Read pokoot 1 SAMWEL 2 Bible Online

1 SAMWEL 2 - pokoot bible

1 SAMWEL 2

¹Kïsagh Ana akïlö, “Ngörökyini mïkulöwunyan ECHOTYON, keghanïn ECHOTYON alïkwan chi. Ororöchinan pungköchan, ompöwölo ongörökyinan sörunötenyi.

²“Möminye anka nyo tïlil le ECHOTYON, möminye nyo körökegh nko nyinte, awes Tororötïncha le ghat.

³Opïstenö ngalanat nyo pö kwolöto kegh, amakany kelïma menotön kutïwekwo, ompöwölo nkït ECHOTYON Tororöt ngal löwïr akï nyinte nyo rwokyini ighisyewut pö pich.

⁴Kömïrisyö kwantispa nyökon, wölo kïnyorï owesyö cho nyörkölole.

⁵Ketötö kegh kïlïkwï mötwor cho le sïkön atökïnyorï omisyö, wölo mökwomöcha kömöy cho kile mey. Köyï sonö monïng mut nko odeny, wölo kölyö nyo kitïng monïng cho chang.

⁶Tïghöy ECHOTYON akutöni söpon. Reytoy ntökwit ngwen, akungetunö wöloni.

⁷Konu ECHOTYON meywontön akïkonu sïkönöt, reytegho akutoteghu.

⁸Ngetuno nyinte mey ngwïny, akutoteghu ptankeris, atökïtöpïyö nko echot akïnyorï ngacharu konyït, ompöwölo kigh ECHOTYON pchörino ngwïny. Akutö ngwïny paraku pchörinechoni.

⁹“Ripöy pich cho ghönöy nyinte, wölo wonyechini cho ghach tuwïn. Ompöwölo möminye chi nyo muktoy ompö owesyenyi kegh.

¹⁰Kïpöröy chona le pung pö ECHOTYON, tïlöy ECHOTYON ompö yïm kwotyegho chane. Rwokyini ECHOTYON ngwïny kïmïkul, töni pöytoghintenyi owesyö, akutöror owesyeto kïlanenyi.”

¹¹Kïwö nyu Elkana kutang katanyi Rama, wölo kïpöghisyechï monïngay ECHOTYON akintöghoghchini tïsin Eli.

¹²Ki pich cho ghach werpö Eli, kimökonyïtöcha ECHOTYON

¹³anta otöp nyo pö tïsï nko pich. Ki ato ngwïn chi kutötö amöros, kungwïnöy mötworinto tïsin sarti nyo kimi ewunyi nyo tïng morïn sömök, otini kitö kïmi pentö kïrïröy

¹⁴akulut tör anta sïpïryö anta kïgh nyo kighoghtoy, ato peny nyo kingwïsï sartinay kïpöyitu tïsin. Kigh lenyoni pipö Israel löwïr cho kipa Syilo.

¹⁵Nyini kitomönye kepel sunetkö, kungwïn mötworinto tïsin akïlenchï chichay ketötoy amöros, “Konö peny pö tïsin nyo pelöy, ompöwölo möchömönye peny nyo kakigha ompö nyi, wölo mököy nyo nyaril.”

¹⁶Atolenchï chichay nyinte, “Nya kepel sunetkö kïny, atolapay icheng nyu nyo kemökenyi.” Wöghöku nyinte lö, “Ewo, konö nyete le ye, atomölenyona, ochengonan kat.”

¹⁷Kighechön ngoki werpö Eli ompö ECHOTYON, ompöwölo kisas chane amöros pö ECHOTYON.

¹⁸Kipöghisyechï Samwel ECHOTYON akiloköy sïra katani nyo pö tïsï.

¹⁹Kinöpchini kame nyinte sïra, akwipchini otini kiwetöy nko pontenyi kutötoy amöros nyo pö köny anka tïkwïl.

²⁰Kusoyön Eli Elkana nko korkenyi, akïlö, “Nya kïkoninyi ECHOTYON monïng ompö kokonï kuker monïngay kingotyini ECHOTYON.” Atolapay kïmïlisyö nyu chane katangwa.

²¹Kusoyön ECHOTYON Ana, kïnyorï worö sömök nko tipïn odeny. Kïyetï monïngay le Samwel akïmi kïpöghisyechini ECHOTYON.

²²Kökiyosit Eli tya. Kïlïm ngal cho kighöy werkachi ompö pipö Israel löwïr nko wölo kiruyö nko kor cho kipöghisïyi ompö kuka Ema nyo mi ECHOTYON.*

²³Kïlenchï chane, “Ompö ne taghakwa ngal cho lata chï? Kalïman ighisyeghutkökwa löwïr cho ghach.

²⁴Opïstenö ngalechï ghach kalïman pipö ECHOTYON kïmwoghöy.

²⁵Ato ighchï chi ngokï chitö anka kï Tororöt nyo löstoghchini, wölo ato ighchï chi ngokï ECHOTYON, kï ngo nyo löstoghchini nyinte?” Wölo malïmcha ngaleko papongwa, ompöwölo ki machata Tororöt kïpar chane.

²⁶Kïyetï monïngay le Samwel, akïnyorï chömchin ompö Tororöt nko ompö pich.

²⁷Kingwïnchï chi pö Tororöt nyo le werkoyon Eli, akïlenchï, “Kölö ECHOTYON, ‘Kyoporchan kegh kukötönkwa Aron atanya kimi chane le sekeyi Parao omö Misri.

²⁸Akïlan nyinte ompö ortïna Israel löwïr kïlïkwï tïsin, kïwö ato kïpelo amöros, akïpel tïkwïn cho ngutoy cho onyïn, akulak epod* ompö tawunyan. Atönön koto papongu amörostinechan cho kïpelöy cho kökonï pipö Israel.

²⁹Ompö ne tökïsïrchokwa mu amörostinechan nko ropöwechan cho kökonï piköchan, aikonyïtönyi werköku kïtïlanïn, otinö kapaghekwa kegh kïlanpa amörostin cho kiropkanïn piköchan pö Israel.’

³⁰Lentöy ECHOTYON Tororöt pö Israel, ‘Nyoman oyomisön lö pöghisyeghwanïn kongu nko koto papongu kokay.’ Wölo ye nyu kölö ECHOTYON, ‘Mökumukonye lenyoni, ompöwölo okonyïtan chona konyïtanïn, kïkany chane cho sösanïn, osösan chane.

³¹Itïtoy osiswö cho owongan owesyö ompö kongu nko ompö orenkwa, atömökïmi chi nyo le poyon ompö orenkwa.

³²Susinyi otini irosenyi ompö ngwonïn kisoyönut cho otönan pipö Israel, amöminye chi ompö orenkwa nyo ngöghöy karwal.

³³Ngötu chi akong nyo le nyinkwa nyo pöghisyewanïn ompö ato kïpelo amöros. Wongu nyinte nyoman akïma. Akepöröy piko kongu otini kapusï.

³⁴Meghot werköku kwodeny asis akonga, Opni nko Pineas, atenkïtunönyi lö ngal löwïr cho kamwaghan kï man.

³⁵Okïlchinan kegh tïsin anka nyo kighönöy, nyo ighöy kïrïp kegh nko machatenyan. Otöninan nyinte monïng cho chang, atökïpöghisyechï kïlanenyan kokay.

³⁶Chi anka tïkwïl nyo köngötï ompö orenkwa, kungwïnöy wölo mi tïsintononi akïsom ropïyen anta makatyan, akïlenchï, “Konante ighisyö nyo pö tïsintön, atö onyorwan makatyan nyo omöy.” ’ ”