Read pokoot EPRANIA 3 Bible Online

EPRANIA 3 - pokoot bible

EPRANIA 3

¹Tupchenicho cho ochï pipö Kristo cho kikurok Tororöt! Anan Yeso, nyo kiyokwï Tororöt akï Tïsin nyo Wow* nyo pö kighanat nyo kïmwotïtoy.

² Kïlïkwï nyinte nyo kighönöy ompö Tororöt nyo kikïl nyinte kwigh ighisyenyi, le wölo kighanate Musa ompö ighisyo Kö pö Tororöt* kïmïkul.

³Kitöni konyït nyo wow tekinto kö kïsir kot nyinte. Kïlenyona nyu, tïng Yeso ororyö tya kïtïl Musa.

⁴Ompöwölo teköy chi anka tïkwïl kö wölo Tororöt nyo le tekinto tïkwïn löwïr.

⁵Ki mötworin Musa nyo kikighönöy ompö Kö pö Tororöt kïmïkul, akïngalana ngal lapay cho mwowu Tororöt ato le asïyech.

⁶Wölo ghanate Kristo Wero Tororöt nyo kikitö kughyongchï ato paponyi Tororöt. Kïchicha konyi ato kïripöcha lasiny nyakanatenyo nko kikönötenyo ntökwit söröm.

⁷Nka nyay mwoghöy Mïkulögh nyo Tïlil lö, “Ato alïmakwa kutinyi asete,

⁸makany kwoghïghöchitu mïkulöwekwo, le cho pö papotïnekwa, asisanya pö kityamata surkwen.

⁹Wölo, kitönineghenanïn papotïnekwa tyamat akïtatapanïn, kïrkegh kisïwa chane tïkwïn cho kyaghan könyis tömönut angwan.

¹⁰Ompö atoni nyu onörekyan pïnoni amwaghan lö, ‘Mostoy kokay kinonutkökwa akïtomöcha kunkïtï chane ortïnechan nyonikïny.’

¹¹ Kyanarekan, aman muma lö, ‘Mölïtöcha chane kor wölo kötösïko kimungötenyan.’ ”

¹²Orip kegh tupchenichu, tömötöp ntökïrumunö chi kwenunkwa nyo tïng mïkulögh nyo gha nyo puryö kighanat nyo ighöy nyinte ntökïpïstö Tororöt nyo söpöy.

¹³Wölo achila kegh akwane osis lapay, otini kïnye tökemwowunenecha Kikirut lö asisï atömörumï chi ompö akwa nyo kolöy ompö lïsata ngokï.

¹⁴Ompöwölo kichicha ghömote nko Kristo ato kïnamacha lasiny kikönötenyo nyo kikïtïngetö otini le tagh ntökwit söröm.

¹⁵ Mwoghöy Kikirut lö, “Ato alïmakwa kuti nyi asete, kïmakany kwoghïghitu mïkuliskökwo le wölo kigh papotïnekwa atanya.”

¹⁶ Ekwompö ngo choni kilïm kuti Tororöt akïpeny? Möpïchonicha lapay kimïtuna Musa Misri?

¹⁷Akwompö ngo choni kinörekyï Tororöt könyis tömönut angwan? Möchanecha löwïr cho kigh ngokï, akï chane chay kimeghö kusyewa ompö surkwen?

¹⁸Ngo chï kyomchï Tororöt muma nya lö, mölïtöcha kimïnytanyi, möpïchonicha kipeny ngala Tororöt?

¹⁹Ay, kïsïwïyecha nyu lö kimemïcha chane kïlïtöy wölini ompöwölo kimötïngcha kighanat.