Read pokoot 1 SAMWEL 16 Bible Online

1 SAMWEL 16 - pokoot bible

1 SAMWEL 16

¹Kïlenchï ECHOTYON Samwel, “Ilöngönchini Saulö nko oyï? Akwanyï isïwïyenyi lö, kataghan nyinte kïlïkwï pöytoghinto Israel? Nyïghita mwagh lal aiwö itang ka Yese nyo mi Petleem, ompöwölo kakïlan akonga ompö werkachi kïlïkwï pöytoghin.”

²Kïlö Samwel, “Owetan lö ne? Atolïm Saulö kïpöranïn.” Kïlö ECHOTYON, “Chenga mösör ailö, ‘Owetan otoni ECHOTYON amöros.’

³Ikur Yese ompö amörosnoni atoporunyi kïgh nyo ighenyi. Iyilwaninyi nyu chi nyo oporunyi.”

⁴Kwigh Samwel lenyini kimwochï ECHOTYON, kïwö kutang Petleem. Kïpka poyi kanasyan kïtarok nyinte akïpotonchot, akïtep lö, “Kengwïnanyi ompö pöghisyö nya?”

⁵Kïlö nyinte, “Owöy! Kangwïnan ompö pöghisyö otö ECHOTYON amöros, otïlilö kegh akepa nko ani ketötö amöros.” Kutïlil Samwel Yese nko werkachi akïkur chane ompö amörosnoni.

⁶Otini kipetöy, kuros Samwel Elyap akïlö, “Nyoman nyete nyo kakïkïl ECHOTYON.”

⁷Wölo kïlenchï ECHOTYON Samwel, “Meros wölo lata nyinte anta koghïnto portanyi, ompöwölo kataghan nyinte. Melö rosöy ECHOTYON le ptangengmöt nyo rosöy wölo lata chi, wölo rosöy ECHOTYON mïkulögh.”

⁸Kïkur Yese Apinadap kuwer tawu Samwel. Kïlö Samwel, “Makïlnye ECHOTYON nyete tïkwïl.”

⁹Kïkany Yese kuwer Syama. Kïlö Samwel, “Makïlnye ECHOTYON nyete tïkwïl.”

¹⁰Kïkany Yese kuwer werkachi tawu Samwel ntökwit mut nko odeny. Kïlenchï Samwel Yese, “Makïlnye ECHOTYON chete.”

¹¹Kïtep Samwel Yese lö, “Werköku chete löwïr?” Kïlö, “Mi nyo mïnïng kuyokwïyöy kechir.” Kïlenchï Samwel Yese, “Yontena chi kïkurï, ompöwölo melö kitötocha amöros ato tomönye kungwïn nyinte.”

¹²Kekurï nyinte kungwïn tawungwa. Ki chi nyo pïrir nyinte akïkaram tokochunyi nko portanyi. Kïlenchï ECHOTYON Samwel, “Yila nka nyete nyinte.”

¹³Kicheng Samwel lal nyo mi mwagh, akuyil Daudi ompö kwenu werkökwa, kungwïnchï Mïkulöwu ECHOTYON Daudi asisoni kutang tagh. Kïmïla Samwel kutang Rama.

¹⁴Kïngeta mïkulöwu ECHOTYON Saulö, kïlïtï mïkulögh nyo gha nyo kisus nyinte nyo kiyonï ECHOTYON.

¹⁵Kïlenchï mötworichi nyinte, “Kölïtinyi mïkulögh nyo gha nyo susinyi nyo köyonï Tororöt.

¹⁶Mwowecha ye nyu kepecha keyörunö chi nyo nkït kïpïtöy pïkan, nyo ato lïtinyi mïkulögh nyo gha nyo yonu Tororöt, kïpït pïkan, atökïturön mïkulöwungu.”

¹⁷Kïlenchï Saulö mötworichi, “Oyörwanïn chi nyo nkït kïpïtöy pïkan lasiny, amïtwanïn.”

¹⁸Kïlö chi akong ompö pïchay, “Tïngeto chi nyo pö Petleem nyo kïkuro Yese werïnyi nyo nkït kïpïtöy pïkan akï chi nyo le nyakan akïkörom ompö poryot, chi nyo ngölonöy nyo karam akimi ECHOTYON nko nyinte.”

¹⁹Kïyonta Saulö pich wölo mi Yese, kïlenchï, “Yokwanïn werïngu Daudi nyona yokwïyi kechir.”

²⁰Kuyoktö Yese Daudi wölo mi Saulö nko wara aran nko sïkïryö nyo kösönöy makatin nko tokal nyo mi dipay.*

²¹Kïwö Daudi wölo mi Saulö akïpöghisyechï. Kïcham Saulö nyinte tya akwigh kïlïkwï ipinto karichi pö poryot.

²²Kuyoktö kut Saulö wölo mi Yese akïlenchï, “Nya kwighwanïn Daudi ighisyö, ompöwölo kegh nyinte kïgh nyo kachaman.”

²³Otini kingwïnchï Saulö mïkulögh nyo gha nyo kiyonï Tororöt, kïcheng Daudi pïkan akïpït, kïpïstö mïkulöwunay gha Saulö kïturön nyinte.