Read pokoot 2 PETRO 3 Bible Online

2 PETRO 3 - pokoot bible

2 PETRO 3

¹Kongotichu, palalyantenyan nyete nyo pö odeny nyo kakirwakwa. Akwompö palaltinechete kwodeny, komukyan angetnget kinonut cho tïlilöch ompö orinkwa otini ononwokwa ngalechï.

²Omökan ononekwa ngal cho kingor werkoy cho kikïl Tororöt nyinte kegh nko ngölyon nyo kimwowï Echotyon akï Ghetin ompö kutïweko kiyoktoghï.

³ Nyo pö tagh, mïchinokwa onkïtune lö, itu pich osiswo löt cho pöyu möngengwa möchutkökwa cho pö por. Nyernyerenekwa chane,

⁴kïlentöy, “Ayo, kimeyomisïnye so nyinte atanye lö omïlo? Kunko ye? Kikïmeghö papotïnecha akwanyï tökïmi kïgh anka tïkwïl le wölini kilata kïngeta towunöto ngwïny!”

⁵ Kwötyini chane, akunkït lö kikïtowï könyisyok yïmöy wölto nko ngwïny ompö ngölyon nyo kimwa Tororöt. Kikigh ngwïny kuchumuna pögh akughyongo kwenu pögh,

⁶ akï pöghisyegho Tororöt ki tïkwïl pögh, pögho puser nyo wow kuwura ngwïny nyo pö osiswechoni pö tagh.

⁷Wölo kïmi keripöy yïmöy nko ngwïny cho pö osiswechete ompö ngölyonto Tororöt atökewura chane ma. Kïrïpöy lenyoni ntökïtenö kwitï Asis ato kirwokyini akewur pich cho melö wöghöy Tororöt.

⁸ Wölo mowutyeghö kïgh akonga tupchenichu! Möminye sisïn ompö tawu Echotyon kwenu asis akonga nko könyis elpu akonga, karkegh choni ompö nyinte.

⁹Melö nyïrtighöy kegh Echotyon ntömökwigh kïgh nyo kikakuyomisï lö oghöy, le wölo nontoy pikö walaka. Wölo mi nyinte kïmïkukönöy nko akwa, ompöwölo mömökönye kenyar chi anka tïkwïl, wölo mököy kïwöghökisyö pich akïkötö ngokikwa.

¹⁰ Wölo miru asispa Echotyon le chorin. Weröy yïmöy Asisoni nko kighumöt nyo wow, kiwuro ma tïpö yïm, kïpelöy ngwïny nko tïkwïn löwïr cho mi orinyi.

¹¹Kïkany ato kiwuröy tïkuchoni löwïr lenyoni, mïchinokwa nyu olïkune pich cho nenach nya? Mïchini otïpinökwa otöp nyo tïlil nyo teköy Tororöt,

¹²otini omitekwa oköngöy Asisoni ngwïnöy Tororöt kurwokyini ngwïny akïmïchini agha Asisoni kwitï lawel. Asis nyoni nyo kiwuro ma yïmöy nko tïkwïn löwïr cho mi yïmöyichoni. Lochini tïkuchoni ma tökuyinta.

¹³ Wölo kïköngecha kïgh nyo kikuyomiswecha Tororöt. Nyoni kï yïm nyo rel nko ngwïny nyo rel wölo möngöy man.

¹⁴Kïlenyona nyu, kongotichu, otini omitekwa oköngöy Asisoni, okilö kegh lasiny alïkwï pich cho tïlilöch akï cho puryö lelut ompö tawu Tororöt, asïch kalya nko nyinte.

¹⁵Oyitö lö mïkukönöto Echotyontenyo ompö acha, akï pöroyïn nyo kökonecha tökenyorunö sörunöt le wölanye kikirwakwa werïnyo Paulö ompö ngöghomnyö nyo kitö Tororöt.

¹⁶Nka nyete wölo mwoytoy nyinte ompö palaltinechi lapay paraku ngölyontoni. Mi tïkwïn cho oghïghe kesöwï ompö palaltinechi, tïkwïn cho muköy sölwöy nko cho puryö wölo ghyongo kuweng ompö ara putintön, le wölo wengtoy Kikirutkö walaka cho Tïlilöch kïchumponchö. Kïlenyona ipchini kegh kiwurat.

¹⁷Wölo akwa, tupchenichu kikyonkïtukwa ngölyontononi. Orip kegh nyu tömemïtak pich cho le penyi ara kipotöt ompö kinetutkakwa cho pö putintön akwighak ochïntenö ompö kighyongötengwo nyo chïchïmate.

¹⁸Wölo atasa tagh oghetunö ompö pöropchö nko kinkïtöto Echotyontenyo akï Ghetintenyo Yeso Kristo.* Nya kïsïch nyinte ororyö kïngeta ye nko kokay! Amen.