Read pokoot YAKOPO 5 Bible Online

YAKOPO 5 - pokoot bible

YAKOPO 5

¹Oterwante pich cho ochï sïkon! Oriryö, alokyö ompö nyörilwok cho itwokwa!

² Kikïnïnö tïkuko sïkönötenkwa akwam rirïm sïrokökwa.

³Kikwam köpumpï koltinekwa nko ropïyenikwa. Lïku köpumpunoni asïyech söwintön nyo rwokinokwa akwam porwöyikwa le ma. Wechï kapasakwa sïkönön osiswechete pö söröm!

⁴ Tomönye oghokyinökwa pich ropïyenikwa cho ngorwokwa paren ropïyenikwa chanya kyataghekwa ompö lïs. Atere köny lokekwa! Kikwit rirata pïchoni kikas paghekwa yiti Echotyon Tororöt kimuytoghin.

⁵Kotïpikwa ngwïnyinï ompö pïghyöny nko ngarakat nko nyo pö pïrchin nyo gha. Kapaghakwa kegh, atonöryenö atïpï kïpsach ompö asispa yengsyö.

⁶Korwokikwa apar chi nyo puryö lelut akï nyo memukönye kïtagh kwigh kïgh nyo kemwochinyi kwigh.

⁷Omïkukönö nyu, tupchenichu ntökïtenö kwitï Echotyon. Arose ya wölo mïkuköntoy ngorin, otini mi kïköngöy paghechi cho kingor ntökuyinï pagh cho pö olyot nyo wow. Kïköngisïyi nyinte lenyoni ompö mïkukönöt ntökïtenö kïropan ila sarngatat nko nyo pö kitokot.

⁸Mïchinokwa tïkwïl omïkukönö, akil mïkuliskökwo ompöwölo kikïlekïtit ato mïlo Echotyon.

⁹Tupchenichu, mongwïrngwïronchï kegh akwane atömerwokwok Tororöt. Anyona nyu kirwokinte, mi kukat, mi kïpsach kwitu.

¹⁰Tupchenichu, anetena kegh werkoy cho kingalan ompö kaynata Echotyon. Kimïkukön chane otini kikichopöy kong.

¹¹ Kiyitecha chane lö pich cho soyönote, ompöwölo kimïkukön. Kyalïmakwa wölo kimïkuköntö Ayupu, ankïtökwa kïgh nyo kighchï Echotyon nyinte ato le söröm ompöwölo wow kisyonötenyi nko lulötenyi.

¹² Ngölyonte anka nyo omwowekwa, tupchenichu, momchï chi muma ompö yïm anta ngwïny anta kïgh anka tïkwïl, wölo nya kïlïkwï owöytönkwa, “Owöy,” kïlïkwï ewotankwa, “Ewo.” Ato arïpakwa lenyoni, kïmonyorunekwanye kirwoko Tororöt.

¹³Ekïmi chi kwenunkwa nyo nyörïloy nya? Akanya kïsagh. Ekïmi nyo ngarakate? Akanya kïtum tumwöyi sölut.

¹⁴ Ekïmi chi kwenunkwa nyo chirate? Akanya kïkur poyi kanisa kïsoghchï nyinte akuyila mwagh ompö kaynata Echotyon.

¹⁵Ato soghchï ompö kighanat kïsöpöy chichoni. Töni Echotyon nyinte söpon ngat akïlöstoghchï ngokï cho kigh nyinte.

¹⁶Kïlenyona nyu, ongonchinö kegh ngokikwo akwane, asoghchï kegh atökesopok. Tïngeto saghata chi pö man owesyö nyo ighöy tïkwïn cho chang.

¹⁷ Ki chi Eliya nyo karkegh nko acha, kukil kegh kisagh Tororöt kïkar rop maropan. Kupech korononi könyis sömök nko aro mut nko akonga.

¹⁸ Atolapay kïsagh ngat, kïyotï yïmö roptanyi, kïnyarilit ngwïnya akïrumï omisyö.

¹⁹Ato mi chi kwenunkwa tupchenichu, nyo kakupotö ara man akuyokï chitö anka,

²⁰ onkïtï lö, chi anka tïkwïl nyo yokuno mwokïyon ara kipotöt, kïsöruno söponto mwokïyontononi meghat akwigh ngokï cho chang cho kökikwigh kelasta.