Read pokoot 1 PETRO 4 Bible Online

1 PETRO 4 - pokoot bible

1 PETRO 4

¹Ompöwölo kiwongwï Kristo* ompö por, mïchinokwa tïkwïl okile kegh ompö keröt nyo kitïng nyinte ompöwölo chi nyo kikïcham kuwongwï ompö por akwompö kighanatenyi kï kikuchal ngokï.

²Kïlenyona nyu ye mïchinokwa, ompö osiswekwa cho köngötï ompö ngwïnyinï otïpinö kïrïp kegh nko machata Tororöt, amelö kïrïp kegh nko pïrchin pö ptangengmöt.

³Nya kïmïchï osiswö cho kikuwer cho kyaghakwa tïkwïn cho chömöy kwighöy pich cho menkïtcha Tororöt. Kyomöngisyekwa ompö takalnan nko cheporesnan nko pölö nko pïrchin nyo gha nko chepomunön nko ryakata kumïn nko tamasa nko saghata körkeyïntin nyo lilu.

⁴Mi ye nyu pïchoni pö puntoni menkïtcha Tororöt kïtöngönyöy otini sïwïyi lö monomnyotonekwanye nko chane ngat ompö otöpnoni gha, nka nyoni mwoghokwa chane.

⁵Wölo tökïsis kughyongö pïchoni tawu Tororöt nyo mi kïpsach kurwokyï pich cho söpsot nko cho kimeghö.

⁶Nka nyoni kikyomchï Lökoy cho Karamach tïkwïl pich cho kikerwokyï kïmeghö ompö por le pich lapay atökïsöpchö ompö mïkulögh le wölini söpöy Tororöt.

⁷Kikïlekïtit sörömu tïkwïn lapay. Mïchinokwa nyu otïpinö ompö tölosyö nko ripöto kegh atïpï kïpsach atamuka asagha.

⁸ Wölo nyo wow tya mïchini achama kegh akwane lasiny, ompöwölo körtoy chomnyogh ngokï cho chang.

⁹Atach kegh akwane ompö kestonikwo amongwïrngwïronchö.

¹⁰Mïchini chi anka tïkwïl nyo mi kwenunkwa kïpöghisyegho kuten ropöw cho sisinchö cho kitö Tororöt ompö kinyiwut nyo pö pikö walaka, le ripï cho karamach cho ghyongchini ropöwo Tororöt cho chang.

¹¹Ato kikïkurïn lïkuna ngölonin, ingalan kïrïp kegh nko ngölyonto Tororöt, kïkany nyo pöghisyechini pikö walaka, kïmïchini kwigh lenyoni ompö owesyö nyo töni Tororöt nyinte. Ato aghakwa lenyoni, kïnyoru Tororöt salat ompö ara Yeso Kristo nyo nyenyi ororyö nko owesyö kokay nko kokay. Amen.

¹²Motöngönchï kongotichu työmut cho ngwonöch cho omitekwa onyoru, le ato ketwakwa kïgh nyo sis.

¹³Wölo ongörekyenö ompöwölo lata nyoni ato omitekwa owongwu tïkwïl nko Kristo atamuka onyorunö ngörekyö nyo wow ato ngongwï Tororöt ororyenyi.

¹⁴Ongörekyenö ato mwaghakwa pich ompöwölo ochikwa pipö Kristo. Poru nyoni mi kïtöpo nko akwa Mïkulöwu ororyö akï nyoni kï Mïkulöwu Tororöt.

¹⁵Ato mi chi nyo wongwu ompö kwenunkwa kïmömïchininye kuwongwï ompöwölo kapar chi anta chorin, anta chelölosyon anta nyo lïtyini ngaleko pikö walaka.

¹⁶Melalïyan ato iwongunyi ompöwölo ichinyi chi pö Kristo, wölo iyokyï Tororöt sörö ompöwölo kïkurteghoninyi kaynata Kristo.

¹⁷Kikwitïta asispa kirwok akï pipö Tororöt cho kïnyoghöy kerwokyini. Kwato nya kutorenecha kirwokononi ekïlïku ne nyu köny ompö pich cho meghönöcha Lökoy cho Karamach cho pkono wölo mi Tororöt?

¹⁸ Kïle wölo mwoytoy Kikirut lö, “Ato aghïgh kesörï chi nyo karam, ekïlïku ne nyu köny ompö chi nyo menkïtnye Tororöt nko mwokïyon?”

¹⁹Kïlenyona nyu pich cho wongu ompöwölo machata Tororöt nyoni ompö chane, kïmïchini, ompö ighisyewutkökwa cho karamach kïpïsyï söponwekwa mori Ighintengwa nyo ghanate.