Read pokoot NGONGUT 21 Bible Online

NGONGUT 21 - pokoot bible

NGONGUT 21

¹ Atolapay asïwan yïm nyo rel nko ngwïny nyo rel. Kikuwer yïmö nko ngwïny nyay pö tagh amelö kitökïmi nanam ngat.

² Asïwan Kanasyan nyo tïlil, Yerusalem nyo rel, kïrökunö yïm wölo mi Tororöt, kanasyan nyo kikipïch lasiny akïmi kïpsach, le mïrar nyo nopchini kegh santenyi.

³ Atolapay alïman kut nyo wow nyo kingölonuno ngacharu pö paytagh kïlentöy, “Töngönchin ye nyu kwïle! Kömöngisyö Tororöt nko pich! Kömöngisyö nyinte nko chane atökïlïkwï chane pikachi, kïlïkwï nyinte Tororöt, Tororötïngwa.

⁴ Misöy nyinte Tororöt lok cho mi konyikwa akïmökïminye meghat kokay, amökïminye lok ompöwölo kama chi, anta rirat anta kichïr ompöwölo kikuwer tïkuchay pö tagh.”

⁵Atolapay kïlö Tororöt kïtöpo ngacharu paytagh, “Arosa nyu! Kaghan ye tïkwïn lapay kïrelachitu!” Akïmwowanïn ngat lö, “Kira ngalechï komwowunyi ompöwölo ngal chete cho muköy pich kughan akï pö man.”

⁶ Akïlenchanïn, “Kikwighisyö! Ochan Alpa nko Omeka towunöt nko söröm. Otöninan chi anka tïkwïl nyo amate maral kïgheghöy pögh kwïle cho pkono kongpa pögho söpon.

⁷ Anka tïkwïl nyo rïntoy otöninan tïkuchete löwïr, alïkunan Tororötïnyi, kïlïkwï nyinte montönyan.

⁸Wölo cho nyökoröch nko cho melö tökughönöy Kristo* nko cho kisïmnyontön ngokï nko cho le pörï nko cho le cheporestin nko cho le ponï nko cho soghöy körkeyïntin nko putï löwïr. Wölo kimïchï kïpa pich cho lata choni kï nanam nyo nögho ma nko koghïn cho nöghsot akï nyoni kï meghat nyo pö odeny.”

⁹Atolapay kungwïn wölo omitan malaykayan nyo kile akonga ompö malaykenichay le mut nko odeny kitïng pakulin mut nko odeny cho kinyïghitate nyörïlwoktino söröm cho le mut nko odeny akïlö, “Nyonö yi, atoporun Mïrar nyo pö kensyo Wawa Kech.”

¹⁰ Kïnamanïn Mïkulöwu, Tororöt atolapay kumïtanïn malaykayantanay ntatan paraku kutïng nyo kogh tya. Kuporwanïn Yerusalem, Kanasyan nyo Tïlil nyo ngwïno yïm wölo mi Tororöt

¹¹akï nyo kilïwu ompö ororyo Tororöt. Kulïwï kanasyantanay le kogh pö olyot nyo wow nyo lata koghpa yaspi nyo lïwu le kiyö.

¹² Kikiwita kanasyantanoni nayat nyo kogh akï wow nyo kimi ortïnechoni cho le taman nko odeny akimi malayken cho le taman nko odeny cho kiripöy ortïnechoni. Kikikirchï kukotichoni kaynötut pö pipö Israel kïtaman nko odeny.

¹³Kimi kukot sömökï wop anka tïkwïl: kimi sömökï wölnö le kongasis, kïmi sömökï wölo porö, kïmi wölo toka sömökï, kïmi sömökï wölnö le to.

¹⁴Kighyongo nayatu kanasyantanoni koghi kitoröt cho le taman nko odeny cho kikikirchï kaynötut taman nko odeny cho pö kiyoktoghi Wawa Kech.

¹⁵ Kitïng malaykayantanoni kingölonwanïn lïkïp nyo pö koltin nyo kipimtoy atökupima kanasyantanoni, kipima kukotichi nko nïyetkachi.

¹⁶Kiwit kanasyantanoni nïyet angwan cho kikarkegh koghïntö nko töpesïntö. Kupima malaykayantanay kanasyantanay lïkïnyi akïnyorï lö kit kilomiten 2,400 ompö koghïn nyo kikarkegh nko töpesïn nko kepus parak.

¹⁷Kupim tïkwïl malaykayantanay lö kiwö parak kïtya nayatu, kïnyorï lö ki miten 60, kïrïp kegh nko wölo pimtoy pich.

¹⁸ Kikïteka nayatunoni koghi chaspa cho pïroch cho pö olyot nyo wow, akikwigha kïgh anka tïkwïl ompö kanasyantanoni koltin cho tïlilöch cho kiryölöy le kïyo.

¹⁹Kikïmina koghi kitoröto nayatu kanasyantanoni koghïn cho sisinchö cho pö olyot nyo wow. Kado kitoröt nyo pö tagh kï ki yaspi, nyo pö odeny sapire, nyo pö sömök kalkedo, nyo pö angwan sumarakdo,

²⁰nyo pö mut sardoniki, nyo pö mu nko akonga sardio, nyo pö mut nko odeny krusolito, nyo pö mut nko sömök perual, nyo pö mut nko angwan topas, nyo pö taman krusopras, nyo pö taman nko akonga yasinto, nyo pö taman nko odeny ametusta.

²¹Kukot cho kïlïto kanasyantanoni cho le taman nko odeny kï cho kikigha lulun akï kïgh anka tïkwïl ompö kanasyantanoni kï kikigha koltin cho pïchighöch cho kiryölöy le kiyo.

²²Kimosöchanye Kö pö Tororöt kanasyantanoni ompöwölo nyinte Echotyon Tororöt Kimuktoghin nko Wawa Kech nyo le Kö pö Tororöt ompö kanasyantanoni.

²³ Kimönyorchininye kanasyantanoni löpoyïntanyi asis anta arawa ompöwölo lïwchini nyinte ororyo Tororöt akï tayenyi kï Wawa Kech.

²⁴ Pestegho pipö ngwïny löpoyïntanyi akwipchini pöytoghi ngwïny mökosyengwa kanasyantanoni.

²⁵Kïpïstö kukoti kanasyantanoni kïyotote kwimön ompöwölo melö tökïmi nangatï wöloni.

²⁶Kipchini kanasyantanoni tïkwïn cho pïchighöch nko mökosyo pipö ngwïny.

²⁷ Wölo möminye kïgh nyo le sïmnyon nyo lïtöy kanasyantanoni anta chi anka tïkwïl nyo ighöy tïkwïn cho pö arasï anta nyo mwoghöy putintön. Pich opïn cho lïtöy kanasyantanoni kï cho kikekirchï kaynötutkökwa kitapu Wawa Kech nyo pö söpon.