöy sekeyon ompöwölo werïnyo nyinte nyo chamate ompö Kristo. Pö kinyiwut nyinte nyo wow ompö ani, wölo wow tya kinyiwutyenyi ompö nyi, le sekeyon akïle nyo otupchö ompö Echotyon.

¹⁷Kïlenyona nyu ato iyitaninyi le chi nyo kightoy pöghisyenyo akonga, itach nyinte lenyini ketochaninyi.

¹⁸Ato mi kïgh nyo kilelunyi anta nyo ighokenyi, ikany kutöngwanïn lapay.

¹⁹Kakiran ye nyu ante ompö ewunechu lö, ani Paulö nyo oghoku. Alentan inkïtönyi lö ichinyi nyinte pösöntanyan ompö söpontangu kegh.

²⁰Kïlenyona, werïnyo, kaykay ngarakante ompö ngölyontononi atö kukusa kaynata Echotyon. Kïle otini ichinyi werïncha ompö Kristo, igha mïkulöwunyan kïturön!

²¹Otïngetan man otini omitan okiröy ngalechï lö, ighenyi lenyini kosominyi ankïtön ompö lö, ighenyi walaka cho tïlöy choni kosomön.

²²Mi kitö anka nyo osoman, kaykay ighwante wölo orïwöy, ompöwölo okönan lö, ompö sowutkökwa lapay yokwanïn Tororöt angwïn wöloni omitekwa.

²³ Ketakwesakwa Epapra nyo mi chela nko ani ompö Kristo Yeso.

²⁴ Ketokwesï pich cho kïpöghisïyecha tïkwïl, ompö Marko, Aristarko nko Dema nko Luka.

²⁵Nya kïtöpö pöropcheto Echotyontenyo Yeso Kristo nko akwa lapay.