Read pokoot NGONGUT 10 Bible Online

NGONGUT 10 - pokoot bible

NGONGUT 10

¹Atolapay asïwan malaykayante anka nyo awes nyo kirökuno yïm. Kikilokyï polta nyinte akemirö kïtompïl mötïnyi. Kikarkegh tokochunyi nko asis, akilata kelyechi pchörino ma.

²Kitïng ompö ewunyi kitapï nyo mïnïng nyo yatate. Kikanagh keltanyi nyo pö tagh nanam, kukanagh keltö nyo pö löt kor wölo tïyame

³atolapay kïkursyö ompö kut nyo wow nyo kilata tïlöto ngötïny. Kikany otini kimi kïkursïyi, kïtïl yïmö kïnyïl mut nko odeny pö nyo wow ompö ngitönö.

⁴Akwotini kimuchö tïlonay, amakan akir ngal cho kïmwoghöy tïluchoni wölo alïman kut nyo kingwïno yïm nyo kilö, “Ikany kïwïngisyö ngalechona kamwa tïlutchona le mut nko odeny, mekir!”

⁵Atolapay asïwan malaykayantanay kighyongo nanam nko kor wölo tïyame kïsyolöy ewunyi nyo pö tagh kutang yïm

⁶akwama muma kaynata Tororöt nyo satate kokay nko kokay, nyo kigh yïm nko ngwïny nko nanam nko kïgh anka tïkwïl nyo mi oringwa. Kïlö malaykayantanoni, “Kikuwonyö osiswö cho kïköngöy lö oyï ato ighöy Tororöt tïkwïn cho kikikïtat!

⁷Wölo otini kakut malaykayanteto mut nko odeny kontinyi, kupuntö Tororöt tötutyenyi nyo wïngate, le wölini kimwochï nyinte mötworichi cho le werkoy.”

⁸ Atolapay kïngölonwanïn ngat kutinay kingölonuno yïm lö, “Wïyö aicheng kitapï nyo yatate nyo mi ewu malaykayantaninö ghyongo nanam nko kor wölo tïyame.”

⁹Owan nyu wölo mi malaykayantanoni amwochan kïkonanïn kitapunoni mïnïng. Kïlenchanïn, “Chenga aiyam, ngwonitu ompö muyengu, wölo onyïnitu le kumat ompö kutingu.”

¹⁰Achengan nyu ewu malaykayantanoni kitapunoni mïnïng atolapay aman. Kyanyïn le kumat ompö kutinyan, wölo otini kyanyïkwïdan, kïngwanit ompö muyenyan.

¹¹Atolapay kelenchanïn, “Mïchininyi ngat omchinö pich lö ne nyo kitötyï Tororöt pipö koros cho chang cho ngölonöy kutïw cho sisinchö nko pöytoghï lapay.”