Read pokoot 1 SAMWEL 1 Bible Online

1 SAMWEL 1 - pokoot bible

1 SAMWEL 1

¹Kimito chi nyo kipö kanasyanta Rama[1] ompö komoswo Epraim nyo kikïkuro kaynenyi Elkana wero Yeroam wero Eliu wero Tou wero Sup nyo pö ara Epraim.

²Kitïng koruchi odeny kikïkuro anka Ana kekuro anka Penina. Kitïng Penina monïng wölo kimötïngnye Ana.

³Kingeto nyinte kanasyantenyi köny anka tïkwïl kïwetöy kïsoghöy akutöni amöros ECHOTYON Kimuktoghin ompö kanasyanta Syilo. Kimito wöloni werpö Eli odeny, Opni nko Pineas cho kile tïsi ECHOTYON.

⁴Otini kitötoy Elkana amöros, kï kitöni Penina kareranpa peny nko monechi löwïr,

⁵wölo kungwangwan nyo pö Ana ompöwölo kichömöy nyinte nyoman, kïrkegh kirat ECHOTYON nyinte.

⁶Kichïmpis korkengwa Ana nyoman ompöwölo kimetönye ECHOTYON nyinte monïng.

⁷Kigh lenyoni köny anka tïkwïl otini kiwetöy Kö pö ECHOTYON, kichïmpisöy Penina Ana kïtenö osis, kïlenyona kïlok Ana akïtagh kwomisyö.

⁸Kïtep Elkana nyinte lö, “Ana ompö ne telokenyi? Akwompö ne tömomisïyenyi? Akwompö ne techinyi narekate? Melö ochan so ngwangwa kïtïl wor taman ompö nyi?”

⁹Otini kiwang chane kwomisyö akïgheghsyö ompö kanasyanta Syilo, kïnget Ana akughyö, akimi Eli tïsin kïtöpo ngachar nyo kimi ket pö kuka Kö pö ECHOTYON.

¹⁰Kisagh Ana ECHOTYON akïloköy ompöwölo kitïng ngwonïn ompö mïkulöwunyi.

¹¹Kuwalwal lö, “ECHOTYON Kimuktoghin, ato isïwïyenyi nyarïltanyan, inanante amewutyeghante. Ato ikonaninyi monïng nyo le weri, okoninyi nyinte ompö osiswechi löwïr amörwokönye chi mötïnyi.”

¹²Otini kimi kïsoghöy Ana ompö tawu ECHOTYON, kïmi Eli kurosöy kutinyi.

¹³Kingölonöy Ana ompö mïkulöwunyi, kingöngngonöy pempö kut wölo kimölïmönye ngale, kïlenyona kunan Eli lö töptoy tamasat kokonï.

¹⁴Kïlenchï Eli nyinte, “Itömösenyi nko oyï? Pïstenö dipay!”*

¹⁵Kïlö Ana, “Ewo echotyontenyu, wongunote mïkulöwunyan, melö ochan tamasate, komitan osoghöy amwochini ECHOTYON nyarïltanyu.

¹⁶Meyitanïn lö ochan korka nyo mötïngnye konyït. Komitan osoghöy lenyoni ompö kiwongunöt nyo otïngetan.”

¹⁷Kuyokyï Eli lö, “Wïyö ompö kalya, nya kïkonïn Tororöt pö pipö Israel kïgh nyo kesomönyi.”

¹⁸Kïlö Ana, “Nya aghan kïgh nyo ichömenyi kïtenö osis.” Atolapay kïwö kokonay akwomisyö amelö kitökuwongwï ngat.

¹⁹Kïnget chane tökwoghö akïsagh ompö tawu ECHOTYON, atolapay kïpa kutang katangwa Rama. Kïrï Elkana nko korkenyi Ana, kusyonchï ECHOTYON nyinte ompö saghatenyi.

²⁰Kïsïkisyö Ana, akïyï monïng nyo le weri, kïkurö kaynenyi Samwel, ompöwölo kilö, “Kyosoman nyinte ECHOTYON.”

²¹Kïwö Elkana nko monechi kutang kanasyanta Syilo kutö ECHOTYON amöros nyo pö köny anka tïkwïl, atökupuntö ayomistanyi.

²²Wölo kimöwönye Ana Syilo, kïlenchï pontenyi, “Melö owetan ntökïtenö kïpïstö monïngï kitïn, atoni nyu ato omïtan tawu ECHOTYON, atökïtöpö wöloni kokay.”

²³Kïlenchï Elkana nyinte, “Igha nyo isïwïyenyi lö karam ompö nyi, rerïyö montö ntökïpïstö kitïn, wölo nya kupuntö ECHOTYON ngölyontengu.”[2] Kïtöpö kokonay kaw akurerï montanyi ntökïtenö kïpïstö kitïn.

²⁴Otini kipïstö monïngay kitïn, kumït nyinte Kö pö ECHOTYON wölnö le Syilo, akïkat egh nyo pö könyis sömök nko pïsya cho pö depö nko dipay cho pö takol, akitö kïmïnïng montö.

²⁵Kïyeng eghay, akumït montö wölo mi Eli.

²⁶Akïlenchï, “We echotyontenyu! Ani nyanye kïpakachisany kyoghyongo tawungu osoghöy ECHOTYON.

²⁷Kyosomön ECHOTYON monïngete, akïkonanïn.

²⁸Kïlenyona kongotyan nyinte ECHOTYON, ompö osiswechi löwïr.” Atolapay kïsagh Ana ECHOTYON ompö atoni.