Read pokoot NGONGUT 19 Bible Online

NGONGUT 19 - pokoot bible

NGONGUT 19

¹Kïkany kïngalan malaykayantanay awes kumuchö, alïman kïgh kichögh le kuti söpïch nyo mi yïm, nyo kilentöy, “Nya kïsala Tororöt! Köpöyit sörunötö nko ororyö nko owesyö Tororötïncha!

² Ompöwölo pö man akutenate kirwokutkachi! Kakurwokyï nyinte cheporesnay wow kiwura ngwïny cheporesnanenyi. Kechop kong Tororöt ompöwölo kipar nyinte mötworichi.”

³ Kuta söpïchay ngat lö, “Nya kïsala Tororöt! Pusöy parak ighononi ngwïno kanasyantanoni nöghöy kokay nko kokay!”

⁴Kupïtyï ngwïny poyichay le 24 nko tyonchay söpchote le angwan akïsagh Tororöt nyo kitöpo ngacharenyi nyo pö paytagh akïlö, “Amen! Nya kïsala Tororöt!”

⁵ Atolapay kungwïna kut ngacharunoni pö paytagh nyo kilö, “Asala Tororöt akwa lapay cho ochï mötworichi, akwa cho ochï pikachi, cho mïnkech nko cho echön, akwa cho okonyïtöy nyinte!”

⁶ Atolapay alïman kïgh kïchögh le söpïch nyo wow, kichögh le puseryon nyo wow nyo soytegho ghatoy, chöghöt nyo kilata tïlöto ilat nyo wow akï nyo lentöy, “Nya kïsala Tororöt! Ompöwölo pöytoy lapay Echotyon Tororötïncha nyo le Kimuktoghin!

⁷Nya keturonchenö akengörekyö. Kesala nyinte ompö ororyenyi nyo wow! Ompöwölo kikwitï kensyo Wawa Kech akakwigh kegh mïrare.

⁸Kikïchömchï Tororöt mïraranoni kulach sïra katani nyo pïchigh nyo kwerkweröy.” (Sïranoni pö katani pïchigh kuporu ighisyewut cho karamach cho kighöy pö pipö Tororöt.)

⁹ Atolapay kïlenchanïn malaykayantanoni, “Kira ngalechï: Soyönote chane cho kakekurchï akorpa kensyo Wawa Kech.” Akïlenchanïn ngat, “Ngala man chete cho kökonï Tororöt man.”

¹⁰Opïtyan kelyechi tasagh nyinte, wölo kïlenchanïn, “Ewo, mesoghanïn! Ochan mötworin nyo karkegh nko nyi nyo pöghisyechini Tororöt nko tupcheniku cho kikesöwintönchï tïkwïl man nyo kingongwech Yeso. Sagha Tororöt!” Ompöwölo kïgh nyo töni werkoy owesyö kwamta ngölyonto Tororöt kï man nyo kingongwï Yeso.

¹¹ Atolapay asïwan yïm kïyata, atanganyan asïwa angole nyo rel. Kikïkuro chichinö kiwegho angolenoni, “Nyo ghanate akï pö man.” Rwokyini nyinte pich ompö man akïsetöy kïporyegho pungkachi.

¹² Kikarkegh konyichi nko lyopöt pö ma, akilokyï mötïnyi tenten cho chang. Kitïng kaynat nyo kikikirchï portanyi, wölo kimöminye chi nyo kinkït kayne kïpoto nyinte onkït.

¹³Kilach nyinte sïra nyo kipïririt ompö kisön, akikïlentöy kaynenyi, “Ngölyonto Tororöt.”

¹⁴Kirïp nyinte lïkos pö yïm cho kipegho angoletin cho relach akuloköy sïro pö katani cho karamach cho relach löka akï cho tïlilöch.

¹⁵ Kichumuna kutinyi chok nyo ngatip nyo kipöghisyeghö kirïnta pipö koros. Pöytoy nyinte chane ompö köromnyö akïpïröy pögho sapipun ompö wölo kïpïro dipay* cho pö nörekyo Tororöt Kimuktoghin.

¹⁶Kikikir sïrenyi nko kelytanyi kaynanï, “Pöytoghinto pöytoghï akï Echotyonto echot.”

¹⁷ Atolapay asïwan malaykayan nyo kighyongo paraku asis akïkur ompö kut nyo wow mötony kïmïroy poltoy lö, “Apkana! Oghömitinö kegh akor nyo wow nyo pö Tororöt!

¹⁸Apkana ama panya porwöyi pöytoghï nko cho pö yetïntino askarin nko cho pö nyökon, panya angoletin cho pö pich cho pegho angoletinechoni nko panya pich löwïr, kö sekey anta ewo, kö mïnkech anta kö echön!”

¹⁹Atolapay asïwan tyonyay nko pöytoghi ngwïny kïpka nko lïkenikwa akuryam atökïporyeghö nyinte nyoni kiwegho angole nko lïkenyi.

²⁰ Wölo kenam tyonyay nko werkoyontonay pö putintön, nyay kighöy töngönchin ompö tawunyi. (Ki tïkuchoni pö töngönchin cho kilïsa nyinte pïchay kitïng macheyu tyonyoni nko walaka tïkwïl cho kisagh körkeyïnto tyonyoni.) Kikïnam lenyoni akewirchï kïtökïsöpsot kwodeny nanampa ma nyo ngwan lakat nyo nöghöy nko koghïn cho nöghsot.

²¹Atolapay kepara lïkenikwa chokonay kichumuno kuti nyinte nyoni kiwegho angole. Kwaketa nyu mötonywö kwam mïntïrïchtino pïchoni ntökïpïghyö.