Read pokoot YAKOPO 2 Bible Online

YAKOPO 2 - pokoot bible

YAKOPO 2

¹Malïkwï cho okïltoy pich tupchenyu, ato kyaghanakwa Echotyontenyo Yeso Kristo,* Echotyonto ororyö.

²Kemwaghe ya lö, ato lïtï tuyenkwa nyo tïng kaymorispa koltin akuloköy sïro cho pïchighöch akwitï meywon tïkwïl nyo loköy sïro cho kiwïryö.

³Ato oporchikwa konyït chichoni loköy sïro cho pïchighöch, alenchï nyinte, “Mpurö yi karam,” wölo olenchikwa meywontonay, “Ghyongenö otinö,” anta, “Mpurö ngwïny otï le kelyechan.”

⁴Ompö atoni yeo, mökoporukwanye so lö okïltokwa pich ompö kwenunkwa? Amökamwaghakwanye lenyoni kïrïp kegh nko kinonutkökwa cho ghach?

⁵Atere ya, tupchenichu! Kimakïlnye so Tororöt mey ompö ngwïnyinï kïlïkwï sïkön ompö kighanat atökïmïl chane pöyunöt nyo kikuyomisï nyinte pich cho chömöy nyinte?

⁶Wölo kasasakwa mey! Melö so sïkön chay pïrokwa akumïtakwa ka kirwok?

⁷Akï möchanenye so ngat chay ngölono nyo gha kaynanay karam kikïkonokwa?

⁸ Oghekwa kïgh nyo karam ato arïpakwa kirurutyo pöyunötononi nyay lentöy, “Chama pöroryengu le wölo ichömtonyi kegh nyinte.”

⁹Wölo kaghakwa ngokï ato opechikwa okïltö kegh akwane akurwokinokwa Kikirut lö, ochikwa lelote.

¹⁰Ompöwölo chi anka tïkwïl nyo ripöy kirurut löwïr akïpeny akonga kïkapeny kirurutchoni löwïr.

¹¹ Ompöwölo Tororöt nyini kimwa lö, “Megh cheporesnan,” kï kimwa tïkwïl lö, “Mepar chi.” Kïlenyona nyu, ato meghanyinye cheporesnan wölo iparanyi chi, kï kepenyanyi kirurut.

¹²Amwagha nyu agh le pich cho kirwokinegho kirurut cho tyoköy pich.

¹³Ompöwölo ato rwokyini Tororöt pich mesyonchininye chi nyo mötïngnye kisyonöt. Wölo rïntoy kisyonötö kirwok.

¹⁴Tupchenichu, nyiwu ne ato lö chi otïngetö kighanat, amelö poruno nyinte kighanatanoni ighisyewutkachi? Muköy so kighanatanoni kïsöru nyinte?

¹⁵Kemwaghe ya lö mi tupchenyo nyo mötïngnye sïra anta omisyö nyo mïchini.

¹⁶Nyiwu ne ato olenchikwa chane pich cho lata choni, “Arota nyo karam, onyorï lölöngnyö, apïghyö.” Ekungöroköy ne ato motönökwanye chane möchutkökwa choni pö por?

¹⁷Kïlenyoni tïkwïl, kighanat nyo mötïngnye ighisyewut, kï kikïma.

¹⁸Wölo muköy chitö anka kïmwa lö, “Itïngetenyi kighanat, otïngetan ighisyewut,” Oyokchinan chi nyo mwoghöy lenyoni lö, “Porwante kighanatengu nyoni puryö ighisyewut, atoporun kighanatenyan ompö ighisyewutköchan.”

¹⁹Olentan ighönenyi lö akonga Tororöt nya? Owöy, man, lenye nyoni! Wölo ghönöy oy tïkwïl lenyoni akïpotonchö ompö kiwaghat.

²⁰Wechï ichinyi sölwö! Imökenyi keporunyi so lö, möminye kïgh nyo nyiwu kighanat nyo puryö ighisyewut?

²¹ Kimuka lö ne keyityï paponcha Apraam man ompö tawu Tororöt nya? Ompö ighisyewutkachi, otini kicham kutö werïnyi Isak watwa kïlïkwï amöros.

²²Mesïwïyenyinye so lö kinomnyotö kighanatenyi nko ighisyewutkachi? Kiten kighanatenyi ompö ighisyewutkachi,

²³akïpïntö Kikirut nyo lentöy, “Kighan Apraam Tororöt, akwompö kighanatenyi nyoni, kumuka keyit nyinte lö chi pö man.” Kïlenyona kikïkur Apraam lö kongo Tororöt.

²⁴Kasïwekwa ye nyu lö kiyityini chi man ompö tawu Tororöt ompö ighisyewutkachi amelö ompö kighanatenyi onkït.

²⁵ Kikiyityï lenyoni man ompö tawu Tororöt Raap nyo kile chepores ompö ighisyewutkachi, atanya kitach pipö Yaudi cho ki le ghotï atolapay kungarak chane kïpechï kegh kuwer are anka.

²⁶Kïlenyona, kïle otini kima por nyo mötïngnye mïkulögh, kï kikïma kighanata nyo mötïngnye ighisyewut.