Read pokoot KIRWOKÏ 17 Bible Online

KIRWOKÏ 17 - pokoot bible

KIRWOKÏ 17

¹Kimi chi akong osiswechoni nyo kimöngöy koro komoswo Epraim nyo kikuro Mika.

²Kïlenchï chichoni kame, “Ani nyay kyacheng ropïyeni silpa cho le 1,100, chanya kilentenyi kikïchor, akyalïman ato kichïpenyi chichini kicheng. Otïngetan ropïyenichoni.” Kuyokyï kame lö, “Nya kusoyönïn ECHOTYON, werïnyu!”

³Otini kiyokyï nyinte kame ropïyenichay le 1,100. Kïlenchï kame werïnyi, “Kyotïlilchan ECHOTYON ropïyenichoni tökegha körkeyïn nyo kipötöy atö marïpïn chïpö. Kïlenyona oyokunyi ye nyu ropïyenichoni.”

⁴Wölo kuyokyï kame ropïyenichay, kïcheng kame cho le 200 akutö kitongin, kwigha körkeyïn nyo kitongöy, akuluma silpa aketö kö pö Mika.

⁵Kitïng Mika wölo kisogho tororötinechi, kïwechï kwigh epod* nko körkeyïntin, akïkïl werïnyi akonga kïlïkwï tïsintenyi.

⁶Kimöminye pöytoghintö koro Israel osiswechoni, Kigh chi anka tïkwïl kïgh nyo kisïwa lö karam ompö nyinte.

⁷Kimi nyu atoni chi nyo le chumwak nyo pö Petleem koro Yuda nyo kile chi pö Lawi nyo kiwuchï korononi.

⁸Kiwuwunö chichoni kanasyanta Petleem ompö Yuda akimi kïyörotoy wölo möngöy. Otini kitökïmi pan, kwit ka Mika nyo kimi koro komoswo Epraim.

⁹Kïtep Mika chichay lö, “Ingwïnonyi onö?” Kuyokyï chichay lö, “Ochan chi pö Lawi nyo ongwïno Petleem nyo mi koro Yuda, amitan oyörotoy wölo möngöy.”

¹⁰Kïlenchï Mika chichay, “Töpenö nko ani, atelïkuna paponyan ailïkwï tïsintenyan, atokoninyi ropïyeni silpa cho le taman ompö köny akonga nko sïro cho kiloköy nko omisyö.”

¹¹Kïcham chichay pö Lawi kïtöpö nko chichoni, kwigh kegh chichoni akïlïkwï akonga nko werkachi.

¹²Kwigh Mika chichay kïlïkwï tïsintenyi, akïkany kïtöpö konyi.

¹³Atolapay kïlö Mika, “Onkïtön ye nyu lö ighwanïn ECHOTYON nyo karam, ompöwölo otïngetan chi pö Lawi nyo le tïsintenyan.”