Read pokoot EPRANIA 6 Bible Online

EPRANIA 6 - pokoot bible

EPRANIA 6

¹Keleta nyu tagh kerïpa kinetut cho kirïr, akepïsï löt kinetut cho pö tagh cho pö kighanatenyo ompö Kristo.* Mömïchinechanye keyokyinö kegh ngat kitoröto ighisyewut pö kighanat ompö Tororöt nko nyo pö kötogh otini töketïngetenöcha ighisyewutköcho cho kipö tagh cho mötïngcha söpon,

²cho pö kinetut pö kipatisanat nko cho pö kikanaghata morïn, nyo pö kitutunöto pich cho kimeghö nko nyo pö kirwok nyo pö kokay.

³Keleta tagh! Kighecha choni ato cham Tororöt.

⁴Ompöwölo, ato töp pich cho kitach löpoyïn pö Tororöt, akïchamcham ropöwonto yïm, akïsïch ghamtagh nko Mïkulögh nyo Tïlil,

⁵akïchamcham onyïnio ngölyonto Tororöt nko owesyo pöyunöt nyo ngwïnöy,

⁶atolapay kïpïstö kighanatengwa, kïmökïminye nyu or ngat nyo kiyokuno chane tökïkötö, ompöwölo köwudochï chane Wero Tororöt kimurtöwon akurat nyinte ompö tawu pich.

⁷Ompöwölo par nyo kigha rop kïnomnyö, akwigh onkïy akwa cho tïng kinyiwut ompö ngorin kï nyo kikusoyön Tororöt.

⁸ Wölo ato pita paranoni kato nko ratok, kïmötïngnye kinyiwut. Karik paranoni chïpötö akwoto mi löt kepelo ma.

⁹Wölo kïrkegh kakïmwaghacha lenyoni chamankacho, ketïngetecha kikönöt nyo wow ompö akwa. Kinkïtöcha lö kyosïkökwa kisoyönöt nyo karam tya nyo pö sörunötengwo.

¹⁰Pö man Tororöt nyo möwutyeghonye ighisyenkwa nyo pö chomnyogh nyo kyaghakwa ompö kaynenyi, ompö kingarakat nyo kyoghchikwa pipö Kristo akïtomitenökwa oghchine chane.

¹¹Wölo kïtïngetecha machat akonga lö tenoghyö chi anka tïkwïl ompö akwa ntökwit sörömuto söpontanyi, ntökwitïta ngalechoni omitekwa okönöy.

¹²Malïkwï körsong, wölo okil kegh, arïp pich cho kighan akïmïkukön atomi söröm kïnyorï tïkwïn cho kiyomisyï Tororöt chane.

¹³Otini kiyomis Tororöt Apraam kwama muma kaynenyi lö lïku man kiyomisötenyi ompö Apraam. Akwompöwölo kimöminye chi anka nyo wow kïsir nyinte, kïpöghisyeghö kaynenyi kegh kwama muma.

¹⁴ Kilenchï, “Osoyöninyi nyoman, akoninyi monïng cho chang.”

¹⁵Kïmïkukön Apraam ato mi söröm kïnyorï kïyoni kiyomisyï Tororöt.

¹⁶Otini omöy chi muma, kïpöghisyegho kayneto chitö anka nyo wow kïsir nyinte kegh akï muma nyo kïpöghisyegho tökewanya syala kwenu pich.

¹⁷Kimököy Tororöt kuporu lasiny lö, möwöghökönye nyinte ngölyontenyi ompö pich cho kikuyomisyï nyinte, nka nyoni kïtasa kiyomisötenyi kiwalwalatenyi.

¹⁸Mi nyu tïkuchoni le odeny: kiyomisöt nko muma, memuköcha tïkuchoni ntökïwöghökisyö, amemukönye Tororöt kïmwoghöy putintön, nyo ighecha chï kiketach kiyomisötononi kekile kegh lasiny otini kïmitecha kerïpöy kikönöt nyo kiketö tawuncha.

¹⁹ Lenye kikönötonï nömöwonto söponwecho. Lïtöy kikönötononi ntökurel wölo tïlil ompö Kö pö Tororöt nyo mi yïm.

²⁰ Kinya Yeso kïwö wölini akwompö acha, akïlïkwï nyinte Tïsin nyo Wow* kokay kïrïp kegh nko nyo pö Melkisedek.