Read pokoot 1 PETRO 1 Bible Online

1 PETRO 1 - pokoot bible

1 PETRO 1

¹Kakiran palalyantanï ante Petro le akonga ompö kiyoytoghi Yeso Kristo.* Kakirwakwa cho ochï kïlanpa Tororöt cho omito otïpisot le pïnot cho kayasta oghömï koros pö Ponto nko Kalatia nko Kapadokia nko Esya nko Pitinia.

²Kikïkïlakwa kïrïp kegh nko machata Papo Tororöt aketïlilokwa ompö Mïkulöwunyi atoterchinö Yeso Kristo atökuwunokwa kisönkachi. Osoghan lö nya kïtasa tya pöropchö nko kalya ompö akwa.

³Keyokyinö Tororöt sörö, Papoto Echotyontenyo Yeso Kristo! Ompö kisyonötenyi nyo wow, nyo kimuka kïyiyecha yiyöt nyo rel otini kigh nyinte Yeso Kristo kututunö ngwen. Nka nyoni kïgh nyo konecha kikönöt nyo chïchïmate

⁴nka nyoni ye kïmitecha kerosöy tagh tökenyorunö kisoyönut pö Tororöt cho echön cho kirorchï nyinte pikachi. Körorwokwa nyinte tïkuchoni ompö yïm wölo mönïnsocha amöwïryocha anta payta nyonikïny.

⁵Chikwa kisoyönutchoni, akwa chona ripenokwa Tororöt owesyenyi ompö ara kighanat tonyorunö nyo mi kïpsach kengongwï sörunöt asispa söröm.

⁶Ongörekyenö ompö ngölyontononi, kïrkegh kötomitenökwa otï le ye lok ompö osis cho ngörï akwompö työmut cho chang cho sisinchö cho onyorukwa.

⁷Keröto työmutchoni kï tökïrumï lö pö man kighanatenkwa. Arose lö kïtyömo ma koltin cho kinkït lö wïryot. Kïlenyona nyu, kïtyömöy nyo mötïny kighanatenkwa nyo tïng olyot nyo wow tya kïtïl koltin tökïchïchïm, sörömunyi onyorunekwa salat nko ororyö nko konyït. Asisoni kïngongu Yeso Kristo.

⁸Ochömekwa nyinte, kïrkegh kötomönye asïwenakwa, aghönekwa kïrkegh mosïwïyekwanye nyinte nyete le ye. Kïlenyona ongöreksokwa ompö ngörekyö nyo pö töngönchin nyo möngölononye chi kutinyi,

⁹ompöwölo katakakwa sörunöto mïkuliskökwa nyini le keröto kighanatenkwa.

¹⁰Kisem werkoy akïkït ngala sörunötononi, akïngor paraku ropöwonto pöropcho kikikïtat Tororöt kïkonokwa.

¹¹Kimukyï chane kunkïtï lö, itu oyï akwosis cho nenach choni kiporchini chane Mïkulöwu Kristo nyo kimi oringwa, otini kimi kïngoröy paraku kiwongunöt nyo kïnyoru Kristo nko ororyö nyo rïpuchoni.

¹²Kiporchï Tororöt werkoy choni lö, ighisyö nyo kighöy chane kïmelö ompö kinyiwutyengwa kegh wölo ompö kinyiwutyenkwa, otini kingölono ngalechaye kyalïmekwa pïchanya kyomtotoy Lökoy cho Karamach ompö owesyo Mïkulögh nyo Tïlil nyo kikïyonunö yïm. Ngal chete cho möro kong chini le ompö malayken kunkïtu.

¹³Kïlenyona, ye nyu mïchinokwa anapa kegh atïpï kïpsach. Otönö kikönötengwo lapay ompö pöropchö nyo konokwa Tororöt asïyech ato kïngongwï Yeso Kristo.

¹⁴Oterchinö Tororöt le monïng cho tïng terchin amoyokyinö kegh ngat ara pïrchin cho kipö tagh atanya kitochikwa sölwöy.

¹⁵Wölo alïkwï pich cho tïlilöch ompö kïgh anka tïkwïl nyo oghöy, le wölini tïlil Tororöt nyoni kikurokwa.

¹⁶ Lentöy Kikirut, “Otïlilitunö, ompöwölo ochan tïlil.”

¹⁷Otini osoghekwa Tororöt okurokwa nyinte Papo. Kïlenyona mïchini onkïtunökwa lö, rwokyini nyinte chi anka tïkwïl kïrïp kegh nko ighisyewutkachi amökïlönye pich. Opöghisyeghenö nyu osiswekwo cho totïngetenö ompö ngwïnyinï omikwa le to ompö kiwaghata Tororöt.

¹⁸Ompöwölo onkïtökwa lö, kityakenekwa Tororöt otöp nyo kimerokonye nyo kyosïkekwa papotïnekwo. Amolenchï kegh kikitykenekwa tïkwïn cho wïryot cho lata ropïyen anta koltin,

¹⁹wölo ompö kisön pö Kristo cho pö olyot nyo wow. Ki karkegh nyinte nko wawa kech nyo lïpop akutenate.

²⁰Kikïl Tororöt nyinte otini kitomönye kwigh ngwïny, akïngongwï nyinte osiswechete pö söröm akwompö kinyiwutyenkwa.

²¹Kaghanakwa Tororöt ompö Kristo nyo kigh nyinte kututunö ngwen akutö ororyö. Kïlenyona mi kighanatenkwa nko kikönötenkwa wölo mi Tororöt.

²²Kökitïlil mïkuliskökwa ye otï karïpakwa ngala man, achomnyekwa akwane ompö chomnyot nyo puryö. Okilö nyu kegh aparta chomnyononi ompö mïkuliskökwo kïmïkul.

²³Ompöwölo kikeyïyokwa yiyöt nyo pö odeny, ompö kösïghyon nyo mönïnönye nyo pö ngölyonto Tororöt nyo satate kokay.

²⁴ Kïle wölay mwoghtoy Kikirut lö, “Karkegh ptangengmöt nko suswon, akïkarkegh ororyenyi nko tapïka suswon. Silönöy suswon akïrörochö tapïkokachi.

²⁵Wölo töpo ngölyonto Echotyon kokay.” Ngölyontononi kï Lökoy cho Karamach cho kikyomwokwa.