Read pokoot EPRANIA 13 Bible Online

EPRANIA 13 - pokoot bible

EPRANIA 13

¹Nya kulet tagh chomnyogh kwenunkwa lenyini kïmökyino kighönï.

² Mowutyeghö takata to ompöwölo, kigh pikö walaka lenyoni ntökïtach malayken, amenkïtcha.

³Anana pich cho rötote, ayit kegh tïkwïl lö ochikwa rötote nko chane, anan pich cho kichopöy kong oyit kegh kïle ato oghömekwa kichopatanoni nko chane.

⁴Mïchini kïkonyït pich tïkwïl kensyö osis löwïr, mïchini kumpur ngetot nko korukwa ompö kighanat, ompöwölo rwokyini Tororöt pich cho le cheporestin kalomok.

⁵ Malïkwï pich cho chömo kegh ropïyen akanya kïmïchok tïkukwo cho otïngetö. Ompöwölo lentöy Tororöt, “Mopïstoninyinye kokay anta apakadinyi.”

⁶ Kesïkö nyu nyakanat akemwagh lö, “Echotyon nyo ngörokanïn mowöghisïyanye. Ighwanïn ne chi?”

⁷Anan kintöghoghikwa cho kipö tagh cho kyomwokwa ngölyonto Tororöt. Anane wölo kitöptoy chane, atarïpa kighanatengwa.

⁸Karkegh Yeso Kristo* omötu nko ye nko kokay.

⁹Makany kwighak kinetut cho le to opotyenö. Ompöwölo karam tya kïchïchïma mïkulöwekwa pöropcho Tororöt, melö ompö kirurut pö omisyö, ompöwölo kimengarakcha kirurutchoni pïchoni kimi kïrïpöy nyonikïny.

¹⁰Kikïtögho tïsï cho kipöghisyegho emeni pipö Yaudi kwam amöros nyo kimi watwa.

¹¹ Kipu Tïsin nyo Wow* kisön pö kyak Wölo Tïlil Tya,* atökutötö kïlïkwï amöros pö ngokï, wölo kikïpela panyeko kyakichoni sanypa kanasyan.

¹²Nka nyoni kïyoni kigh Yeso tïkwïl kikinyaril nyinte ompö sanypa kanasyan atökumï kuwunö pich ngokikwa ompö kisönkachi kegh.

¹³Kepe nyu sanypa kanasyan wölo mi nyinte atökepara arasï nyo kisïch nyinte.

¹⁴Ompöwölo mökïtïngetechanye kanasyan nyo mi ngwïnyinï nyo ngötu. Kïmitecha kekönöy kanasyan nyo ngwïnöy.

¹⁵Kesala nyu Tororöt osis lapay ompö ara Yeso, salatanoni nyo tötoy pich lapay cho kikughan kaynenyi.

¹⁶Mowutyeghö oghchï pich nyo karam angarak kegh akwane, ompöwölo amörostin cho lata choni cho chömöy Tororöt.

¹⁷Oterchinö kintöghoghikwa arïp kiyomisutkökwa. Ripokwa chane kïnomnyö akï chane cho porchini asïyech Tororöt wölo kida chane ighisyengwa. Ighöy chane ighisyengwa ompö kwïskwïsyö ato oterchikwa chane anta mölenye nyoni kwigho nyarïl akï möminye kinyiwutyö nyo osïkonekwa ngalechoni.

¹⁸Osoghwecha kïtïngetecha sïkunöt nyo karam ompö kïgh anka tïkwïl akepïrchinecha kegha nyo karam kïnomnyö.

¹⁹Osomokwa nyoman lö osoghwante Tororöt, atorutowan korenkwa lawel.

²⁰Nya kwighakwa Tororöt pö kalya otïlilitunö ompö köromnyö anka tïkwïl nyo kigh Echotyontencha Yeso nyo le Mösöwonto kechir nyo Wow ompö areto meghenyi kututunö wölo mi cho kimeghö akukïninieghö nyoni muma* nyo pö kokay.

²¹Nya kïkonok Tororöt pö kalya kïgh anka tïkwïl nyo omökekwa atamuka agha machatenyi, nya kwigh nyinte kïgh anka tïkwïl nyo tenate ompö ara Yeso Kristo. Nya kïpöyit Kristo ororyö kokay nko kokay! Amen.*

²²Osomokwa ye nyu, tupchenichu lö atere lasiny ngalechï ipu kikilöto kegh, ompöwölo makiranye palalyan nyo kogh tya.

²³Omökan onkïtunekwa lö kiketyokunö werïnyo Timoteo chela. Ato ngwïn lawel, ongwïnan nko nyinte otini orutoghchinokwa.

²⁴Otokweswecha kintöghoghikwa lapay nko pipö Tororöt kïmïkul. Ketakwesakwa tupchenicho cho pkono Talyan.

²⁵Nya kïtöpö pöropcho Tororöt nko akwa lapay. Amen.