Read pokoot 1 YOANA 2 Bible Online

1 YOANA 2 - pokoot bible

1 YOANA 2

¹Kakirwakwa ngalechï monechu kïle nyo wow ompö akwa, atömagh ngokï. Wölo ato igh chi ngokï, ketïngetecha kingörokin nyo ighöy man, Yeso Kristo* nyo ipöy soghutköcha wölo mi Papo.

²Akï nyinte kï tïsöwon nyo pö ngokicha, amelö tïsöwonto ngokicha opïn, wölo cho pö pich lapay.

³Ato kïrïpacha Kirurut pö Tororöt, kumuko ompö man kinkïtöcha lö ngo nyinte.

⁴Chi nyo lentöy onkït nyinte, akwanyï mörïpönye kirurutkachi, kï putin akï möminye man orinyi.

⁵Wölo anka tïkwïl nyo rïpöy ngölyonto Kristo, kï chi nyo rumuno orinyi lö sïkatat chomnyo Tororöt. Anyï or nyo kinkïtunonecha lasiny lö kakelinyecha nko Tororöt:

⁶anka tïkwïl nyo mwoghöy lö kyolinyö nko Tororöt, kïmïchini kïtöpö le wölo kitöptoy Yeso Kristo.

⁷Chamankachu, molenchï kegh kakirwakwa kirurut nyo rel, wölo nyaye pö könyisyok, nyanye kyopöghisyekwa kïngeta otini le tagh. Kirurutyononi pö könyisyok kï ngalechaye kyalïmenechakwa.

⁸Wölo kakirwokwa ye kirurut nyo rel ompöwölo kïsöchini mantanyi ori pö Kristo nko orinkwa tïkwïl. Ompöwölo mi tuwïn kuweröy, akikulïwï löpoyïn pö man.

⁹Anka tïkwïl nyo mwoghöy lö omitö löpoyïn, akwanyï möchömöy tupchenyi, kï tökïmi tuwïn nko nyete le ye.

¹⁰Akwanka tïkwïl nyo chömöy tupchenyi kïmi löpoyïn, akï möminye kïgh orinyi nyo kwötöy chitö anka kupïtyï ngokï.

¹¹Wölo anka tïkwïl nyo möchömöy tupchenyi kïmi akïwestegho tuwïn. Menkïtnye chichoni wölo gheghöy, ompöwölo körtoy tuwïn nyinte.

¹²Kakirwakwa monechï mïnkech, ompöwölo kikelöstowokwa ngokikwo ompö kaynata Kristo.

¹³Kakirwakwa papotïn, ompöwölo onkïtökwa nyinte nyini kimito kïngeta otini le towunöt. Kakirwakwa chumwak ompöwölo kyarïntekwa Mwokïyontonay.

¹⁴Kakirwakwa monïng cho mïnkech ompöwölo konkïtukwa Papo. Kakirwakwa papotïn, ompöwölo onkïtökwa nyinte nyini kimi kïngeta otini le towunöt. Kakirwakwa chumwak, ompöwölo otïngetekwa owesyö akï mi ngölyonto Tororöt orinkwa, akyarïntekwa Mwokïyontonay.

¹⁵Macham otöp pö ngwïny anta kïgh anka tïkwïl nyo pö ngwïny. Ato cham chi otöp pö ngwïny, kïmelö mi chomnyo Papo orinyi.

¹⁶Tïpö ngwïnyinï lapay cho lata pïrchintino por cho ghach nko tïkwïn cho sururchini konyi pich akïpïrchï nko kïgh anka tïkwïl nyo mi ngwïnyinï nyo kwolo kegh pich tya, kïmengwïnonye nyo le ompö akonga ompö choni wölo mi Papo. Pö tïkuchoni löwïr ngwïnyinï.

¹⁷Weröy ngwïnya nko tïkuchi löwïr cho pïrchini pich, wölo söpöy kokay chi anka tïkwïl nyo ighöy machata Tororöt.

¹⁸Monechu, kikïrikwï osiswo söröm! Kikikemwowokwa lö itu Punyonto Kristo, akï nyete le ye kikwitï pung pö Kristo cho chang nyo kikenkïtucha ye lö kikïlekïtitu osiswo söröm.

¹⁹Kipïstecha pïchoni kïpechï kegh wölo kimelö ki pich cho kimi akonga nko acha. Nyo ntö kimi nko acha, kiteletöy, kïtïpisot nko acha. Wölo kipïstecha chane atökïrumtö nyoman lö kimöminye nyo le ompö akonga nyo kile nyincha.

²⁰Wölo kikuyilekwa Nyinte nyo Tïlil, kïlenyona kyonkïtukwa löwïr man.

²¹Kakirwakwa amelö ompöwölo monkïtökwanye man, wölo ompöwölo onkïtökwa, ankïtökwa ngat lö möminye putintön nyo ngwïno wölo mi man.

²²Ngo nyo le putin? Putin chi anka tïkwïl nyo töghöy lö, Yeso kï melö Kristo. Punyonto Kristo chi nyo lata nyoni, nyinte nyo töghöy Papo nko Weri.

²³Ompöwölo anka tïkwïl nyo töghöy Weri, kïtöghöy Papo tïkwïl akwanka tïkwïl nyo mwogho kutinyi lö ochömöy Weri kï kikïtach Papo tïkwïl.

²⁴Mïchinokwa otönö mïkuliskökwo ngalechoni kyalïmakwa kïngeta otini le tagh. Ato töpï ngalechoni kyalïmakwa orinkwa, kï ochikwa linyote nko Weri nko Papo tïkwïl.

²⁵Akï kïgh nyo kiyomiswecha Kristo nyinte kï söpon pö kokay.

²⁶Kakirwakwa ngalechoni akwompö pich cho mököy kuryalakwa opotyenö.

²⁷Wölo mi nko akwa Mïkulögh nyo Tïlil nyo kikïmïlwokwa Kristo. Akwato töpö Mïkulögh nyo Tïlil orinkwa kïmelö totïngetenökwa machat nyo pö konetin anka. Ompöwölo netokwa Mïkulöwunoni tïkwïn lapay, akï kïgh anka tïkwïl nyo netöy nyinte kïpö man, melö putintön. Arïpa nyu kinetut pö Mïkulögh nyo Tïlil atïpï orito Kristo.

²⁸Akï ye monechu, otïpinö orinyi töto otini kechumï, kesïch nyakanat tömökïmi kïgh nyo ighecha kewïngena kegh nyinte ompö arasï ato itï Asisoni.

²⁹Kïle wölini onkïtökwa lö pö man Kristo, kïmïchini tïkwïl onkïtunökwa lö anka tïkwïl nyo ighöy man, kï mompö Tororöt.