Read pokoot NGONGUT 18 Bible Online

NGONGUT 18 - pokoot bible

NGONGUT 18

¹Kïkany asïwan korkonay kitöpo tyonyay pïrir, asïwan malaykayante anka kirökuno yïm. Kitïng owesyö nyo wow, akulïwchï ororyenyi ngwïny kïmïkul.

² Kuta ompö kut nyo wow lö, “Kikïrul! Kikïrul Papilon nyay wow! Kasor kïmang orinyi oy nko mïkulis cho le sïmnyon. Kalïkwï wölo wïnchini kegh mïkulis nko törit cho le sïmnyon.

³ Ompöwölo kikigh pipö punton löwïr kitömesyeghö kumi pïrchin pö cheporesnanenyi. Akikwigh pöytoghi ngwïny cheporesnan nko nyinte, kïmökosöchitunö mïnchïrïs pö ngwïny pïrchinoghtanyi nyo kingwïna mïrö.”

⁴ Atolapay alïman kuti anka nyo kingwïna yïm nyo kilentöy, “Ongetunenö pikachu wölo mi nyinte! Ongetunenö kanasyanta Papilon! Tömagh ngokï tïkwïl nko pipö kanasyantanoni, atömonyorï sito Tororöt nyo nyoru chane!

⁵ Ompöwölo kakïchangit ngokichi tya akïpas kegh ntökwit yïm amöwutyeghonye Tororöt ghöyityenyi.

⁶ Oghchinö Papilon le wölo kighchï pikö walaka, mïchini ompö oghokyinö nyinte cho ghach tya kïnyïl odeny chinö kighchï pikö walaka. Ayina kölöwenyi kumïn cho ngwonöch kïnyïl odeny chinö kiryökï pikö walaka.

⁷ Kïle wölini kikwol kegh lö ochï wow, akïpagha kegh tïkwïn cho chang, otö nyinte kichopat nko nyarïl nyo wow kïtenö nyoni. Mi nyinte kïmwogho mïkulöwunyi lö, ‘Ochan pöytoghin nyo otöpo ngachar, mochanye mïsïk amönyorwanïnye nyarïl.’

⁸Kïlenyona chumchini nyinte nyarïl asis akonga, sömewut nko sönönöt nko kikar, kïpelöy nyinte ompö ma kuwonyö, ompöwölo awes Tororöt nyo rwokyini nyinte.”

⁹ Rirchini akïlokyï kanasyantanoni pö Papilon pöytoghi ngwïny cho kigh cheporesnan akïlït lö tïrpïl ngala pïrchin anka tïkwïl nko nyinte ato sïwa ighot kanasyantanoni kïnöghöy.

¹⁰Ghyongo pöytoghichoni ato low, ompöwölo wöghöy lö nyorwech ana nyarïl pö kanasyantanoni akïlö, “Heywey! Nyarïl nyo tya nya wey ompö kanasyantanï wow pö Papilon! Ompöwölo ketunyi lawel nyarïltangu ompö kirwoko Tororöt!”

¹¹ Rirchini akïlokyï mïnchïrïs pö ngwïny tïkwïl nyinte, ompöwölo mököminye chi ngat nyo tökwolöy tïkukwa,

¹² mökïminye chi nyo tökwolöy koltinekwa nko silpenikwa, koghikwa cho pö olyot nyo wow nko sanayikwa cho karamach nko sïrokökwa cho pö katani cho pïchighöch cho lata munyantengwa akwa lamay nko cho pö aririn cho pïröch lötok nko ket nyo karam tïkwïn lapay cho kikigha kela pelöw nko tïkwïn lapay cho kikighan ket cho pö olyot nyo wow tya nko cho pö taghoy nko cho pö karïn nko cho pö senkwet.

¹³Tïku walaka kï ompö kinamon nko tïkwïn cho kyonyïnito omisyewut nko köröstin nko mwagh nyo kiyiltoy nyo ngutoy nyo karam nko dipay* nko mwagh nko pïsya nkanun nko tïch nko kechir nko angoletin nko nkarinekwa nko, sekeykökwa chini le pich söpsot.

¹⁴Lenchini mïnchïrïschoni kanasyantanoni, “Kikïpa lö weng tïkuchay kikönenyi lö tosïch akikuwonyö mökosyengu nko tïkwïn cho kipïchighonyi kegh amenyorunenyinye tïkuchoni ngat!”

¹⁵ Ghyongo ato low mïnchïrïschoni kimökosöchitunö kanasyantanoni, ompöwölo wöghöy lö nyorwech ana nyarïl pö kanasyantanoni. Riryot chane akïlokyot

¹⁶kïlentöy, “Heywey! Nyarïl nyo tya nya wey ompö kanasyantanï wow! Kikinaghanyi ilokyï kegh sïro pö katani cho pïchighöch cho lata munyantenyi akwa lamay nko cho pïröch, aimineni kegh koltin nko koghïn cho pö olyot nyo wow nko sanay cho pïchighöch!

¹⁷ Anyï ye lawel kangeteninyi mökosyengu lö weng!” Atolapay kughyongö low ipi melin löwïr ato nko rutoghotkökwa nko pich löwïr cho sïngo ighisyö nanam ompö melin atökïnyorï omisyengwa,

¹⁸akïlokyï otini kisïwa kanasyantanoni kïnöghöy akïlö, “Akï kanasyan ne nyo kikongityot nko kanasyantanï wow pö Papilon nya?”

¹⁹ Kïlösyï mötöwekwa terït akïlokyö akuteghyö kïlentöy, “Heywey! Nyarïl nyo tya nya wey ompö kanasyantanï wow! Kanasyan nyete nyo kinyorchï mökosyengwa pich cho pochï melin ompö mökosyenyi! Anyï ye lawel kapegha tïku lö weng!”

²⁰ Ngaraka yïmö ompö kiwurata Papilon! Ongörekyenö pipö Tororöt, kiyoktoghï nko werkoy! Ompöwölo kakurwokyï Tororöt nyinte ompö tïkwïn cho kighwakwa!

²¹ Atolapay kïcheng malaykayan nyo awes kogh nyo wow akïwirchï nanam, akïlö, “Nka nyete wölo kirultoy kanasyantanï wow pö Papilon, amelö tökesïwïyi nyinte ngat.

²² Amökelïmonye oringu ngat pich cho pïtöy pïkantis nko tumï nko cho kutöy pkurerun nko kontin! Amökïminye tïngana anka tïkwïl nyo ighöy tïkwïn cho kyoltoy ompö oringu ngat. Amelö tökelïmoy oringu chöghöto koghpa pagh ngat!

²³Melö tökesöchini löpoyïn pö töpewö oringu ngat amelö tökelïmo kutïwa pipö kensyö oringu ngat. Ki echön tya mïnchïrïsköku kïsir walaka ompö ngwïny kïmïkul, ailïsenyi chemöwosnönengu pipö ngwïny kïmïkul!”

²⁴ Kikinyaril Papilon ompöwölo kikïsöchï kisön pö werkoy nko cho pö pipö Tororöt nko cho pö pich cho kipar nyinte ompö ngwïny kïmïkul.