Read pokoot 1 SAMWEL 18 Bible Online

1 SAMWEL 18 - pokoot bible

1 SAMWEL 18

¹Otini kiwany Daudi kïngalan nko Saulö, kïchomnyö kisön pö Yonatan nko cho pö Daudi. Kicham nyinte Daudi le nyinte kegh.

²Kumït Saulö Daudi asisoni akimökïchömchïnye kïmïl katangwa.

³Kwam Yonatan muma nko Daudi, ompöwölo kicham nyinte Daudi le nyinte kegh.

⁴Kïngwïs Yonatan sïra nyo kiloköy akutö Daudi nko sïrokachi pö poryot nko choke nko kïwanti nko angweto mu.

⁵Kigh Daudi nyo karam ompö kïgh anka tïkwïl nyo kiyok Saulö. Kïlenyona kwigh Saulö kughyongchö pipö lïk. Kïkaramit kïyoni ompö pich nko ompö mötwori Saulö.

⁶Otini kimi kïpkonöy kaw, ompö wölay kipara Daudi Kolyat, kïpka koru kanastina Israel löwïr kïtarok pöytoghin Saulö. Kitumöy tumwöyi ngörekyö ompö kwïrkwïris nko kari tumwöy.

⁷Kïtum koruchay kughönöy walaka kïlentöy, “Kapar Saulö elpun cho chang, kïpar Daudi elpun cho makïrar.”

⁸Kïnarek Saulö, akimöngörokyïnye mwaghatanï, kïlö, “Ketö chane Daudi elpun cho makïrar, kekonanïn elpun cho chang kwïle. Köngötï ne nyu ompö nyinte, kedong kegh kïlïkwï pöytoghin?”

⁹Kwipö Saulö Daudi sikong kïngata asisoni.

¹⁰Kïlïtyï mïkulögh nyo gha Saulö nyo kiyonu Tororöt ato le asïyechu, kutor kïngalan le chepöyï. Kïmi Daudi kïpïtöy pïkan le osis löwïr, akitïng Saulö ngot.

¹¹Kunan Saulö lö, “Otoran nyinte kïnam nayat.” Kïtor kïnyïl odeny wölo kïghöpön Daudi.

¹²Kiwagh Saulö Daudi, ompöwölo kimi ECHOTYON nko nyinte, nyo kikïpïstö Saulö.

¹³Kïyona Saulö Daudi wölo mi nyinte akutö kïlïkwï yetïn pö pipö lïk 1,000. Kuntöghoghchï Daudi pikachi ompö poryot

¹⁴akïrïnta ompö kïgh anka tïkwïl nyo kigh, ompöwölo kimi ECHOTYON nko nyinte.

¹⁵Otini kisïwa Saulö lö kirïntoghisyö Daudi, kuwagh tya.

¹⁶Wölo kïcham pipö Israel nko cho pö Yuda Daudi, ompöwölo ki kintöghoghin nyo karam nyinte.

¹⁷Kïlenchï Saulö Daudi, “Oyilunyi poretyenyan Merap, ato ipöghisyewaninyi nyo karam aiporyenyi poryo ECHOTYON.” Kinan Saulö lö, “Mömïchininye aparan nyinte, ngwangwa kïpar Pilisti.”

¹⁸Kïlenchï Daudi Saulö, “Ochan ngo anta koto paponyan anta orenyi ompö Israel, nyo omukan ope chepö pöytoghin?”

¹⁹Wölo otini kitïta ato kitökiyilchini Merap Daudi, keyilchï Adriel nyo ngwïno Meola.

²⁰Kïcham chepö Saulö nyo kïkuro Mikal Daudi. Kemwochï nyinte, kïngarak Saulö ompö ngalechoni

²¹akunan lö, “Oyilchinan nyinte, atökïlïkwï ngöghöp, atamanyïl kïpar Pilisti nyinte.” Kïlenchï Saulö Daudi nyo pö odeny, “Ipenyi ye nyu cheptönyan.”

²²Kïlenchï Saulö pikachi, “Ongölonchinö Daudi ompö sison amwochï lö, ‘Chöminyi pöytoghintö nko mötworichi tïkwïl, kïlenyona ipö cheptanyi.’ ”

²³Kïmwochï mötwori Saulö Daudi ngalechoni. Kïlö Daudi, “Ononekwo so lö kïgh nyo mïnïng kep chepö pöytoghin, mosïwïyekwanye so lö ochan meywon nyo tuw, amochanye rumunote?”

²⁴Kïmwochï mötworichi Saulö ngalechay kamwa Daudi.

²⁵Kïlö Saulö, omwochinö Daudi lö, “Kölö pöytoghintö, ‘Momöchanye kanyoy, kïpoto roloni Pilisti cho le pokol akonga, atö atakan pungköchan.’ ” Ki machata Saulö kepara Daudi poryot.

²⁶Nyini kimwochï mötwori Saulö Daudi ngalechoni, kïngarak nyoman otini kinan lö kipöy nyinte chepö pöytoghin. Kwigh lawel kïtomö kuwonyö osiswö cho kimwowï Saulö.

²⁷Kïwö Daudi nko pikachi akïpar Pilisti 200, akwipï roloni akuyityï pöytoghin, atökwip cheptanyi. Kuyilchï Saulö cheptanyi Mikal Daudi.

²⁸Nyini kinkïtï Saulö lö kimi ECHOTYON nko Daudi akï kicham cheptanyi Mikal nyinte,

²⁹kuwagh Saulö Daudi tya. Kïlïkwï Saulö punyonto Daudi ompö osiswechi löwïr.

³⁰Kipka lïkos pö Pilisti kïporyö nko pipö Israel, wölo kïrïnta Daudi chane kïtïl yetïntino Saulö walaka cho pö lïk. Kïtasa Daudi kwororit.