Read pokoot NGONGUT 8 Bible Online

NGONGUT 8 - pokoot bible

NGONGUT 8

¹Otini kiyat Wawa Kech macheyto mut nko odeny, kïsï yïmö lasay ompö nïsu sa akonga.

²Atolapay asïwan malayken mut nko odeny kughyongo tawu Tororöt, ketö chane kontin mut nko odeny.

³ Kungwïn malaykayan anka akughyongö tawu ato kïpelo amöros nyo kitïng töwït nyo pö watwa koltin nyo kïpelo amörostin, ketö nyinte mankoy cho chang cho kïpelöy kïlïku amörostin, atökutuyö nko sowut pö pipö Tororöt löwïr ompö parakuto watwechini pö koltin kïpelo amörostin mi tawu ngacharu paytagh.

⁴Kïpus ighöt yïm nyo pö körösyon nyo kimi nko sowut pö pipö Tororöt nyo kingeta ewuno malaykayantanini kighyongo tawu Tororöt.

⁵ Atolapay kïcheng malaykayantanay töwïtyonay kïpelo mankoy, akunyïghit ma ompö ato kïpelo amöros, akïwirchï ngwïny. Kwitï tïlötö nko kiteghat nko kiryal nko potanata ngwïny.

⁶Atolapay kïnap kegh malaykenichay le mut nko odeny kitïng kontin mut nko odeny tökïkut kontinekwa.

⁷ Kikut malaykayante nyo tagh kontinyi. Kïropönchï ngwïny takarïstina ma cho kituyö nko kisön. Kïnagh kareranpa ngwïny nyo le akonga ompö sömök, kïnöghö kareranpa ket nyo pö sömök nko sus löwïr cho nyörilöch.

⁸Atolapay kïkut malaykayan nyo pö odeny kontinyi. Kewirchï kïgh nanam nyo ato kiros kïlata kutïng nyo wow nyo kinöghöy. Kïwaghaka kareranpa nanam akong ompö sömök kïlïkwï kisön,

⁹kïmeghö kareran akong ompö sömök cho pö tyonkïn cho nanam, akenyar kareran akonga nyo pö sömök nyo pö melin.

¹⁰Atolapay kïkut malaykayan nyo pö sömök kontinyi. Kïchïnuna yïm kokelyanta nyo wow nyo kinöghöy le ta, akïchïnchï kareran akonga ompö sömök nyo pö lalwatïn nko wölo kosuno pögh.

¹¹ (Kïkuro kaynata kokelyantanoni “Ngwonïn.”) Kïwaghaka kareran akonga ompö sömök nyo pö pögh kïngwonöchitu, kïmeghö pich cho chang cho kigha pöghechoni ompöwölo kiwöghokisyö kïngwonöchitu.

¹² Atolapay kïkut malaykayan nyo pö angwan kontinyi. Kïma kareranpa sömök nyo pö asis nko kareranpa sömök nyo pö arawa nko kareranpa sömök nyo pö kokel, kipot nyu kareranpa sömök nyo pö löpoyïntöngwa. Kimöminye löpoyïn asisto sömök nko ogheto sömök tïkwïl.

¹³Atolapay asïwan, alïman sich nyo kipilo kwenu yïm nyo kingölono kut nyo wow tya kïlentöy, “Heywey! Wechï ghöyitu ompö pich cho möngöy ngwïny ato kut malaykenichoni köngötï le sömök kontinekwa!”