Read pokoot NGONGUT 20 Bible Online

NGONGUT 20 - pokoot bible

NGONGUT 20

¹Atolapay asïwan malaykayan kïrökuno yïm nyo kitïng ompö ewunyi yotöwonto ngwen nko sïrïmnyonto karïn nyo anger.

² Kïnam ntaranay moroyonanya kipö könyisyok, nyaye le Onyöt akï Oyin. Kinam akïrat nyinte könyis elpu akonga

³akuchoytö kïröytö ngwen akïkörchï wöloni akutö kïgh kuke nyo por lö puryö chi nyo yotöy. Kikïkörchi wöloni Onyöt atömökumï ngat kïlïs pipö ngwïny ntökïtenö kuwonyö könyiswechoni le elpu akonga. Kïkany kuwonyö könyiswechoni le elpu akong, kïmïchini ketyak nyinte ngat, wölo ompö osis cho ngörï.

⁴ Atolapay asïwan ngöcherwo paytagh nko pich cho kitïpisot ngöcherwechoni. Ketö pïchoni owesyö nyo rwokyini pich. Asïwan ngat mïkulis pö pich cho kikïsil kotwon ompöwölo kisöwintönchï chane man nyo kingongwï Yeso akwamta ngölyonto Tororöt. Kikïsil kotwon lenyoni tïkwïl ompöwölo melö kisagh chane tyonyay anta körkeyïntanyi amelö kicham ketö mötöwekwa anta morikwa macheyu tyonyoni. Kututï Tororöt chane akutö kïpayta nko Kristo* könyis elpu akonga.

⁵Melö kitutï atoni pikö walaka cho kimeghö ntökïtenö kuwonyö könyiswechoni le elpu akonga. Kitutunöte nyoni nyo pö tagh.

⁶Soyönote kïtya chi nyo nyoru kitutunötononi pö tagh kikïkonï kegh chichoni ompö pöghisyo Tororöt mökwidonye kïgh pich cho le choni meghat nyo pö odeny. Lïku chane tïsi Tororöt nko cho pö Kristo akïpöytoy nko nyinte könyis elpu akonga.

⁷Kïkany kuwonyö könyiswechoni le elpu akonga, ketyokunö nyu Onyöt wölay kikïrötyï.

⁸Akwotini kingwïn sany, kïlïsata pich kïghömï ngwïny kïmïkul choni kï Kok nko Makok. Ghömïtöy Onyötö chane löwïr kïpa lïk, lïko pich cho makïrar, pich cho tenö ngayam cho mi sörömu nanam.

⁹Kiyasta chane kïghömï ngwïny kïmïkul akuwitwit kanasyantanay chömöy Tororöt, kanasyan nyo kimöngöy pikachi. Wölo ketyorunö ma yïm nyo kiwany chane.

¹⁰Atolapay kewirchï Onyöt nyo kilïs pich nanampa ma nyo ngwan lakat, mapa koghïn cho nöghsot. Kikïwirchï wöloni tïkwïl tyonyay nko werkoyontonay pö putintön. Nyörïlyegho chane wöloni pöghet nko nangat, kokay nko kokay.

¹¹ Atolapay asïwan Tororöt ngacharu kïtöpo paytagh ngachar nyo wow akï rel kïpa lö weng ompö tawunyi ngwïnya nko yïm amelö kitökesïwa chane ngat.

¹²Atolapay asïwan pich cho kikikïmeghö, cho echön nko cho mïnkech kughyongo tawu ngacharu paytagh. Atoni nyu keyat kitapun. Atolapay keyat kitapu anka, nyoni kï kitapu söpon. Kerwokyï chane kïrïp kegh nko tïkwïn cho kigh chane le wölini kikikirta ompö kitapunechoni.

¹³Atolapay kikonï nanam pich cho kimeghyechï orinyi. Kikonï meghat nko ngwen pich cho kimeghö ompö oringwa. Kikirwokyï nyu löwïr kïrïp kegh nko ighisyewutkökwa.

¹⁴Kewirchï meghat nko ngwen nanamoni pö ma akï nanamoni pö ma kï meghat nyo pö odeny.

¹⁵Kikïwirchï nanamoni pö ma chi anka tïkwïl nyo kimelö kikïsöchï kaynenyi kukirate ompö kitapu söpon.