Read pokoot EPRANIA 1 Bible Online

EPRANIA 1 - pokoot bible

EPRANIA 1

¹Kingalan Tororöt könyisyok kïnyïl cho chang nko papotïnecha kuwerï ortïn cho chang akïngalan kuwerï werkoy,

²wölo ompö osiswechï pö söröm kïngölonöy nko acha kuwerï Werïnyi nyo kigh ngwïny ompö nyinte akwigh nyinte kïlïkwï mïlinto tïkwïn löwïr.

³Nyinte nyo le kwörkwöryö nyo pö ororyo Tororöt akï nyinte nyo le körkeyïn pö Tororöt tighöy tïkwïn löwïr ngölyontenyi nyo pö owesyö kiwö nyinte kïtöpunö ewu tagh nyo pö wowïn pö Tororöt otini kiwany kutïlilöy pich ompö ngokikwa.

⁴Wow Wero Tororöt kïsir malayken, kïle wölö kitöntö Tororöt nyinte kaynat nyo siröy kaynötutkökwa.

⁵ Ompöwölo kimömwochïnye Tororöt malaykayantenyi ompö nyo le akonga lö, “Ichinyi Werïnyan, kalïkwan asisï Papongu.” Akimömwochïnye Tororöt malaykayan anka tïkwïl lö, “Olïkunan Paponyi, atökïlïkwï nyinte Werïnyan.”

⁶ Kïkany otini kiyonï Tororöt Werïnyi nyo le poret kungwïn ngwïny, kïlö, “Akanya kïsagh malaykeni Tororöt tïkwïl nyinte.”

⁷Kïkany kïparta malayken, kïmwa Tororöt lö, “Ighöy Tororöt malaykenichi kïlïku yomöt, akwigh mötworichi kïlïkwï lyopötino ma.”

⁸Wölo kimwa Tororöt kïparta Werïnyi lö, “Pö ngacharengu nyo pö paytagh we Tororöt kokay nko kokay. Paytaghpa man kï paytaghto pöyunötengu.

⁹Ichömenyi man, ireyenyi ghöyityö, nka nyoni kakïlïnyi Tororöt, tororötïngu akuyileninyi mwaghpa ngörekyö kïsir kongotïneku.”

¹⁰ Akïmwa ngat lö, “Kipintitanyi ngwïny otini le towunöt, we Echotyon, akï moriku cho kigh yïm.

¹¹Weröy choni, wölo itöponenyi kokay, wïrsot löwïr le sïra.

¹²Imömönenyi chane le ananka, akewaghach le sïra nyo kiloköy. Wölo ilatenyi nyoni kokay amewonsotcha könyisweku.”

¹³ Kimömwochïnye Tororöt malaykayantenyi ompö nyo le akonga lö, “Töpenö ewunyan nyo pö tagh ntökïtenö otönön punköku ngwïnyito kelyeku.”

¹⁴Mömïkulisnye so chane cho kikïyonï kïpöghisyechï pich cho nyoru sörunöt asïyech?