Read pokoot KIRWOKÏ 8 Bible Online

KIRWOKÏ 8 - pokoot bible

KIRWOKÏ 8

¹Atolapay kïlenchï pipö Epraim Kidyon, “Ne nyï keghwecha nyi, kilö ne tömekurechanyi atanye kiwetenyi iporyot nko pipö Midyan?” Kugheghchï chane nyinte nyoman.

²Wölo kïlenchï pïchoni, “Mi ne nyo kaghan nyo wow kïtïl nyo kaghakwa? Kegh pipö Epraim kïgh nyo wow tya kïrkegh kömïnïng, kïtïl nyo kegh ara Apieser.

³Akï ne akikutö Tororöt morikwa wowïntino lïko Midyan nko Sinay nko Seep? Möminye kïgh nyo kaghan kïtïl nyo kaghakwa.” Otini kiwang kïmwa ngalechoni, kuwonyö nörekyengwa.

⁴Kökikwitï atoni Kidyon lalwa Yordan nko pikachi 300 cho kimi nko nyinte, akökikwoghyö lalwanoni akitökïyonöy chane kïrkegh kikwam kömöy akwoghochö.

⁵Otini kitïta Sukot, kïlenchï piko kanasyantanoni, “Kaykay otönö piköchan makatin, ompöwölo kikwam kömöy akwoghochö chane nyoman, akwanyï omitan oyonotoy Sepa nko Salmuna, pöytoghi Midyan.”

⁶Wölo kïlö kintöghoghichay pö Sukot, “Kitöninecha piköku omisyö nyo pö ne akwanyï tomönye paranyi Sepa nko Salmuna?”

⁷Kuyokyï Kidyon pïchay lö, “Nya kïle! Wölo otini ketö ECHOTYON Sepa nko Salmuna morichan, omungonekwa sitit pö kato pö surkwen!”

⁸Atolapay kïngeta atoni akïpusta kanasyanta Penuel, akïmwochï piko wöloni le nyaye, wölo kuyokyï pïchay pö Penuel le nyaye kiyokyï pipö Sukot.

⁹Kïlenchï Kidyon pïchay pö Penuel, “Ato amïlan ompö kalya, ongwïnan orultoy pchörinï omitekwa oripsyegho!”

¹⁰Kimi Sepa nko Salmuna atoni Karkor nko piko lïkengwa cho ngata 15,000 cho kingötunö pipö kongasis. Kepar cho le 120,000.

¹¹Kïwö Kidyon kïpusta ara pich cho kimöngöy emen cho kimi Nopa nko Yokpea okumpö kongasis, kumir pipö lïk cho kimi wöloni akïpar.

¹²Kupertoy pöytoghichay pö Midyan le odeny, Sepa nko Salmuna. Kïyon Kidyon chane ntökïnam akïkwanykwany piko lïk löwïr.

¹³Atolapay kïmïlegha Kidyon wero Yoas wölini kikïporyegho, akïwö kïpusta adoketpa Eres.

¹⁴Kinama wöloni karachïninto pipö Sukot akïtepa ngal. Kukirchï karachïnintonay Kidyon kaynötut pö pich cho kile yetïntin nko poyi kanasyanta Sukot. Kilïkwï pïchoni 77.

¹⁵Atolapay kïwö Kidyon wölo mi pïchay pö Sukot akïlenchï, “Ononekwa atakinya kyataghakwa otönö omisyö piköchan cho kyoghochö akwam kömöy ompöwölo kitomönye aparan Sepa nko Salmuna. Achï ye nyu chane!”

¹⁶Atolapay kïcheng sitit pö kato pö surkwen akïmungö kintöghoghichay pö Sukot.

¹⁷Akurultö pchörï nyo kïripsyegho nyo pö Penuel, akïpar piko kanasyante.

¹⁸Atolapay kïtep Kidyon Sepa nko Salmuna lö, “Kinenach pïchanya kyaparekwa wölnö le Tapor?” Kuyokyï lö, “Ki pich cho kilata nyi. Kikarkegh chane nko werpö pöytoghin.”

¹⁹Kuyokyï Kidyon pïchay lö, “Ki werköcha chane, chini pö muyeto yonyan. Nyo owolwolan ye ompö tawunkwa lö, ‘Ntökile nyo kyopïstekwa chane mapar, kötömopörokwanye.’ ”

²⁰Atolapay kïlenchï Yeter nyo kile poretyenyi, “Ngeta, para pïchï!” Wölo kuwagh kïngwïsï chokenyi, ompöwölo kitökïmïnïng.

²¹Kïlenchï Sepa nko Salmuna Kidyon, “Ngetunö nyo le nyi parecha, ompöwölo ichinyi mïrön.” Kïlenyona, kïnget Kidyon akïpar pïchay akïpït karikwa cho pïchighöch cho kikïrötyï kotwoni tamasayikwa.

²²Kïlenchï pipö Israel Kidyon, “Lïkuna pöytoghintencha nko werïngu nko moneko werïngu tïkwïl, ompöwölo kesörwechanyi kepkanena mori pipö Midyan.”

²³Kuyokyï Kidyon lö, “Melö opöytonokwa, anta werïnyan. ECHOTYON nyinte nyo pöytonokwa.”

²⁴Atolapay kïlenchï Kidyon pïchay, “Otïngetan kïgh akonga nyo osomokwa lö, okonanïn taghoy pö yitïn cho kyopörukwa.” (Ompöwölo ki otöp nyo kipö pipö Ismael kulach taghoy pö koltin.)

²⁵Kuyokyï pïchay lö, “Kïkonunecha ompö ngörekyö.” Kukorkorchï sïra ngwïny akïwirï taghokökwa cho kile ropöw,

²⁶cho kingata kilen tömönut odeny, kïsis kari walaka cho kiloköy nko sanay nko sïro cho karkegh nko akwa lamay cho kiloköy pöytoghi Midyan nko sïrïmtin cho kimi kotwoni tamasayikwa.

²⁷Kwigha Kidyon körkeyïn karichoni pö koltin akutö kanasyantenyi nyo kimi Opra. Kïlïkwï pipö Israel kalomak akïsagh körkeyïntin, kïlïkwï nyoni ngöghöp ompö Kidyon nko piko konyi.

²⁸Kïlenyona kïrïnta pipö Israel pipö Midyan ntömökumïcha kïporyö ngat. Kïnyorï korononi kalya ompö könyis tömönut angwan ompö osiswo Kidyon.

²⁹Kïmïla Kidyon ngat kïwö kïmang katanyi.

³⁰Kitïng Kidyon werkachi cho le 70, ompöwölo kip kor cho chang.

³¹Kiyichï chemïnïngwenyi* nyo kimi Syekem nyinte worö, kïkurö kaynenyi Apimelek.

³²Kïrapas Kidyon wero Yoas otini kikïyosit nyoman, ketïpchï pïrïmpeto kwanta nyo kimi Opra nyo pö Apieser.

³³Otini kirapas Kidyon, kïwöghökisyö ngat pipö Israel lawel kïlïkwï kalomak akïsagh Paal.* Kwigh Paal Muma[4] kïlïkwï tororötïngwa.

³⁴Akimökunancha chane Tororötïngwa nyo kisörunö pungkökwa cho kimang kuwit chane.

³⁵Melö kisyonchï monïngo Kidyon ompö tïkwïn cho karamach cho kighchï Kidyon pipö Israel.