Read pokoot KIRWOKÏ 3 Bible Online

KIRWOKÏ 3 - pokoot bible

KIRWOKÏ 3

¹Achï nyu punton cho kipïsyï ECHOTYON korononi atö kïtyama pipö Israel cho kitomöcha kunkïtï poryot anka tïkwïl ompö koro Kanan.

²Kigh lenyoni atö kumï kunet pïnwöy löwïr cho pö Israel cho pkonöy wölo kïporyeghtoy ntökïmïr tya pich cho kitomöcha kïset lïk.

³Achï puntonichoni: pöytoghï mut cho pö pipö Pilisti nko pipö Kanan löwïr nko pipö Sidon kïmi nko pipö Ipiti cho kimöngöy kutïngkoti Lepanon, kïngeta kutïng pö Paal Ermon ntökwit Adoketpa Amat.

⁴Kïpïstö pïchoni atö ketyam pipö Israel ompö chane, atö kumï kunkïtï lö ekïrïpöy kirurut pö ECHOTYON cho kimwochï papotïnekwa kuwerï Musa.

⁵Kïlenyona kïmang pipö Israel nko pipö Kanan nko Ititi nko Amori nko Peris nko Ipiti nko Yepusi.

⁶Kwip tipiko pïchoni akuyilchï tipikwa werko pïchoni akïpöghisyechï tororötinekwa.

⁷Kwigh pipö Israel ngokï ompö tawu ECHOTYON kïwutyeghö ECHOTYON Tororötïngwa, otini kisagh körkeyïntino Paal* nko Asyera.*

⁸Kïlenyona kïngwanit nörekyo ECHOTYON lö kat ompö pipö Israel, akwigh chane kerïnta kïpöghisyechï pipö Israel Kusyan Risyataim pöytoghinto Mesopotamia könyis mut nko sömök.

⁹Wölo otini kirirchï pipö Israel ECHOTYON kïkïl nyinte chi nyo kisörï chane, chichoni kï Otniel wero Kenas, werto ompö Kalep nyo mïnïng.

¹⁰Kungwïnchï Mïkulöwu ECHOTYON nyinte, akurwokyï pipö Israel akïset lïk, kutö ECHOTYON Kusyan Risyataim pöytoghinto Mesopotamia morichi.

¹¹Kïnyorï korononi kalya könyis tömönut angwan, atolapay kïrapas Otniel wero Kenas.

¹²Kwigh pipö Israel ngokï ngat ompö tawu ECHOTYON. Kïlenyona kutö ECHOTYON Eklon pöytoghinto Moap owesyö kïrïnta pipö Israel.

¹³Kutuyö Eklon pipö Amon nko pipö Amalek kïporyeghö Israel, akïnam Yeriko, kanasyanta sos.

¹⁴Kïpöghisyechï pipö Israel Eklon pöytoghinto Moap könyis 18.

¹⁵Wölo otini kirirchï pipö Israel ECHOTYON, kïkïl nyinte chi nyo kisörï chane, chichoni kï Eud wero Kera nyo pö pipö Penchamen, chi nyo wachele. Kïyonta pipö Israel nyinte kwipchï Eklon pöytoghinto Moap ropöw.

¹⁶Kwighchï kegh Eud chok nyo ngatip wop tïkwïl nyo tenö koghïntanyi egh kïngata tököghögh, akïrötyï kïpestanyi nyo pö tagh akuyenö sïrenyi.

¹⁷Kwonkoghchï ropöwontonay Eklon pöytoghinto Moap, aki chi nyo narate nyoman Eklon.

¹⁸Kïkany kutötö Eud ropöwontonay, kiyomisöto pïchay kipu ropöwontononi.

¹⁹Wölo kïmïlegha nyinte wölini kimito körkeyïntinö ompö wölini le Kilkal, akïlenchï Eklon, “Otïngetan ngölyon nyo pö wïnyat nyo omwowunyi, we pöytoghin.” Kïlenchï pöytoghintonay mötworichi, “Osisyenö.” Kïnget pïchay löwïr.

²⁰Kïwö Eud kïrich nyinte ompö otini kimpuröy onkït konyi nyo mi parak nyo kaghït akïlenchï, “Kökonanïn Tororöt ngölyon nyo le nyengu.” Kïngeta pöytoghintonay ngacharunyi.

²¹Kingwïsuna Eud ewunyi löt chokonay mi kïpesunyi pö okumpö tagh, akïrït pöytoghintonay mu.

²²Kïlït chokonay muyenyi nko otini nömöy ewï, melö kitökïngwïs Eud chokonay ompöwölo kiyentö sunet, kïnyïrïtu kwan.

²³Atolapay kïwö Eud kïlït sany akïkörchï nyinte kö.

²⁴Kïkany nyini köwö nyinte kïlït sany, kïpka mötwori pöytoghintonay, kïlö kitomï kikïkar kukoti köyay, kïlenchï kegh töptoy mi kungöroköy kegh ompö kö nyo pö ori.

²⁵Kïköngisyö nyo kogh, wölo otini kimökïyatnye kukat, kïchengwï chane yotöwon akïyat. Kïlö kiros rïwöy echotyontengwa ngwïny kikïma.

²⁶Kurïp Eud otini kimi mötworichay kïköngisïyi, kuwerata wölay kimi körkeyïntinö akurïpchï wölnö le Seira.

²⁷Nyini kitïta wölini kukik ompö komoswo pipö Epraim, kïpka pipö Israel kïrökunö komos nko nyinte, akimi kuntöghoghchini chane.

²⁸Kïlenchï pïchay, “Arïpkanïn, ompöwölo kikutö ECHOTYON pungkökwa pipö Moap morikwa.” Kïlenyona kïrökï nyinte, kïpa akïnam ato kyoghyegho pipö Moap lalwa Yordan, akimöpïsyïcha ompö chi nyo le akonga kwoghyö.

²⁹Kïpar chane asisoni pipö Moap cho owesöch cho ngata 10,000 akimachïwïtnye nyo le ompö akonga.

³⁰Kïpayta nyu asisoni pipö Israel koro Moap. Kïnyorï korononi kalya könyis 80.

³¹Kintöghoghinte nyo kirïpta kï Syamkar wero Anat. Kipara nyinte köröyö pipö Pilisti cho le 600 akïsörï nyinte tïkwïl pipö Israel.