Read pokoot 1 YOANA 4 Bible Online

1 YOANA 4 - pokoot bible

1 YOANA 4

¹Chamankachu, maghan ngala chi kïtïkon nyo lentöy otïngetö Mïkulöwu Tororöt, wölo arosa lasiny tasïwena lö mïkulis ntöghoghchini chane kïpo man anta ewo. Ompöwölo chang werkoyi putintön cho kipestata kïlïtöy wop tïkwïl.

²Anyï or nyo onkïtunonekwa lö ntöghoghchini chi Mïkulöwu Tororöt: anka tïkwïl nyo mwoghöy kughönöy lö kingwïn Yeso Kristo* le ptangengmöt, kïtïng Mïkulögh nyo ngwïno wölo mi Tororöt.

³Wölo anka tïkwïl nyo töghöy choni ompö Yeso, kïmötïngnye Mïkulögh nyo ngwïno wölo mi Tororöt. Mïkulöwunoni tïng chi nyo lata nyoni kungwïno wölo mi Punyonto Kristo. Kikyalïmakwa lö itu mïkulöwunoni ngwïnyinete, akikwitï nyete le ye.

⁴Wölo akwa monechu opokwa Tororöt, akyarïntekwa werkoyi putintön, ompöwölo tïng owesyö Mïkulögh nyo mi orinkwa kïsir mïkulögh nyo mi orito pipö ngwïny.

⁵Ngölono werkoyichoni pö putintön ngala ngwïny, akïterchini chane pipö ngwïny ompöwölo pö chane ngwïny.

⁶Wölo kïpocha Tororöt. Akwanka tïkwïl nyo nkït Tororöt kïterwecha, kïkany anka tïkwïl nyo möpönye Tororöt kïmelö terwecha. Nka nyoni or nyo kimukecha kenkïtunone sisïn nyo mi kwenu Mïkulögh nyo pö man nko nyo pö putintön.

⁷Chamankachu kechama kegh, ompöwölo ngwïno chomnyogh wölo mi Tororöt. Anka tïkwïl nyo tïng chomnyogh kï mompö Tororöt akunkït Tororöt.

⁸Akwanka tïkwïl nyo mötïngnye chomnyogh, kïmenkïtnye Tororöt ompöwölo Tororöt kï chomnyogh.

⁹Kiporwecha Tororöt chomnyenyi otini kiyokwï Werïnyi nyo le nyinte onkït, kungwïn ngwïny, atökemuka kesïkenö nyinte söpon.

¹⁰Anyï wölo lata chomnyogh: melö lö acha cho kikïcham Tororöt, wölo nyinte nyo kichamecha akïyonï Werïnyi kungwïn kïlïkwï amöros nyo kïlöstegho ngokï.

¹¹Chamankachu, kïkany kïlenyoni wölo kichamtecha Tororöt kurokonecha tïkwïl kechomnyenö achane.

¹²Möminye chi nyo kikïsïwa Tororöt, wölo ato kïchomnyecha, kïmöngöy Tororöt orincha akutenate chomnyenyi ompö orincha.

¹³Kinkïtöcha nyo pö nyoman lö kïmicha orito Tororöt akïmi nyinte orincha, ompöwölo kikonecha nyinte Mïkulöwunyi.

¹⁴Akakesïwecha akemwochinecha pich, lö kiyonï Papo Werïnyi kïlïkwï Ghetinto ngwïny.

¹⁵Ato mwagha chi anka tïkwïl kutinyi lö, Yeso kï Wero Tororöt, kïmi Tororöt kïmöngöy orinyi, akïmi nyinte kïmöngöy orito Tororöt.

¹⁶Kinkïtöcha akeghönecha chomnyogh nyo tïng Tororöt ompö acha. Tororöt kï chomnyogh, akwanka tïkwïl nyo möngisïyi ompö chomnyogh kïmi orito Tororöt, akïmi Tororöt orinyi.

¹⁷Keröto chomnyogh kuten ompö orincha kï kesïköcha nyakanat ompö asispa kirwok. Akesïkecha nyakanate lenyoni ompöwölo kïmicha orito Tororöt ompö ngwïnyinï lenyini mi Kristo orito Tororöt.

¹⁸Möminye kiwaghata ompö wölo mi chomnyogh. Yonöy chomnyogh nyo tenate kiwaghat anka tïkwïl. Kïlenyona, chi anka tïkwïl nyo tökuwöghisïyi, kïtomönye kuten chomnyenyi ompöwölo rïpöy kegh kiwaghata nko mungöto chi nyo kalel.

¹⁹Kïtïngöcha chomnyogh ompöwölo Tororöt nyo kinya kïchamecha.

²⁰Ato mwa chi lö, “Ochöman Tororöt,” akwanyï reyöy tupchenyi, kï putin chichoni. Ompöwölo, muko lö ne kïcham Tororöt nyo tomönye kïsïwa ato möchömönye tupchenyi nyini sïwïyi?

²¹Kïlenyona anyï kirurut nyo kikonecha Kristo: anka tïkwïl nyo chömöy Tororöt kïmïchini kïcham tupchenyi tïkwïl.