Read pokoot NGONGUT 4 Bible Online

NGONGUT 4 - pokoot bible

NGONGUT 4

¹Kïkany kuwanta kegh ngalechï, asïwan sïwïyagh nyo pö kiyata ompö yïm. Kïlö kut nyo kichögh le kontï nyo kökangölonwanïn tagh, “Pusuna wölï toporun tïkwïn cho ighisyot nyo mötïny.”

² Kïnyini lawel awan ompö Mïkulögh, asiwan ngacharu paytagh yïm kïtöpö chi.

³Akwoto kiros chichoni kitöpo ngacharunoni, kï kilata pïchighyenyi koghi yaspa nko sardio, akiwit ngacharunoni pö paytagh kïtompïlyö nyo kilata munyanta sumarado.

⁴Kimi nyu ngöcherwö walaka cho pö paytagh cho le 24 cho kiwit ngacharu paytagh, cho kitïpïyot poyï cho le 24 cho kiloköy sïro cho relach tenteni koltin.

⁵ Kungwïna kiryalata ngacharunini nko tïlöto ilat. Kimi tawu ngacharu paytagh tatïna le mut nko odeny cho kiketam, aki mïkulis pö Tororöt choni cho le mut nko odeny.

⁶ Kimi ngat nko ngacharu pö paytagh kïgh nyo kilata nanampa kïlas, ki rel lönga. Akimi kwenu ngacharu paytagh, tyonkïn angwanï cho sötote cho kinyïghï konyïn tagh nko löt cho kiwit woptine löwïr.

⁷Ki karkegh tyonto tagh nko ngötïny, kïkarkegh nyo pö odeny nko kirïk, kitïng nyo pö sömök tokoch nyo kilata nyo pö chi, kilata nyo pö angwan sich nyo kipiltoy.

⁸ Kitïng anka tïkwïl ompö tyonchoni sötote le angwan köpepoy mut nko akonga, akighömï konyïn chane le chankonyïn chane kitumöy chane kïpuryö kimïny pöghet nko nangat kïlentöy. “Tïlil, tïlil, tïlil Echotyon Tororöt nyo le Kimuktoghin, nyo kimi akïtökïmi akï nyo tökungwïnöy.”

⁹Kïpechï tyonchay sötote le angwan kïtumchï tumwöyi ororyö nko konyït nko kisoyönöt nyinte nyini kitöpo ngacharu paytagh, nyinte nyini söpöy kokay,

¹⁰kupïtyï poyichay le 24 tawu nyinte nyini töpo ngacharu paytagh akïkïtïngchï nyinte nyini satate kokay nko kokay akïngwïsyï tentenikwa ngwïny tawu ngacharu paytagh akïlö:

¹¹“Ichinyi Echotyontencha aichï Tororötïncha! Mïchininyi taka ororyö nko konyït nko owesyö. Ompöwölo nyi nyo kitowï tïkwïn löwïr, akïmi tïkuchoni kïsöpsot ompö machatengu.”