Read pokoot NGONGUT 13 Bible Online

NGONGUT 13 - pokoot bible

NGONGUT 13

¹ Atolapay asïwan tyony nyo kipusuna nanam nyo kitïng kuy taman nko mötöw mut nko odeny, akitïng kuyöghö anka tïkwïl tentenyi. Kikirchï kaynata kimwoghsyö mötöwechoni.

² Kilata möril tyonyoni, wölo kilata kelyechi kelyo chepökerï, kïlata kutinyi nyo pö ngötïny. Atoni nyu kutö ntaranay tyonyoni owesyenyi nko ngacharu paytaghtanyi nko owesyö nyo wow.

³Kirumunote mötït akong nyo pö tyonyoni lö kikikekotön nyoman, wölo kikakïsop moye. Kïtöngönchï pipö ngwïny kïmïkul akïrïp tyonyay.

⁴Kïsagh chane lapay ntaranay ompöwölo kitö owesyenyi tyonyoni. Kisagh pich tïkwïl tyonyoni kilenchini, “Ngo nyo awes le tyonyï nya? Akï ngo nyo muköy kïporyö tïkwïl?”

⁵ Atolapay kepïsï tyonyay kïngalan ngala kinisanat nko cho mwoghöy Tororöt akechömchï kïsïch owesyö nyo pö aro cho le 42.

⁶Ompö atoni nyu kutor kumwa Tororöt nko kaynenyi nko wölini möngöy nyinte nko chane löwïr cho möngöy yïm.

⁷ Kechömchï tyonyay kïporyeghö pipö Tororöt ntökïrïnta aketö owesyö kïpöyï pipö puntoni ngwïny löwïr nko ortïn nko kutïwa pich löwïr.

⁸ Soghöy pich cho mi ngwïny tyonyoni, kïpoto chona kikekirchï kaynötutkökwa kitapu söpon kïngeta towunöto ngwïny, nyoni kï kitapu Wawa Kech nyo kikïpar.

⁹Ato itïng chi yit ilïm!

¹⁰ Chi nyo kakemutyï kenam akewuw, kenömöy akewuwöy lenyoni nyo mötïny. Akwanka tïkwïl nyo kakemutyï kepara chok, kepöro chok nyo mötïny. Kïlenyona, mïchini pipö Tororöt kïmïkukön ompö kighanat.

¹¹Atolapay asïwan tyontö anka nyo kimi kïpusuno ngwïny. Kitïng kuy odeny cho kilata kuyo wawa makal akïngölonöy le ntara.

¹²Kipöghisyeghö nyinte owesyö nyo wow tya nyo kipö tyonyay pö tagh ompö otini le tawunyi. Kuchikyï ngwïny nko lapay cho mi orinyi kïsagh tyonyaye pö tagh, nyanya kökikïsöp moyenyi.

¹³Kigh töngönchin cho owesöch tyonyoni pö odeny. Kigh ma kirökunö yïm kïrökyï ngwïny ompö tawu pich lapay.

¹⁴Atolapay kïlïs pich löwïr cho mi ngwïny ompö owesyo töngönchin nyo kikitö nyinte kwigha tawu tyonyay pö tagh. Kïmwochï tyonyay pipö ngwïny kwigh körkeyïn nyo kïsölo tyonyay kökiketörö chok akïsöp.

¹⁵Kikïchömchï tyonyay pö odeny kumunchï kimïny pö söpon körkeyïnay pö tyonto tagh, atökumï körkeyïnay kïngalan akïtïgh pich lapay cho kitagh kïsagh nyinte.

¹⁶Kuchikyï tyonyay pich löwïr, cho echön nko cho mïnkech, monkor nko mey, sekey nko cho melö sekey ketö machey ewunekwa cho pö tagh anta tokochwekwa.

¹⁷Kimemukönye chi kwal kïgh anta alta kïpoto ato tïng nyinte macheyunoni, nyoni kï kaynata tyonyay pö tagh anta nampa nyo keröy otini mi kaynenyi.

¹⁸Mïchini nyu ompö atoni kïpöghisyeghö chi ngöghomnyö! Anka tïkwïl nyo ngöghom kumuköy kunkïtu nampa nyo pö tyonyoni, ompöwölo poru lö kaynata chi nyoni. Nampanoni kï 666.