Read pokoot YAKOPO 3 Bible Online

YAKOPO 3 - pokoot bible

YAKOPO 3

¹Tupchenichu, makany kïchangit konetï ompö kwenunkwa, ompöwölo onkïtökwa lö kirwokyinecha tya cho kïchï konetï kïsir pikö walaka.

²Kighecha lelut cho chang kïnomnyö. Nyo ato malelnye chi ompö ngalanatenyi, kutenate chichoni akumuköy nyinte kïpayta portanyi kïmïkul.

³Kiyinecha kutïwa angoletin karïn cho ngösyömöy atö kwigh lenyini kïmökecha, akemukecha kewöghöke porwöyikwa kïmïkul kutang wölini kïmökecha.

⁴Arose tïkwïl meli, nyo kïrkegh kö wow kïtya, akïkïrkegh kökutöy yomöt nyo wow kïtya, wölo kimuköy kewöghöko mïkang nyo mïnïng tya kïwö wölini kömököy chichini ipöy nyinte.

⁵Lenye nyoni tïkwïl ngalyap, kïrkegh kïmïnïng lö ne, wölo muköy kïkwölo kegh tïkwïn cho echön nyoman. Wuw nyo tya nya wey nyo muköy kuwur ma nyo le kite!

⁶Karkegh nyu ngalyap nko ma. Ngichay akonga nyoni ompö porwöyicha nyo kinyïghï ghöyityö lakas, ntökïtenö kusïmnyon porwöyicha ompö ghöyityö. Muköy kuna ma nyini ngwïno mapa kokay ompö möngencha.

⁷Kikumï ptangengmöt kïpa tïpö wudïn cho lata, törit nko moroyut nko tïku walaka cho möngöy pögh ori.

⁸Wölo möminye chi nyo muköy kïpayta ngalyapunyi. Tïngeto ngalyap ghöyityö nyo mösisönye akï nyo kinyïghï ködöwï nyo tïghöy pich.

⁹Kïpöghisyeghocha ngalyap keyokyinegho sörö Echotyon akï Paponyo akepöghisyeghö tïkwïl kechïpö pikö walaka cho kikigh ompö körkeyïn pö Tororöt.

¹⁰Pkono ngala kisoyönöt nko cho pö chïpö kutinini le akonga. Tupchenichu, merokocha ngalechoni kïlïku choni.

¹¹Ayo, muköy kongpa pögh akong kuyinï pögh cho onyïne nko cho ngwonöchï?

¹²Tupchenichu, muköy moköngwö kuyin akwa arol anta sapipun kuyin akwa makany? Kïlenyoni tïkwïl memukonye kïpkana pögh cho onyïne kongpa pögho partin.

¹³Ekï ngo köny ompö akwa nyo ngöghom akï chïrer? Akanya kuporï nyinte lenyoni ompö otöptanyi nyo karam nko ighisyewutkachi cho ighöy ompö tölosyö nko ngöghomnyö.

¹⁴Wölo ato kinyïghï mïkuliskökwa sastagh, apekwa kegh sikong akïyongöy chi kegh onkït ompö or nyo gha, kïmömïchininye okwolökwa kegh, amïr putintön.

¹⁵Mengwïnonye ngöghomnyö nyo lata nyoni yïm, wölo pö ngwïnyinï amönomnyotonye kegh nko kighanat, ngwïno wölo mi Onyötö.

¹⁶Ompöwölo wop tïkwïl wölo mi sastagh nko wölo yongöy kegh pich opïn ompö or nyo gha, kïmi wöloni tïkwïl arata kegh nko ighisyewut lapay cho ghach.

¹⁷Wölo nyo pö tagh, ngöghomnyö nyo ngwïno yïm kï tïlil, tïng kalya. Talase, teröy ngal akïyongöy pich. Tïngeto kisyonöt nyo wow akuyinu akwa cho pö ighisyewut cho karamach. Mötïngnye kïltagh anta lïs.

¹⁸Keyityï pich man kï akwa kalya cho kikatkat ompö kalya pich cho chomöy kalya.