Read pokoot NGONGUT 2 Bible Online

NGONGUT 2 - pokoot bible

NGONGUT 2

¹“Kirchinö malaykayan nyo pö kanisa Epeso lö, ‘Anyï ngölyon nyo ngwïno nyinte nyo nömöy kokelyechay le mut nko odeny, ompö ewunyi nyo pö tagh akïwestegho kwenu ketï pö koltin le mut nko odeny cho ghyongo tatïna.

²“ ‘Onkïtön otöptöngu, ankïtön wölo inoghyeghtonyi kïlïkwï nko wölo imïkuköntonyi. Onkïtön lö itöghenyi pich cho le mwokïyis, aityömenyi cho ighöy kegh lö kïchï kiyoktoghï akwachï menkacha, akinkïtunyi lö putï chane!

³Onkïtön lö kimïkukönenyi nyoman, aiwongwï ompö ani akïtomönye aghachanyi.

⁴Wölo otïngetan ngölyon akonga ompö nyi, kipïstenyi chomyengu nyay kïpö tagh.

⁵Nana nyu wölini kipïtïtenyi! Kötenö ngokiku aigh ighisyewut chini kighenyi tagh. Wölo ato mekötenyinye ngokiku, otunan wölo iminyi, anateghan kelto tayengu ompö otanyi.

⁶Wölo mi kïgh nyo isïkonyi chömchin, kitaghanyi ighisyewut pö Nikolaytin, cho otöghan ante tïkwïl.

⁷ “ ‘Ato itïng chi yitïn, ilïm ngal cho mwochini Mïkulögh kanisen! Otöninan nyinte nyo rïntoy kwam okinto ket pö söpon nyo mi ka Tororöt.’

⁸ “Kirchinö malaykayanta kanisa Smurna lö, ‘Anyï ngölyon nyo ngwïno nyinte nyo pö tagh akï pö löt, Alpa nko Omeka nyo kima akïsöpöy ngat.

⁹Onkïtön nyörilwokökwa nko chopatengu, wölo ichinyi sïkön, ankïtön ngalechoni ghach ngöloneninyi pich cho lentöy kïchï pipö Yaudi amenkacha, pö chane Onyöt!

¹⁰Meway kïgh nyonikïny nyo mach kwipunyi nyarïl. Rosa! Työmokwa Onyötö akïtorchokwa chela, akechopokwa kong osis taman. Alïkwï cho ghönote ompö ani, kïrkegh meghe, ato konok tenta söpon.

¹¹Ato itïng chi yitïn, ilïm ngal cho mwochini Mïkulögh kanisen! Melö nyoru ngwonïn pö megha odeny pich cho rïntoghisïyi.’

¹²“Kirchinö malaykayanta kanisa Perkamo lö, ‘Anyï ngölyon nyo ngwïno nyinte nyo tïng chok nyo ngatip wop tïkwïl.

¹³“ ‘Onkïtön wölo imöngenyi, wölo mi ngacharu Onyöt nyo pö paytagh. Irïpenyi ngalechan nyoman amelö kipïstenyi kighanatengu ompö ani, ompö osiswechanye kipar kipöroy pich Antipa söwintenyan nyo ghanate, kikïpara nyinte kwenunkwa wölini möngöy Onyötö.

¹⁴ Wölo mi ngala tïkwïte cho otïngetan ompö nyi mi pich kwenunkwa cho rïpöy kinetut pö Palaam nyo kinet Palak kïkïnkïn pipö Israel kwigh ngokï kwam omisyewut cho kikïropchï körkeyïntin, akunet chane kwigh cheporesnan.

¹⁵Kïlenyona tïkwïl, imitenyi nko pich cho rïpöy kinetut pö Nikolaytin.

¹⁶Kötenö ngokiku! Wölo ato mekötenyinye lenyoni, otunan lawel wöloni imitenyi atoporyan nko pïchoni ompö chok nyo ngwïno kutinyan.

¹⁷ “ ‘Ato itïng chi yitïn, ilïm ngal cho mwochini Mïkulögh kanisen! Otöninan chi nyo rïntoy kwomöy mana cho wïngote. Otöninan nyinte tïkwïl kogh nyo rel nyo kikikirchï kaynat nyo rel nyo menkïtnye chi anka kïpoto chichini onkït kitöni.’

¹⁸“Kirchinö malaykayanta kanisa Tuatira lö, ‘Anyï ngölyon nyo ngwïno wölo mi Wero Tororöt nyo lata konyichi lyopöto ma akïlata kelyechi tay nyo kikïsit nyoman.

¹⁹“ ‘Onkïtön ighisyewutköku nko chomnyengu nko kighanatengu nko pöghisyengu nko mïkukönötengu. Okïtön lö imitenyi inoghyot kitïl panto tagh.

²⁰ Wölo otïngetan ngölyon ompö nyi: iterchinenyi kokonï le Yesepel ighöy kegh lö ochï werkoyon. Kunet mötworichan kipotöt, kwigh cheporesnan akwam omisyewut cho kïropchini körkeyïntin.

²¹Kyotönön nyinte pöroyïn nyo löstegho ngokichi, wölo katagh nyinte kïpïstö otöptanyi nyo pö cheporesnan.

²²Kïlenyona, owirenan nyinte kosotyö nko pich cho ighöy cheporesnan tïkwïl. Anta manyona kikötö akïpïstö ortïnekwa cho ghach.

²³ Opöran pich löwïr cho le rïpankachi atökunkïtï kanisen löwïr lö onkïtön kinonut pö pich löwïr nko mïkuliskökwa. Oghokyinan chi anka tïkwïl ompö chane kïrïp kegh nko ighisyewukachi.

²⁴“ ‘Wölo tomönye arïpakwa walaka ompö akwa omö Tuatira kinetutchoni ghach. Tomönye anetakwa kegh tïkwïn cho kuro pich “Wïngut pö Onyöt cho pö ori!” Nyo omwowokwa lö melö totönan nïkisïn anka parakunkwa

²⁵wölo inan chi lasiny kïyoni otïngetö ntökïtenö atwan.

²⁶ Otöninan nyinte nyo rïntoy akïrïpöy ngalechoni ntökwit söröm, owesyö kipayta pipö punton.

²⁷Otöninan chane owesyö nyo kyosïkan Paponyu kïpaytegha pich lïpö karïn atökulï chane kïghyösyö le töreni mönö,

²⁸atöninan chane tapogh.

²⁹Ato itïng chi yitïn, ilïm ngal cho mwochini Mïkulögh kanisen!’