Read pokoot NGONGUT 6 Bible Online

NGONGUT 6 - pokoot bible

NGONGUT 6

¹Atolapay asïwan Wawa Kech ato ngötiyöy akonga ompö möcheywechini kikïngos le mut nko odeny, alïman akonga ompö tyonchay sötote le angwan kïlentöy ompö kut nyo karkegh nko tïlöto ilat, “Nyonö!”

² Asïwan angole nyo rel, nyo kikötöy chi nyo kïtïng kïwang, ketö nyinte tenta kulach. Kïweghö angolenoni le chi nyo kikupölisyö akïmi kupölisïyi.

³Atolapay kïyat Wawa Kech macheyto odeny alïman akonga ompö tyonchay sötote le angwan kïlentöy, “Nyonö!”

⁴ Kungwïn angoletö anka nyo pïrir. Ketö owesyö chi nyo kiwegho angole kwipï kiwolyot ngwïny tökïpar kegh pich. Ketö nyu nyinte chok nyo wow.

⁵ Atolapay kïngötïy Wawa Kech macheyta nyo pö sömök alïman tyonto sömök kilentöy, “Nyonö!” Asïwan angole nyo tuw nyo kikötöy chi nyo kïtïng ratilin odeny ompö ewunyi.

⁶Alïman kïgh kichögh ompö kwenu tyonchay sötote le angwan nyo kilentöy, “Nya kwal kipapa akong nyo pö pïsya nkanun nusïyon, kwal kipapen sömök cho pö matay ompö ropïyon akonga nyo pö silpa, wölo menyar keti arol nko sapipun!”

⁷Atolapay kïngötïy Wawa Kech macheyto angwan alïman tyonyay satate pö angwan kïlö, “Nyonö!”

⁸ Asïwan, kungwïn angole nyo tolelyo, nyo kikötöy chi nyo kikuro kaynenyi Meghat, akimi ngwen kïrïpu lötunyi. Kikitö chane owesyö kïpayta kareran akonga ompö angwan nyo pö ngwïny tökïpara pich chok nko kömöy nko sömewut nko tïpö wudïn.

⁹Atolapay kïngötïy Wawa Kech macheyto mut. Osöchan ngwïnyi wölay kïpelo amörostin mïkulis pö pich cho kikïpar ompöwölo kyamta chane ngölyonto Tororöt nko ompö söwintönengwa.

¹⁰Kuteghyö chane ompö kut nyo wow lö, “Echotyon Kimuktoghin nyo tïlil nyo pö man! Itöponenyi nko oyï irwokyinyi pipö ngwïny chï kaparecha?”

¹¹Ketö anka tïkwïl ompö chane sïra nyo kogh nyo rel akemwochï kumuny kïte, ntökïtenö kwitïta kiyitöto mötwor cho kipöghisïyi nko chane nko tupchenikwa cho tökepöröy le wölo kikïparta chane.

¹² Asïwan Wawa Kech kungötiy macheyto mut nko akonga, kurïngring ngwïnya nyoman, kïwaghaka asis kïtuwit le sarankwachtin, kïwaghaka arawa kipïririt le kisön,

¹³ kïchïnu kokel ompö yïm kïchinchini ngwïny le akwa makany cho nyörilöch ato timtim yomöt nyo awes.

¹⁴ Kïwö yïmö lö le kitapï nyo kakïmaman, kenategha kutïng anka tïkwïl nko kor anka tïkwïl nyo kikwen pögh kïngeta otanyi.

¹⁵ Atolapay kïpechï pöytoghi ngwïny nko pich cho owesöch cho echön nko echot nko monkor nko cho owesöch nko chi anka tïkwïl nyo le sekeyon anta nyo tyakate, kïwïnya kegh chane köpönot nko kutïngkot.

¹⁶Atolapay kïlenchï kutïngkotichay nko koghi, “Orulchecha, atawïnyenecha konyi chichinö töpo ngacharu paytagh nko nörekyo Wawa Kech!

¹⁷Ompöwölo kikwitïta asistanyi nyo wow nyo pö nörekyenyi, ngo nyu nyo köngöy kughyongtö?”