Read pokoot 2 PETRO 2 Bible Online

2 PETRO 2 - pokoot bible

2 PETRO 2

¹Kïle wölo kichumuna kwenu pich werkoyi putintön ompö osis cho kikuwer, kuchumu lenyoni tïkwïl koneti putintön kwenunkwa. Lepu chane kinetut cho wuröy pich, akï pö putintön, akïtagh Echotyon nyo kisörï chane. Akwompö aranoni kwipchï kegh kiwurat nyo chumchini lö tursïs.

²Rïpöy kighönï cho chang ortïnekwa choni ghach, ngölono pikö walaka nyo gha Aranoni pö man akwompö tïkwïn cho ighöy chane.

³Ompö pïrchintöngwa nyo pö tïkwïn sïkenokwa chane kïgh otini mi kwomwokwa kikorön pö putintön. Wölo kikïtöpö kïpsach nyo kogh Mutinteto ngalekwa akïchïkönöy Kiwurintengwa.

⁴Kimesyonchïnye Tororöt malayken cho kigh ngokï, wölo kïtorchï chane ngwen wölo tuw kïrötot kïköngöy kirwok.

⁵ Kimesyonchïnye Tororöt ngwïny könyisyok, wölo kiyotyï puseryon nyo wow pich cho kimewöghönye Tororöt. Wölo kisörï Tororöt. Noa, nyo kyomtoy lö mïchini kïmöngisyö pich ompö ara man nko pikö walaka cho le mut nko odeny.

⁶ Kirwokyï Tororöt kanastina Sodoma nko Komora akïpela chane ma akwigh kanastinechoni kïlïkwï körkeyïn nyo igho ompö pich cho mewöghöy Tororöt.

⁷ Kisörï nyinte Lot, chi nyo karam nyo kisus nyoman otöptinö cho ghach cho pö pïchoni kile penyï akï mwokïyis.

⁸Kimang Lot kwenu pïchoni, akusus mïkulöwunyi kïtenö osis wölini kïsïwïyi akïlïmöy ighisyewutkökwa cho kighach.

⁹Kïlenyona nyu Nkït Echotyon kïsöru pich cho wöghöy Tororöt kïngetunö työmutkökwa akunyaril kong pich cho ghach ntökwit asispa kirwok,

¹⁰ntökïmïr pich cho rïpöy pïrchintin pö por cho ghach cho le sïmnyon akï sas wowïn pö Tororöt. Pkatis konetichoni akunisonchot ametönicha konyït ighan cho ororöch cho mi parak, nyinö köteghöy lenyoni kumwa.

¹¹Wölo melö rwokyini chane akumwagha tawu Echotyon, malayken cho tïng owesyö kïsir konetichoni pö putintön.

¹²Wölo sörchini pïchoni kwigh tïkwïn pat cho möpköchini nyo pö le tïpö wudïn cho kïyiyöy tökïnam pich akïpar. Ngölono chane nyo gha akumwoghöy kïgh anka tïkwïl nyo möpköchininye chane. Nyoröy Tororöt chane le wölo pöröy pich tïpö wudïn,

¹³akwigh chane kïnyarïl kïrïp kegh nko ghöyityö nyo kigh chane. Ngörekyeto pichoni kï kwigh kulïwu asis kïgh anka tïkwïl nyo pïrchini porwöyikwa. Konokwa chane arasï nko kaynat nyo gha otini mi kwomisïyi nko akwa akïmi kïngörechegho ortïnekwa choni pö lïs!

¹⁴Möminye kïgh anka nyo mököy chane kurosöy kïpoto kor cho le cheporestin tïng maral nyo pö ngokï nyo mewonyotnye. Kïnkïnöy chane pich cho nyörkölöl ompö kighanat ntökïlïtöy ngöghöpu ngokï. Kikïnagh mïkuliskökwa kïpïrchï mökosyö. Chïpöte pïchoni.

¹⁵ Köpïstö chane ara man, akïpa or nyo kirïp Palaam wero Peor nyo kicham ropïyen cho kinyorï ompö or nyo gha,

¹⁶wölo kikut Tororöt nyinte ompö ghöyïntanyi. Kïngalan sïkïryenyi nyo melö köngölonöy su ompö kuti ptangengmöt akïkar ntömökwigha ighisyo chepoynöno werkoyontonay.

¹⁷Karkegh pïchoni nko kori pöghon cho kitenyö akïkarkegh nko poltoy cho kutöy chepkïrïri. Kikïngotyï Tororöt möngengwa wölo tuw lö yïk.

¹⁸Ompöwölo mwoghöy chane ngala kwolöto kegh akï cho puryö kinyiwut, akïpöghisyeghö möchut pö por cho ghach kïkïnkïn kwigh ngokï nko pich cho kötökïchïwïtyegho ato lekït kwenu pich cho möngisïyi nyo gha.

¹⁹Yomischini chane pikö walaka kityakat akwanyï sekeyi kiwurat chane, ompöwölo sekeyon chi ompö kïgh anka tïkwïl nyo pöyu nyinte.

²⁰Ato chïwïtyeghö pich owesyo ngwïny nyo wuröy mïkulis pö pich, ompöwölo kenkïtï chane Echotyontenyo akï Ghetintenyo Yeso Kristo,* atolapay kïcham kïrat chane ngat tïkuchoni wuröy pich mïkulis ntökïpöyï, kïghöyitu tya otöptöngwa nyo pö söröm kïsir nyo pö tagh.

²¹Opï ntökimenkïtïcha chane ara man kïsir kunkïtï atolapay kïwöghökisyö akuchal kïrïp ngal cho tïlilöch cho kikïmwochï chane.

²² Kighisyö ompö chane lenyoni kïrïp kegh nko ngölyonto ngötïnyö nyo lentöy, “Yokyini kegh kukïy kinguntanichi,” nko nyo lentöy, “Yokyini kegh nkïrwe nyo mwatate kïtönkwöröy norayon ngat.”