Read pokoot KIRWOKÏ 21 Bible Online

KIRWOKÏ 21 - pokoot bible

KIRWOKÏ 21

¹Kökikuwalwal kegh pipö Israel ompö kanasyanta Mispa lö, “Möminye chi nyo le ompö akonga ompö acha nyo yilchini cheptanyi pipö ara Penchamen.”

²Kïpa pïchay pö Israel Petel akumpur tawu Tororöt ompö atoni ntökwimön, kuteghyö akïriryö ompö ngwonïn,

³akïlö, “Heywey, ECHOTYON, Tororöt pö Israel! Kölö ne tökwigha kïgh nyo lata nyï ompö koro Israel, ntökwanyï ye kamach kuwonyö pipö ara Penchamen ompö Israel?”

⁴Otini le kiwasan, kïtek pïchay ato kïpelo amöros akutöteghö amörostin cho kïpelöy nko ropöwo kalya.

⁵Kïtep kegh pïchay pö Israel lö, “Ngo ompö ortïna Israel löwïr nyo melö kengwïn tuyonï mi tawu ECHOTYON?” Ompöwölo kökikuwalwal kegh chane lö chi anka tïkwïl nyo mötuyeghonye tawu ECHOTYON ompö Mispa kepöröy nyinte nyo mötïny.

⁶Kusyonchï pipö Israel werkökwa pipö Penchamen akïlö, “Kewonyö or akonga asisete ompö pipö Israel.

⁷Kighecha ne töketönö kor pipö Penchamen cho köngötï? Akwanyï kikiwolwolchicha ECHOTYON lö melö tökeyilchinecha chane tipicho.”

⁸Atolapay kïmak chane kunkïtï lö ekï ngo ompö pipö Israel cho melö kipa kïtuyeghö wölnö le Mispa, kunkïtï lö möminye chi nyo le ompö akonga nyo kingwïna pipö Yapes Kiliad

⁹ompöwölo otini kikiyit pich, ki puryö chi nyo le ompö akonga nyo le nyingwa.

¹⁰Kïlenyona keyonta pich cho le 12,000 cho kile nyökon kïpa wölini, akïmwochï lö, “Ape apara chi anka tïkwïl nyo mi Yapes kïmi nko kor nko monïng.

¹¹Apar chi nyo le mïrön nko työ anka tïkwïl nyo kirï nko mïrön.”

¹²Otini kitïta Yapes Kiliad kïnyorchï wöloni chepkïltïtin cho le 400, kumït chane kïpa möngot nyo kimi Syilo koro Kanan.

¹³Atolapay kïyonta tuyonay kïmïkul kut wölo mi pipö Penchamen cho kimi ghatya Rimon tökïmwochï chane lö kikyam mis.

¹⁴Kïmïlonchö nyu pipö Penchamen, kutö pïchay pö Israel chane tipichay kikïsörunö Yapes Kiliad, wölo melö kimïchï chane tipichoni.

¹⁵Kusyonchï chane pipö Penchamen ompöwölo kikupesyö ECHOTYON chane ompö pipö Israel.

¹⁶Kïlenyona kïlö poyichay pö tuyonay, “Kighöy ne tökïnyorï pïchï kor köngötï akwanyï kikuwonyö korï ompö koro pipö Penchamen?

¹⁷Nyo mïchini keyar or nyo kitokuno pipö Penchamen cho köngötï, atö mewonyö or akong ompö Israel.

¹⁸Wölo melö kimukecha keyilchine chane tipicho.” Ompöwölo kiwalwal pipö Israel lö, “Chïpote chi anka tïkwïl nyo yilchini pipö Penchamen monïng.”

¹⁹Wölo kïlö, “Mito osiswö cho kighchini ichon ECHOTYON ompö köny anka tïkwïl ompö Syilo nyo mi okumpö ewu löt nyo pö Petel okumpö kongasispa aranay pö mït wegho Petel kutöngöy Syekem, okumpö tagh nyo pö Lepona.”

²⁰Kïmwochï nyu pipö Penchamen lö, “Ape aghïpcheghö pareni sapipun asyepisyö.

²¹Nyini kasïwekwa tipïn cho pkono Syilo atö kïpironchö atoni kyomöy ichon, apkana parenichoni pö sapipun, aichït chi anka tïkwïl korkengu ompö tipichoni apa nko chane koro Penchamen.

²²Ato pka papotïnekwa anta werkökwa lö kirwokinokwa, olenchï, ‘Kaykay opïswecha ketïpinö nko chane, ompöwölo melö kikïpörunecha chane poryot kïlïkwï korucha amelö kyokonechakwa chane, nyo möle otïngetekwa lelut nyonikïny.’ ”

²³Kwigh lenyoni pïchay pö Penchamen, kuchïtyï kegh korukwa cho tenö chane, ompö tipichoni kipka kïpironchö, kwip akïpechï kegh kutang korengwa. Kïtek kanastinekwa ngat akïmöngisyö.

²⁴Kïpegha atoni pipö Israel akïpa wölo mi piko arengwa nko kaporkökwa ompö koroswekwa.

²⁵Kimöminye pöytoghintö koro Israel osiswechoni. Kigh chi anka tïkwïl kïgh nyo kisïwa lö karam ompö nyinte.