Read pokoot 1 PETRO 5 Bible Online

1 PETRO 5 - pokoot bible

1 PETRO 5

¹Omökan ye nyu osomöy kïgh poyi kanisen, ani nyo ochï poyon le chane achï söwinto kiwongunöto Kristo* akï nyo oporöy nko nyinte ororyenyi nyo tökengongu asïyech. Osomokwa lö,

² ayakwïya lasiny kechiryo Tororöt cho mi morikwa, ompö chamatenkwa kegh amelö ompöwölo mi chi nyo köyumchokwa agha lenyoni. Amagh pöghisyononi, lö tökesïkenö ropïyen wölo ompö mïkulöwunkwa kïmïkul.

³Mapayta ompö charut choni kikekonokwa ayakwïya, wölo alïkuna akwane körkeyïn nyo rïpöy kechiryechoni.

⁴Akwato itï Mösöwonte nyini Wow, onyorukwa nyu tenta ororyö nyo mepoytonye.

⁵ Kïlenyoni tïkwïl ompö akwa chumwak, mïchinokwa oterchinö poyi kanisa. Akïmïchinokwa lapay alïkuna pich cho tölose atopöghisyechinö kegh akwane, ompöwölo lentöy Kikirut, “Töghöy Tororöt menot, wölo töni pöropchö pich cho tölose.”

⁶ Amïnïngita kegh nyu ompö kelyo Tororöt nyo awes atökïsyolok nyinte ato itïta asistanyi.

⁷Opïsinö nyinte sïngutkökwa löwïr, ompöwölo mi nyinte kïsïngenokwa.

⁸Otïpï kïpsach arip kegh ompöwölo mito punyontenkwa nyay le Onyöt kïwestotoy akïmororöy le ngötïny nyo möröy kïgh nyo nyïkwïdoy.

⁹Achïchïma ompö kighanatengwo atayodena nyinte, ankïtï lö kiwongunöt nyo onyorukwa kï karkegh nko nyo nyoru tupchenikwa cho mi ngwïnyinï kïmïkul.

¹⁰Wölo ato tenö kowongukwa nyo tangogh, ighokwa atena akuchïchimakwa akïkonekwa owesyö Tororöt nyo pö kalya kïmïkul, akï nyo kikurokwa apara nko nyinte ororyenyi nyo pö kokay otini kyolinyekwa nko Kristo.

¹¹Nya kïsïch nyinte owesyö kokay! Amen.

¹² Kingarakanïn werïnyo Silpano nyo onkïtön, aghönan, akir palalyantanete tangogh. Kakirwakwa atosïkö mïkulögh, asöwintönchï lö, nyete kï pöropcho Tororöt nyo pö man. Oghyongö nyu, achïchïm ompö pöropchononi.

¹³ Ketakwesakwa ghömïcho kanisen cho mi yete le Papilon cho kilöwön Tororöt, akutakwesakwa werïnyan Marko tïkwïl.

¹⁴Atakwesa kegh akwane ompö takwespa chomnyo pipö Kristo. Nya kïtöpö kalya nko akwa lapay chona kalïkwï pipö Kristo.