Read pokoot EPRANIA 10 Bible Online

EPRANIA 10 - pokoot bible

EPRANIA 10

¹Ompöwölo ki rurwö kwïle kirurut cho pö tïkwïn cho karamach cho melö körkeyïn lasiny nyo pö ngale chunö le chane. Memukönye nyu amörostinechoni kïroptoy osis löwïr ompö könyi anka tïkwïl ntökwigh pich cho soghöy kïtïlilöchitu.

²Ntökile nyinö kikigh pïchoni kisoghöy Tororöt kïtïlilöchitu lö chïkïl, tömelö kitötökilïmchini kegh lö kïtïng ngokï ngat, akitömelö kitötökïmi ngat machata amörostinechoni löwïr.

³Wölo amörostine choni kiroptoy ompö könyi anka tïkwïl atökunonchï pich ngokikwa.

⁴Ompöwölo memuköcha kisön pö kir nko ngaror kïchengöy ngokï.

⁵ Nka nyoni nyu otini kingwïnöy Kristo* ngwïnyinï kilenchï Tororöt, “Melö imökenyi amöros anta ropöw, wölo keghwaninyi por.

⁶Kimengörökyinyinye ropöw cho kïpelöy anta tïsöw cho chengöy ngokï.

⁷Atolapay olan, ‘Kangwïnan omitan yi, tagh machatengu we Tororöt, kïrïp kegh nko wölo kikikirta ngalechan ompö kitapu Kirurut.’ ”*

⁸Kinya kïmwa tagh lö, “Kimemökenyinye anta ingörökyï amörostin ant ropöw, cho pö kyak anta cho kïpelöy cho chengöy ngokï.” Kimwa lenyoni kïrkegh kikitötoy ropöwechete kïrïp kegh nko kirurut.

⁹Atolapay kïtas kïmwa lö, “Kangwïnan atagh machatengu.” Ompö atoni nyu, poru lö, kikïwaghach Tororöt amörostin walaka cho kipö tagh akukera Kristo.

¹⁰Akwompöwölo kigh Yeso Kristo machata Tororöt kutötö kegh kïlïkwï amöros nyo pö ngoki pich kïnyïl akonga akïmïchï ketïlilecha ompö ngokicho.

¹¹ Akiwetöy tïsinto pipö Yaudi anka tïkwïl kïsoghöy asis anka tïkwïl akutötoy amörostinechaye kïnyïl cho chang, amörostin cho memuköcha kïmis ngokï.

¹² Wölo kikonï Kristo amöros akonga nyo pö ngokï amöros nyo mïchini kokay atolapay kïwö kïtöpunö okumpö tagh nyo pö Tororöt.

¹³Mi ye nyu kïköngisïyi wölini ntökïtenö kutö Tororöt pungkachi ngwïnyito kelyechi.

¹⁴Ompöwölo kakwigh nyinte pich cho kitïng ngokï kïtïlilöchitu kokay ompö amörostanyi nyoni le akonga.

¹⁵Konecha tïkwïl Mïkulögh nyo Tïlil söwintönenyi nyo kinya kimwa tagh lö,

¹⁶ “Nyï kï muma* nyo oman nko chane osis cho pkonöy, Mwoghöy Echotyon. Otöninan kirurutköchan mïkulöwekwa, akirchan sïkunötengwa.”

¹⁷ Atolapay kïmwa ngat lö, “Mononanye ngokikwa nko ighisyewutkökwa cho ghach nyonikïny.”

¹⁸Ato kakengongoghta ngoki pich, kïmökïminye nyu machata nyo kitötoy konut cho pö ngokï.

¹⁹Kïlenyona nyu tupchenichu, kakekonecha kimukat nyo kïlïto Wölo Tïlil Tya* ompö kisön pö Yeso.

²⁰Kiyotwecha nyinte or nyo rel nyo pö söpon kuwer ananka nyo kingotyot nyoni kï portanyi kegh.

²¹Nyo kïtïngetecha ye nyu tïsin nyo rumunote nyo pöyu Kö pö Tororöt.

²² Akanya nyu kerika wölo mi Tororöt ompö mïkulögh nyo pö man nyo tïng kighanat nyo mötïngnye tomtomönöt. Kaketïlilwecha mïkulisköcho kïngetunö sïkunöt nyo gha akemwata porwöyicha pögh cho tïlilöch.

²³Kenama nyu lasiny mwaghateto kikönötenyo nyo kakeghan ompöwölo ghanate Tororöt nyini kiyomisï.

²⁴Kekilö nyu kegh akany kïsïnga chi ngaleko chitö anka ompö kingarakata kegh akeparta chomnyogh akegh nyo karam.

²⁵Amökepïstö otöptönyo nyo pö nyoryogh kïle wölo kipïstö pikö walaka. Nyo kötölïku nyona, kekil kegh lasiny, ompöwölo karich kwitï asispa Echotyon.

²⁶Ompöwölo ato kïkwötyicha keyokyï kegh ngokï otini kakesöwucha ngölyonto man, kïmökïminye nyu ngat amöros nyo ngokï,

²⁷ nyo köngötï nyu kï kirwoko Tororöt nyo pö otyogh nko ma nyo ngwan nyo ngwïnöy kuwuröy pich löwïr cho möterchinicha nyinte.

²⁸ Kikïpar kïpuryö kisyonöt chi anka tïkwïl nyo kimarïpnye Kirurut pö Musa otini kirumï söwï cho pö pich odeny anta sömök.

²⁹Anane nyu lasiny lö nyarïl nyo ngwan kïtya nyo sïköy pich cho sösöy Wero Tororöt akïsas kisön pö muma Tororöt cho mwöto pich ngokï akuswom Mïkulöwu Tororöt nyo ipu pöropchö.

³⁰ Ompöwölo kinkïtöcha nyinte nyini kimwa lö, “Kitakat kï nyinyan, oghoktonan,” akïlö ngat, “Rwokyini Echotyon pikachi.”

³¹Möminye kïgh nyo gha tya kïsir atosïkö chi kirwok Tororöt nyo satate!

³²Anane otöptönkwa nyo kipö tagh. Kyowongunekwa tïkwïn cho chang osiswechoni kïtenö osïkökwa löpoyïn pö Tororöt, amöminye kïgh nyo kipölokwa.

³³Kikimwaghakwa ompö tawu pich akeghapghapekwa kïnyïl cho chang wölo amukakwa tonyoryö nko pikö walaka cho kikinyaril kong le akwa.

³⁴Kyaghamakwa nyarïl nko pich cho kikïrat. Otini kimasenokwa pich tïkukwo, opïstekwa ompö ngörekyö, ompöwölo kyonkïtökwa lö, otïngetekwa tïkwïn cho karamach tya ompö yïm akï tïkwïn cho tïpiyot kokay.

³⁵Mopïstö nyakanatengwo ompöwölo tïng ropöwon nyo wow.

³⁶Mïchini omïkukönökwa atamuka agha machata Tororöt, tonyorunö kini kikiyomisï.

³⁷ Ompöwölo mwoghöy Kikirut lö, “Tomönye kite, kwitï nyinte nyo ngwïnöy ameropunye.

³⁸Wölo möngöy mötworintenyan nyo tïlil ompö kighanat, wölo ato mïla nyinte löt, kïmongörökyinanye nyonikïny.”

³⁹Wölo melö kichicha pich cho kïmïlisot löt akepotyö, puryö kïtïngetecha kighanat akesörwecha.