Read pokoot NGONGUT 7 Bible Online

NGONGUT 7 - pokoot bible

NGONGUT 7

¹ Kïkany kuwanta kegh asïwan malayken angwan cho kighyongo koneni angwan cho pö ngwïny mi kïkörtoy yomöt ompö woptinechini kwangwan, atömö kïkut paraku ngwïny anta paraku nanam anta swany ket anka tïkwïl.

²Asïwan malaykayan anka nyo kipusuna kongasis nyo kitïng macheypa Tororöt nyo satate. Kïlenchï malaykenichay le angwan kitö Tororöt owesyö kunyar ngwïny nko nanam,

³ “Manyar ngwïny anta nanam anta ket ntökïtenö ketönöcha mötworiko Tororötïncha macheytin tokoch.”

⁴Kemwowanïn nyu lö pïchini kikitö macheyu Tororöt tokochwekwa kï pich 144,000 cho kipkana Punton taman nko odeny cho pö pipö Israel:

⁵Ketö ara Yuda, pich 12,000, ketö ara Rupen pich 12,000, ketö ara Kad pich 12,000,

⁶ketö ara Asyer pich 12,000, ketö ara Naptali pich 12,000, ketö ara Manase pich 12,000,

⁷ketö ara Simion pich 12,000, ketö ara Lawi pich 12,000, ketö ara Isakar pich 12,000,

⁸ketö ara Saplon pich 12,000, ketö ara Yosep pich 12,000, ketö ara Penchamen pich 12,000.

⁹Kïkany kuwanta kegh, asïwan söpïch pö pich cho makïrar cho kimemukonye chi ntökuyit, kïpkana punton nko ortïn löwïr nko kutïw löwïr akughyongö tawu ngacharu paytagh nyo pö Wawa Kech, kiloköy chane sïro cho koghöch cho relach akïnömöy sostin.

¹⁰Kuteghyö lö, “Ngwïno sörunötencha wölo mi Tororötïncha, nyo töpo ngacharu paytagh akungwïno wölo mi Wawa Kech!”

¹¹Kughyö malayken cho kuwit ngacharu paytagh nko poy nko tyonchay sötote le angwan. Atolapay kupïtyï tawu ngacharu paytagh akïsagh Tororöt

¹²lö, “Amen! Pö salata nko ororyö nko ngöghomnyö nko kisoyönöt nko konyït nko owesyö nko kimukat Tororötïncha kokay nko kokay! Amen.”

¹³Kïtepanïn akong ompö poyichay lö, “Ngo chï kikilokyï sïro cho koghöch cho relach, akïpkono onö?”

¹⁴ Olenchan, “Monkïtönye echotyon, nyi nyo inkït.” Kïlenchanïn, “Pïchï chay kiwer kiwongunöt nyo ngwan. Kimwata chane sïrokökwa kisön pö Wawa Kech kïrelachitu.

¹⁵Nka nyï mi chane kughyongo tawu ngacharu paytaghpa Tororöt, kïpöghisyechini nyinte pöghet nko nangat ompö Konyi. Körtegho nyinte nyo töpo ngacharu paytagh chane emenyi.

¹⁶ Amökwomöcha kömöy chane ngat anta maral, amökïpelöcha chane asis ngat anta kilayat anka tïkwïl.

¹⁷ Ompöwölo lïku Wawa Kech nyo mi kwenu ngacharu paytagh mösöwontengwa akuntöghoghchini chane ntökwit wölo kosuno pögho söpon. Miso Tororöt lok konyikwa löwïr.”