Read pokoot KIRWOKÏ 4 Bible Online

KIRWOKÏ 4 - pokoot bible

KIRWOKÏ 4

¹Kwigh pipö Israel ngokï ngat ompö tawu ECHOTYON otini kirapas Eud.

²Kïlenyona kutö ECHOTYON chane akutö mori Yapin, pöytoghinto Kanan nyo kipöytoy kanasyanta Asor. Kintöghoghchini Sisera pipö lïko Asor. Kimöngöy nyinte Arosyet Akoim.

³Kitïng Sisera nkaritin cho pö karïn cho le 900, akökikunyaril pipö Israel ompö könyis tömönut odeny. Kïlenyona kïrirchï pipö Israel ECHOTYON.

⁴Ki werkoyon Depora koko Lapidot aki mutinto ngal ompö Israel osiswechoni.

⁵Kimi kïnomnyö kïmutyini pich ngalekwa ompö ket pö sosyon nyo kimi kwenu Rama nko Petel koro komoswo Epraim. Kipustoy pipö Israel wölini kimi nyinte.

⁶Kuyoktö nyinte chi asistanka kïwö wölo mi Parak wero Apinoam nyo kimöngöy kanasyanta Kedes nyo mi koro Naptali akïlenchï, “Kamwa ECHOTYON Tororöt pö Israel lö, ‘Wïyö nko pich 10,000 cho pö pipö Naptali nko cho pö Saplon aimït chane kïrich kutïng pö Tapor.

⁷Omïtunan Sisera nyo ntöghoghchini lïko Yapin kungwïn nko nkarinechi nko pikachi cho chang atö kïporyö nko nyi ompö lalwa Kisyon, wölo otönan nyinte moriku.’ ”

⁸Kïlenchï Parak Depora, “Ato iwetenyi nko ani, owetan, wölo atomewetenyinye nko ani, kïmowetanye.”

⁹Kïlö, “Owetan nko nyi nyo mötïny, wölo melö nyorunonyi konyït panoni iwetenyi, ompöwölo töni ECHOTYON Sisera mori korka.” Atolapay kïngeta Depora ataye akïwö kutang Kedes nko Parak.

¹⁰Kïkur Parak pipö Saplon nko cho pö Naptali kïtuyechï Kedes. Kïpa pich cho le 10,000 kïrïp nyinte, akïwö Depora tïkwïl nko nyinte.

¹¹Kökipesyö nyu atoni Eper nyo kile chi pö Ken nko pipö Ken walaka cho pö ara Opap nyo kile kapikoyo Musa, kïwö akïtek emenyi wölo low, wölo mi ket nyo wow nyo mi Saananim atolekïtö Kedes.

¹²Otini kilïm Sisera lö köwö Parak wero Apinoam kïpus kutïng pö Tapor,

¹³kïghamït Sisera nkarinechi 900 nko pich löwïr cho kimi nko nyinte cho kipkono Arosyet Akoim ntökwit lalwa Kisyon.

¹⁴Kïlenchï Depora Parak, “Wïyö! Töni asisete ECHOTYON Sisera moriku. Mi ECHOTYON kuntöghoghunyi!” Kïlenyona kïwö Parak kïröytö ompö kutïng pö Tapor nko pikachi cho le 10,000.

¹⁵Otini kitor Parak kïporyö, kïkwanykwany ECHOTYON Sisera nko nkarinechi löwïr nko piko lïkenyi kïmïkul ompö ngwonïn pö poryot. Kïrokunö Sisera nkarinyi akurïpö kel.

¹⁶Kïyon Parak nkarinechay nko lïke kïmïkul ntökwit Arosyet Akoim, kepar pipö Sisera cho pö lïk kuwonyö, akimöngötïnye chi nyo le ompö akonga.

¹⁷Wölo kuperta Sisera ompö kel ntökwit ema Yael koko Eper nyo kile chi pö pipö Ken, ompöwölo kitïng Yapin pöytoghinto Asor kalya nko ka Eper chichoni pö Ken.

¹⁸Kiwö Yael akïtaroch Sisera akïlenchï, “Nyonö kö echotyontenyu wölo omitan amewöghisyö.” Kïwö wölini le emenyi kimi nyinte, kuyenö Yael Sisera sïra.

¹⁹Kïlenchï nyinte kokonay, “Kaykay konante pögh tïkwïte agha, ompöwölo kameghan ompö maral.” Kïchengwï kokonay mïkö nyo kimi chö akutö nyinte, kïlï atolapay kuyen ngat.

²⁰Kïlenchï kokonay, “Töpenö kuka ema, ato ngwïn chi akïtep lö, ‘Mi chi yete?’ Ilenchï, ‘Ewo.’ ”

²¹Otini kinam rïwönto nïkisïn pö aghacha, kïcheng Yael koko Eper owöwonto ema akïcheng kunyïk akïkantelta wölini kirïwöy chichay, kïwudö nyaghpagh kurel ngwïny kïma.

²²Kïlö Parak ato mi nyo kiyöronu Sisera, kïnyorï Yael kïtaroch nyinte akïlenchï, “Nyonö atoporun chichini imörenyi.” Kïwö nyinte kïlït emanay pö Yael, kïlö aros nkwanyï Sisera kima akïmi owöwonta nyo kirel nyaghpagh.

²³Kutö Tororöt asisoni pipö Israel kïrïnta Yapin pöytoghinto pipö Kanan.

²⁴Kwowesitu pipö Israel tya ompö Yapin pöytoghinto pipö Kanan ntökïtenö kuwany chane nyinte.