Read pokoot EPRANIA 9 Bible Online

EPRANIA 9 - pokoot bible

EPRANIA 9

¹Kitïng muma* nyo pö tagh tötutkachi cho kiporu wölo lata sowut nko ato tïlil wölo kisogho ompö ngwïnyinï.

² Ompöwölo kikigh ema nyo kitöpunö okumpö sany nyo kikïkurö Wölo Tïlil. Kimi ori ket pö kitömöwon nko mesa nko makatyan nyo kiporu lö mi Tororöt yete.

³ Kimi lötuto tote nyo pö odeny eme anka nyo kikïkuro Wölo Tïlil Tya,*

⁴ nyo kitïng watwa cho kikigha koltin ompö ato kïpelo köröstin akïlö Santuku Muma* nyo kikïsïlö koltin woptin löwïr. Kimi orinyi törö nyo kikitanga koltin nyo kimi omisyö nyo kikïkuro mana nko lïpö Aron nyo kisanak sökö nko keronytin cho kikikir kiyomisöt.

⁵ Kimito parakuto santukunoni kerupimtin* ato kïlöstoghchinegho pich ngokï kuporï lö mi Tororöt atoni. Wölo mökimukechanye ye kekentone ngalechoni.

⁶ Lata nyoni wölo kikïtatïta tïkuchoni. Kipetöy nyu tïsï kïlïtöy emanoni pö tagh osis tïkwïl tökwigh ighisyengwa,

⁷ wölo Tïsin nyo Wow* onkït nyo lïtöy eme nyo pö odeny akwighöy lenyoni kïnyïl akonga ompö köny. Akwotini wetöy kïlïtöy emanoni, kwipöy kisön cho wetöy kutötoy ompö ngokichi kegh nko ngoki pich cho kigh.

⁸Netöy Mïkulögh nyo Tïlil lasiny kïngetunö tötutchoni löwïr lö kitomönye keyat or nyo lïtöy Wölo Tïlil Tya* otini kitökughyongöy emanay pö sany.

⁹Körkeyïn pö osiswechï le chicho emanoni. Poru lö memuköcha ropöwo amörostino kyak cho kïroptoy ntökwigh mïkulöwu chichoni soghöy kuten.

¹⁰Pörtoy ngalechoni löwïr kirurut pö omisyewut cho lata gheghsyö nko otöptino tïlilyö. Pö ngalechoni löwïr sany akitökïtïng kinyïwut ntökïtenö kwitï ato ighöy Tororöt tötutkö walaka cho relach.

¹¹Wölo kikwitï ye Kristo* nyo le Tïsin nyo Wow nyo pö tïkwïn cho karamach cho kikwitï. Pöghisyegho nyinte ema nyo karam akutenate lasiny, nyo kimeghanye chi morïn, akuporu nyoni lö möpönye emanoni ngwïnyinï.

¹²Otini kilït Kristo emanoni kïwö Wölo Tïlil Tya, akilït kïnyïl akonga kïpoto, kïmelö kip kisön pö ngaror nko cho pö mogh atökïropta amöros, wölo kip kisönkachi kegh cho kyala sörunötenyo nyo pö kokay.

¹³ Ompöwölo ato kimï kutïlil pich kipispisöto kisön pö ngaror nko cho pö eghin nko aren cho pö mogh cho kikïpel.

¹⁴Wowitu nyu tya tïlilyö nyo kïsïkonecha kisön pö Kristo! Nyinte nyini kikonï kegh kïlïkwï amöros nyo lïpop ompö tawu Tororöt ompö ara Mïkulögh nyo Tïlil nyo pö kokay. Wunöy kisönkachi sïkunöteto mïkulisköcha kïngetunö ighisyewut cho puryö kinyiwut atökemuka kepöghisyechinö Tororöt nyo söpöy.

¹⁵Ompö atoni nyu Kristo nyo le kilinyoghinto muma nyo rel atökumï pich cho kikur Tororöt kïsïch kisoyönöt nyo pö kokay. Nyoru chane kisoyönötononi ompöwölo kima Kristo atökïsörunö pich ngokikwa cho kigh otini kitökïmi chane ngwïnyi mumanay pö köny.

¹⁶Ompöwölo ato wölona mi kiyomisöto mïlata tïkwïn, kï nyo mötïny kwitu meghanoni pö chichoni kiyomisï tïkuchoni.

¹⁷Ompöwölo mötïngnye kinyiwut kiyomisöto mïlata tïkwïn ato tökïsatate chito kïpö tïku kïmïlöy otinö kama nyinte.

¹⁸Nka nyoni ompö muma nyo pö tagh kïmelö kikigh kwïle kïpuryö kisön.

¹⁹Kinya Musa kïmwochï pich löwïr kiyomisutchoni le wölo kikikïrta ompö kirurut atolapay kïcheng kisön pö mogh nko pögh nko puto kech cho pïröch akïpöghisyeghö kamisyan nyo pö ket nyo kïkuro isop* akwisö kitapu Kirurut* nko pikö kïmïkul,

²⁰ kïlentöy, “Chï kï kisön cho kïniniot muma nyo kimwowokwa Tororöt lö okonyït.”

²¹ Akwisö kisönchoni ema nko tïkwïn löwïr cho kikïpöghisyegho ompö saghat.

²² Ompö kirurut, chang nyoman tïkwïn cho kitïlilo kisön, akwoto puryö kemïlta kisön kïmöminye lastagh nyo pö ngokï.

²³Ato kimïchï ketïlilö tïkuchï le körkeyïntino tïpö yïm ompö aranoni, kïmököy nyu tïkuchoni pö yïm amörostin cho karamach tya.

²⁴Ompöwölo kimölïtnye Kristo Wölo Tïlil kikigha morïn nyo le körkeyïn pat nyo pö nyinö pö man, wölo kiwö kïlït yïm tökuparta kegh ompö tawu Tororöt ompö acha.

²⁵Kilïtöy Tïsinto pipö Yaudi nyo Wow Wölo Tïlil Tya kïnyïl akonga kïtïng kisön pö kyak, wölo kimölïtnye Kristo lö tökutötö kegh kïnyïl cho chang.

²⁶Ntökilenyoni kitökichopöy kong Kristo kïngeta otini le towunöto ngwïny. Wölo ye otï karich osiswechï pö löt sörö, kuchumï nyinte kïnyïl akonga kïkonï kegh kïlïkwï amöros nyo löstoy ngoki pich.

²⁷Kïle otino meghöy chi kïnyïl akonga akwoto lapay kïlïkwï kirwoko Tororöt.

²⁸ Kïlenye nyoni tïkwïl, kikonï kegh Kristo kïlïkwï körösyon kïnyïl akonga tökupuktö ngoki pich cho chang. Chumu nyinte nyu panto odeny amelö ngwïnöy tökunoghyechï ngokï, wölo tökïsoru pich cho köngöy nyinte.