Read pokoot NGONGUT 1 Bible Online

NGONGUT 1 - pokoot bible

NGONGUT 1

¹Achï ngal cho kingongï Yeso Kristo,* cho kitö Tororöt nyinte tökuporchï mötworichi ngal cho ighisyot ato lekït nyo mötïny. Kiyonï Kristo malaykayantenyi atökuporchï mötworintenyi Yoana ngalechoni,

²kïmwowï nyu Yoana nyinte ngalechini löwïr kisïwa nyinte, akwompö paraku ngölyonto Tororöt nko ngala man cho kingongï Kristo Yeso.

³Soyönote chi nyo somönöy kitapunï akusoyönote pich cho lïmöy ngalechï pö werkoynön akïrïpöy lenyini kikikirchï orinyi, ompöwölo kikïlekïtit ato ighisyot ngalechï.

⁴ Ani Yoana nyo kokirchï palalyantanï kanisen mut nko odeny cho mi koro Esya. Nya kïtöpö pöropchö nko akwa nko kalya nyo ngwïno Tororöt nyo mi akï nyo kimi akï nyo tökungwïnöy nko cho pkono wölo mi mïkulis cho le mut nko odeny cho mi tawu ngacharunyi pö paytagh,

⁵ nko cho pkono Yeso Kristo, söwin nyo ghanate nyo pö tagh kututunö ngwen akï nyinte nyo pöytoy pöytoghi ngwïny kïmïkul. Chömecha nyinte akutyakecha ompö meghenyi kengetunenö rötut pö ngokicho

⁶ akwighecha kelïkuna tïsï cho pöghisyechini Paponyi Tororöt. Nya nyu kïpöyit ororyö Yeso Kristo nko owesyö, kokay nko kokay! Amen.

⁷ Arose anyinö ngwïno poltoy! Akïsïwïyi chi anka tïkwïl nyinte nko ompö pïchini kipïsïgh nyinte. Teghsot puntoni ngwïny kïmïkul ompö nyinte! Lïku nyoni ngalechï nyo mötïny! Amen.

⁸ Mwoghöy Echotyon Tororöt Kimuktoghin, nyo mi akï nyo kimi akï nyo tökungwïnöy lö, “Ochan nyo pö tagh nko nyo pö löt.”

⁹Ochan werïnkwa Yoana nyo oghömöy nyarïlwok ompö mïkukönöt nko akwa, cho nyoru pich cho kikïghömö nko Yeso akïpöyit Pöyunötenyi ompö. Kikitönanïn Patmos kor nyo kikwen nanam, ompöwölo kyomtonan ngölyonto Tororöt asöwintönchini Yeso.

¹⁰Ki asispa Echotyon atoni kïnamanïn Mïkulögh alïman kut nyo wow nyo kichögh le kontï ompö lötunyan,

¹¹nyo kilentöy, “Kirchinö kitapï ngal cho isïwïyenyi aipchï kanisenichay le mut nko odeny, kanisa: Epeso nko Smurna nko Perkamo nko Tuatira nko Sardis nko Piladelpia nko Laodikea.”

¹²Awaghakan lö tasïwa chichï köngölonwanïn, asïwan keti tatïn mut nko odeny cho pö koltin

¹³ akimi kwenungwa kïgh nyo kilata chi ato kirosöy, kiloköy sïra nyo kogh nko angwa nyo kikigha koltin nyo kirat kuwit takatenyi.

¹⁴ Ki relach putechi löpöt, akilata konyichi lyopöt pö ma

¹⁵ Kilata kelyechi taghoy cho kikïsit nyoman, le cho kikisïta ma kïtïlilöchtu, kikarkegh kutinyi nko kiwumöto puseryon.

¹⁶Kinömo ewunyi nyo pö tagh kokel mut nko odeny, atolapay kungwïna kutinyi chok nyo ngatip woptine kwodeny. Kilïwu tokochunyi le asis nyo ngwan.

¹⁷ Otini kyasïwan nyinte, opïtyan kelyechi le chi nyo kima. Kukanaghanïn ewunyi nyo pö tagh akïlö, “Mewöghisïyi! Ochan nyo pö tagh achï nyo pö löt.

¹⁸Ochan nyinte nyo satate! Kikyameghan, wölo ochan ye satate kokay nko kokay. Otïngetan owesyö ompö meghat nko ngwen.

¹⁹Kira nyu tïkwïn cho isïwïyenyi, tïkuchï mi ye nko cho tökïpkonöy ato le löt.

²⁰Anyï nyu wïngutyo kokelyechï le mut nko odeny kesöchinyi ewunyan pö tagh nko kelyechay pö tatïna le mut nko odeny: kokelyechay le odeny, kï kanisen mut nko odeny: kïkany kelyechay le mut nko odeny pö tatïn, kï kanisenichï le mut nko odeny.